Read saamia Yisaaya 3 Bible Online

Yisaaya 3 - saamia bible

Yisaaya 3

¹Bulaanu Omwaami, Omwaami w'Obunyala, ali ohumala mu Yerusalemu neende mu Buyudaaya buli siindu neende buli muundu, buli siindu si mudaha ohulya, neende buli siindu si mudaha ohung'wa;

²achia ohubatusaho abaandu balulu neende abanamaye, abakayi b'emisaango neende abanabbi, abalakusi neende abeemeresi,

³abahulira abaandu amahumi kataanu-kataanu mu maye neende abaandu bahunuufu, abakeraki neende abahola emirimo ch'esikugu neende abo abamanyirifu ohutuumbula ebinaakweeo.

⁴Mani Omwaami achia ohuhola abaana baraaga ohubeemerera haandi abaana bayere ohubatuka.

⁵Mani abaandu bachia ohufwiinyirira abasyaabwe, buli muundu afwiinyirire omuundu waasye haandi buli muundu afwiinyirire owaasye yamenya aambi nae. Abaraaga bachia ohulekeeresa abahuluundu, haandi abahalaabani balekeerese abakali baabwe.

⁶Endaalo chahoole, lu baandu bahabukule mulala hu bamwanaang'ina abebulanwa beene, nibaboola bati: Ewe koti lwooliho neende esy'ohwefwaala; niiwe ochia ohutuhulira, mani amakuunda kano koosi kachia ohuba obwaami bwao;

⁷Hu ludaalo olwo, oyo yahelwaneho n'aboola ati: “Haba siinja ohubaaho neende obuhoonyi bwoosi daawe; olwohuba ewaange haba siindiho neende esyohulya kata sa esy'ohwefwaala; haba simuchia ohuhuhola omweemeresi w'abaandu.”

⁸Olwohuba engisa yaakaanire Yerusalemu, haandi Buyudaaya sikwa; olwohuba enomanoma yaabwe neende ebiholwa byaabwe biyiingania Omwaami, bichalaasa oluyaali lwae.

⁹Ohukwiira olwaande lulala hwaabwe hwahabasihirise omusaango; bahola ebyonoono byaabwe neende esimyeeni koti aba Sodomu, haba sibabikisa daawe. Olwohuba abeene beteereho esiholwa sibi sino.

¹⁰Boolere abaluungifu muti byahabachiire bulai, olwohuba bahalye hu byaamo bitula hu bulai bwaabwe.

¹¹Chaakaanire abonooni! Ebibi bi bahola abasyaabwe, bichia ohubeeholehaho abeene.

¹²Abaandu baange bafwiinyirirwa neende abaana-bwaana, haandi abahasi nibo ababatuka. Eng'we abaandu baange, abeemeresi beeng'we babakosa, haandi babadoondobania baabatusa hu bwadyeeri.

¹³Omwaami amalire ohwetekeha ohuyaala omusaango kwae, yeemere ohuheengera abaandu bae omusaango.

¹⁴Omwaami achia ohuheengera abeemeresi neende abatuki b'abaandu bae omusaango n'aboola ati: “Niing'we abayaaya endalo ch'emisabbiibbu, haandi mu nyuumba cheeng'we mwechulamo ebiindu bi mwayaaya.”

¹⁵Mubeere mutye, eng'we ohunyooba abaandu baange, ohufwiinyirira abamanani nimubabonera? Omwaami Nasaae w'obunyala niye oboola.

¹⁶Omwaami yaboola ati: “Olwohuba abahasi bomu Yerusalemu bali neende esiyiingwa bakeende nibaniniisye amakosi haandi bamoka niboomere emoni, bakeenda nibahubba embiindo, ebbaangili nichichaangalya hu makulu kaabwe.”

¹⁷Omwaami achia ohubeka efwiiri hu bahasi bomu Yerusalemu, mani yaanihe alafu eby'obutye byaabwe.

¹⁸Hu ludaalo olwo, Omwaami achia ohutusa hu bahasi bomu Yerusalemu ebiindu binyirira ebikera nibesuunga, koti ebbaangili, ebitaambaya byohu mutwe, neende bibefwaala mu makosi;

¹⁹ebyuuma byomu sibuno, ebihomo, neende amaleeso;

²⁰ebitaambaya bi beeboya hu mitwe, neende ebihomo by'ehabi bi beeboya hu mahono, neende ebibi bi beeboya mu sibuno, ebikiingiro by'amafuta k'esing'aari, neende amayiriisi;

²¹engila chibefwaala hu mahono, neende engila chi betuunga hu moolu;

²²engubo ch'ebbei y'aakulu, ebibbuibbui bi beesukunaho, neende esao chibakiinga mu mahono,

²³engubo chilang'aalang'a, neende engubo ch'elaasi, neende ebitaambaya byohu mutwe, neende engubo ch'ohwebwiihirira.

²⁴Nae mu bweyaango bw'amafuta kawunya esing'aari, bachia ohuwunya esibolu; haandi mu bweyaango bw'olusibiro, bachia ohweboya omukoye; haandi mu bweyaango bw'efwiiri libachanuuwe bulai, bahabe ab'ebyoole; haandi mu bweyaango bw'engubo ndai, bahefwaale ebigunia; mu bweyaango bw'ohuboneha bulai, bahadiirwe esoni.

²⁵Nae abasaacha bomu Yerusalemu baheetwe neende engaanga haandi abasaacha beeng'we b'amaani bahafwiire mu biita.

²⁶Yerusalemu syeene syahabe koti omuhasi yi ngisa yidiirire haandi olira; niyehaale aasi n'abula obuchiiro.