Read saamia Yisaaya 31 Bible Online

Yisaaya 31 - saamia bible

Yisaaya 31

¹Chibaakaanire abo abachia Misiri ohukoonya obuhoonyi nibeesika efaraasi chayo! Abeesika ebigaari byayo olwohuba mbwe biingi nibyo haandi abeesika abeerusi b'efaraasi echio olwohuba mbwe b'amaani muno, nae haba sibesika Omwoolerefu wa Yisiraeli kata sa ohweteeba hu Omwaami!

²Nae omweene amanyire ati mukesi niye haandi niye oleeta amasira, haandi sachusa-chusa emboosi chaaba n'aboolere; nae achia ohusaandya abonooni, neende abo abahoonya abonooni abo.

³Abamisiri baandu sa, haba si Nasaae nibo daawe; haandi efaraasi chaabwe chifwa sa, haba simyooyo kitafwa. Omwaami niyahakolole omuhono kwae, ebyaalo by'amaani bihoonya byaheegumule, mani ababahoonya abo baakwa, mani boombi baasihirisirwa alala.

⁴Olwohuba Omwaami yamboolera ati, “Koti edalang'i oba edalang'i njere lu yiwuluhuma niyiitire esolo yayo, mani nibalaanga abaayi ohuyiseeta, edalang'i eyo haba siyitya nibayiyokerera kata sa neende nibayayulira mu amakono kaabwe kahiramo obuhoongo, mani nilwo lu Omwaami w'Obunyala achia ohwiiha ohulwaanira hu Lugulu lwa Siyooni neende hu sigulu syalwo.

⁵Koti luu yoni libeengera hu siyu syalyo ohuwonia obumwiinyu bwaalyo, nilwo lu Omwaami w'Obunyala achia ohuliinda Yerusalemu; achia ohusiliinda haandi asiwonie, achia ohusiyabina asiwonie.

⁶“Eng'we Abaisiraeli, niise yimwajeemera haandi yimuyiinganianga. Nae bulaanu mukaluuhane mukobole yiindi.

⁷Olwohuba oludaalo lwahoole lu buli muundu yahasukune eyale ebiloongaloongwe byae by'efeesa neende ebiloongaloongwe byae by'esaabbu, bi mahono kae kaholeraanga mu bwonooni bwae.

⁸“Abasiria baheeterwe olugaanga, nae haba sibaheetwe neende obunyala bw'abaandu; ohutusaho olugaanga lweene sa, ataali abaandu nilwo olwahabeete; mani Abasiria baheeruhe ebiita; haandi abaana baabwe baraaga bahawaambwe.

⁹Mani omutuki waabwe yibeesika yaheeruhe n'atiire, haandi abachweenufu bae bahatye muno mani baaleha ao ebbeendera yaabwe.” Omwaami yibeenamira mu Siyooni, haandi yibasaambira ebiyaanwa mu Yerusalemu, nilwo lu aboola.