Read saamia Yisaaya 33 Bible Online

Yisaaya 33 - saamia bible

Yisaaya 33

¹Chibaakanire, eng'we abasihirisi, nae eng'we beene haba simwasihiriswa; eng'we abahoba abasyeeng'we, nae abulao obahoba! Nimwahaakame ohusihirisa, ao niwo yi mwesi mwahasihiriswe. Haandi nimwahaakame ohuhobaanga abasyeeng'we, ao niwo yi mwesi bahabahobere.

²Ewe Omwaami, tukwire esisa; olwohuba hweesika ewe. Tuliindeenge buli buhya, neende mu biha by'ebidinyu.

³N'osiingira waatulwanira, ebyaalo biindi bisalaana, byeeruha hulw'embuungu yao y'ebiita.

⁴Ebiindu byamwo byahayaaywe, byahabuuswe alala koti lu masa kebuusaanga alala; koti luu sike chiduumakalaanga, nilwo lu baandu bahaduumakale nibayaaya ebiindu byoomu byaalo biindi.

⁵Omwaami akinisibwe, olwohuba niye otuka buli siindu. Yaheechuse mu Siyooni obwadyeeri neende obuluungifu;

⁶haandi mu ndaalo cheeng'we, yahateeo obuyenjeefu, yahawonieenge abaandu bae, haandi yahababereseenge amakesi neende ohumanya. Obuyiinda bwaabwe buhuluundu buli mu hutya Omwaami.

⁷Bone, abachweenufu baabwe bahalirire erwaanyi; bawamwaanda babatuma ohuteesa mbwe omuleembe kubeeo, balira muno amasika.

⁸Engira cha naahuluungu haba sichibitiha daawe, yibulao abalwaani bachibitaho. Endagaano chifunaakwe, abaloli balekeereswa, abulao owiiswamo oluyaali.

⁹Yibbulao olima eloba, esyaalo syadoong'a esihaya. Ebichaha bya Lebbanooni bihoohere; ehooho ly'eloba lai lya Saroni lyeeholere esiparara. Haandi mu Bbasani neende hu lugulu lwa Karimeeli, emisaala kibuluungusa amasaafu.

¹⁰Omwaami aboolera ebyaalo biindi ati, “Bulaanu omweene njia ohusiingira; njia ohweekesa koti luundi neende obunyala neende amaani.

¹¹Mutekeha ebiindu bitachia ohubahoonya, muhola ebitaalimo obuhoonyi; omuuya kumuyeera, muliro nikwo okwahabasihirise.

¹²Mani abaandu bahabe koti amakina kabasaambira mu tanuuru, bali koti amawa kabatemere, akamamuhira mu muliro.”

¹³Eng'we abali eyale, muwulire esiindu siiholere; neende eng'we abali aambi, mufukiirire koti luundi neende obunyala.

¹⁴Abahola-mbi abali mu Siyooni batiire; abo abateesa oluyaali mu Nasaae bakwiiremo oluteengo: “Wiina hweefwe onyala ohumenya neende omuliro kusihirisa? Wiina hweefwe onyala ohumenya neende omuliro kusaamba endaalo choosi?”

¹⁵Omuundu ohola ebiluungifu haandi olomaloma ebyadyeeri, oyo olekeeresera elalira engaanga yitula mu hufwiinyirira abaandu, owebwaabira elalira ohukuliirirwa, oteeyambaania neende abo abatekeha ohutemula abaandu haandi otatingaala ebiindu bitahoyerwa.

¹⁶Oyo niye ochia ohumenya abuundu w'oluyaali; abuundu wae w'ohweliindiramo yahabe obwoomu bwasitwa neende enyaanda; yahabe neende ebyohulya, neende amaachi k'ohung'wa haba sikahahayweyo.

¹⁷Mwahabone omutuki mu luyaali lwae; haandi bahabone esyaalo sihoongo esyoola eyale.

¹⁸Ebibaaso byeeng'we byahalekereseenge obuti bumwalichiingi nabwo nimweteeba muti: “Abo ababalaanga eseende neende abo abakerehaanga emisolo bali yeena? Abo abalengeseraanga hu minara bali yeena?”

¹⁹Haba simuchia ohubona abateende beepaaha, abaandu balomaloma olulimi lutaamanyihaane, abananaakira mu lulimi lu mutanyala ohuwulira.

²⁰Mutingaale Siyooni, esiko sy'ebidyaalo byeefwe! Muchia ohubona Yerusalemu, abuundu alai aw'ohumenyamo, yahabe koti eyeema elitanyaliha ohwiiywa, ebihoondo byaalyo ebitanyala ohwiiywa daawe, kata sa emikoye kyalyo kyaanyala ohuhalakwa.

²¹Nae eyo niyo yi Omwaami yahatwekesere oluyaali lwae. Mwahamenye abuundu w'emyaalo mihoongo neende emyaalo midiidi, mu maato katanyala ohubita, kata sa emeeri ch'abasuku chitanyala ohwaambuha.

²²Olwohuba Omwaami niye omuheengi w'emisaango, Omwaami niye otuberesa amalako, Omwaami niye omutuki weefwe; niye ochia ohutuwonia.

²³Emikoye kyaabwe kiboya nae haba sikinyala ohwomiisa daawe; haba sikinyala ohwomiisira omukutu abuundu wakwo, kata kyaaniha mu mbewo etaanga. Mani ebiindu byoosi eby'abasuku beefwe byaheehole omuyaayano kweefwe; kata abalema bosi bahayaaye.

²⁴Mani yahabuleo omuundu womu syaalo omwo kata mulala owahaboole ati, “Ndwaala”; abaandu bahabe eyo bahaleherwemo ebyonoono byaabwe byoosi.