Read saamia Yisaaya 35 Bible Online

Yisaaya 35 - saamia bible

Yisaaya 35

¹Esiparara neende esyaalo syoomu byahasangaale, sichiimi syahasangaale mani syaamuliha ebimuli; koti mu sichaha.

²Esiparara syahamulihe ebimuli biingi muno, sirisangaala nisyehoya haandi nisyeemba. Syahanyoole oluyaali lwa Lebbanooni. Esiparara syahabe esilai koti endalo cha Karimeeli neende Saroni. Abaandu boosi bahabone oluyaali lw'Omwaami, bahabone amaani neende obunyala bwa Nasaae weefwe.

³Dinyie amahono kataali neende amaani, haandi yomiise amahuumbo kateengereha.

⁴Boolere abo abaweeremo omwooyo muti, “Gume, mutatya daawe! Bone, Nasaae weeng'we achia ohwiicha ohubawabina, neende ohusaandya abasuku beeng'we. Achia ohwiicha mani abaonie.”

⁵Emoni ch'abawofu chahaliimbule, neende amatwi k'abadiimbe kaheekuhe.

⁶Omulema yahadumakale koti emboongo, haandi omuundu owayaanda olulimi yaheembe hulw'esangaalo. Olwohuba emyaalo ky'amaachi kyahasoohe mu siparara.

⁷Omusenye kusaamba mu siparara kwaheehole ediba ly'amaachi, haandi eloba lyoomu lyaheehole esulo ch'amaachi. Abuundu yi mabbwe kali nikamenyamo syahehole esa haandi obunyaasi bwaheehole amakada neende amadutu.

⁸Engira emaambali yahalimweyo, eyahalaangwe yiti, “Engira Njolerefu.” Abulao omuhola-mbi yeesi owahabite hu ngira eyo, haandi abasiru haba sibahayiloondeho.

⁹Edalang'i haba sichahabeeyo daawe, kata esolo njalaba haba sichahabiteengeho hu ngira eyo; haba sichahanyoolweyo, nae abo ba Omwaami anunuule, nibo abahayikeendereengeho.

¹⁰Mani abaandu ba Omwaami yahanunule nibo abahakobole, mani beecha mu Siyooni nibeemba. Bahabe neende esangaalo endaalo choosi pe. Bahasangaale haandi beehoya, mani engisa yaabwe neende ohweyendehera hwaabwe hwoosi hwahaweereo elalira.