Read saamia Yisaaya 39 Bible Online

Yisaaya 39 - saamia bible

Yisaaya 39

¹Mu biha ebyo, Merodakibaladaani, omwaana wa Bbaladaani, omutuki wa Bbabbilooni, yatuma bawamwaanda neende ebbarwa neende esiyaanwa ohuyirira Hesekia, olwohuba yali nawuliire koti lu yali nalwaalire haandi n'awonere.

²Mani Hesekia yaanirisa muno bawamwaanda ababileeta; mani yabeekesa eby'obuyiinda byomu nyuumba yae y'esibiihiro koti; efeesa, esaabbu, eby'esing'aari, amafuta k'ebbeyi y'aakulu, enyuumba yoosi yibabiihamo ebilwaaniso, neende buli siindu syoosi esyali mu nyuumba yae y'esibiihiro. Sibulao esiindu kata silala esyali mu nyuumba yae oba mu bwaami bwae bwoosi si Hesekia atabeekesa.

³Ao mani Yisaaya omunabbi yeecha eyiri Omutuki Hesekia, yaamuteeba ati, “Abasaacha abo baboolere siina syeene? Haandi batulire mu syaalo siina ohwiicha yooli?” Hesekia yakobolamo ati, Batulire mu syaalo sy'eyale ohwiicha yiindi. Batulire mu syaalo sya Bbabbilooni.

⁴Haandi Yisaaya yamuteeba ati, “Babweene siina syeene mu nyuumba yao?” Hesekia yakobolamo ati, “Babweene buli siindi siri mu nyuumba yaange; sibulao esiindu siri mu bibiihiro byaange si tabeekeese.”

⁵Ao Yisaaya yaboolera Hesekia ati, “Wulira Omwaami w'Obunyala sy'aboola:

⁶‘Bona, ebiha bichia ohwoola, ebiindu byoosi-byoosi ebiri mu dooho lyao lino, neende ebyo bi bakuukaao babiiha ohwoola buti, bachia ohubikiinga babiyire Bbabbilooni; sibulao esiindu sichia ohudoong'a muno.’

⁷Haandi hu basyaani bao beene, abo baweebula, bachia ohuyirwa; mani bahabalooye, bahalaabanire mu dooho ly'omutuki wa Bbabbilooni.”

⁸Mani omutuki Hesekia yaboolera Yisaaya ati, “Emboosi y'Omwaami yi wahalomaloma ndai niyo.” Olwohuba yabaasa ati, “Omuleembe kuchia ohubaao haandi ohulwaana haba sihuchia hubaao mu biha by'obulamu bwao.”