Read saamia Yisaaya 41 Bible Online

Yisaaya 41 - saamia bible

Yisaaya 41

¹Nasaae aboola ati, “Buleere mani mutekeerese, eng'we ebyaalo by'edoloondo! Mweetekehe ohuyaala omusaango kweeng'we mu kooti; muchia ohunyoola ebiha by'ohwelomalomaho. Mulehe hwebuuse alala huheengeo oyo owadyeeri.

²Wiina owalaanga omuundu owatuyiingira oyo ohutula ebukwe mani yaachia n'ayiingira buli abuundu yi yoola woosi?” Akaba ebyaalo bi ayingiire, mani abatuki hu banyale ohuba aasi wae; asihirisa neende olugaanga lwae, mani yaaleha abafwiire abaangi muno koti olufu, oluyiingo lwae lubasalaania baaba koti ebikoha.

³Aboongaho mani yabitao ataali obudinyu bwoosi, naabitira hu ngira yatabitiraangaho daawe.

⁴Wiina owakera sino syabaao, owabitekeha ohutula muhuchaaka? Niye Ese, Omwaami, otaangira, haandi Niise Oyo omaliirihayo.

⁵Abaandu b'edoloondo babona bi ndahola mani baatya, abaandu bomu byaalo by'eyale bateengereha; bebuusire alala mani beecha.

⁶Buli muundu ahoonya owaasye, mani yaboolera mwaanang'ina ati, “Guma!”

⁷Omubaachi agumya omuyitaanyi w'ebibya ati: weebale muno! Haandi oyo okwalaasa neende enyuundo asigumya neende emisumaari, nibaboolera owambaania bati, “Si huholere syali nisyo” mani nibasyomiisa neende emisumaari sihaye ohudeengaana.

⁸Nae ewe, Yisiraeli omuhalaabani waange, Yakabbo, yi ndedoolera, olwiibulo lwa Abburahamu, omwiicha waange.

⁹Ndahutusa hu njakamo y'esyaalo, mani ndahulaanga ni ndi hu soonda chaasyo ch'eyale muno, niihuboolera endi, “Niiwe omuhalaabani waange, omweene hudoolere mani haba siinjia huhusukuna daawe.

¹⁰Otatya daawe, olwohuba ndi naawe. Oteyendeherera daawe, olwohuba niise Nasaae wao. Njia ohuhuberesa amaani, haandi njia ohuhuhoonya. Njia ohuhusiira neende omuhono kwaange muluungi mani huwonie.

¹¹Bona, abo boosi abahunyoolerera bahadiirwe esoni mani bayiingirwa. Neende abo abahulwaanisa bahamalweo haandi basihiriswa.

¹²Wahakoonye abo abahuyiingania, nae haba siwahabanyooleho daawe; abo abahulwaania baaba abasuku bao bahasihiriswe mani bawerao elalira.

¹³Olwohuba ese, Omwaami Nasaae wao Niise huberesa amaani; haandi niise ohuboolera endi, ‘Otatya daawe, njia ohuhuhoonya.’

¹⁴Omwaami aboola ati, ‘Kata amwahaba abadiidi haandi abakata, eng'we abasaacha ba Yisiraeli, mutatya! Njia ohubahoonya; Omuwonia weeng'we niye Omwoolerefu wa Yisiraeli.

¹⁵Bona, njia ohuhuhola omuhubbakiro, kusisiiri omuyaaha, omwooki, haandi okusisiiri neende obwooki.’ Ochia ohuhubbaka engulu mani ochisihirise; obugulu bwaheehole olufu.

¹⁶Wahabisereeche omuyaka kwabidumuula, mani esiifuusye syabisalaania. Mani ochia ohwehoyera mu Omwaami; oluyaali lwao lwahabe mu Omwoolerefu wa Yisiraeli.

¹⁷Abamanani neende abali mu ngisa nibahakoonye amaachi, baahaya ohukanyoola, emimiro kyaabwe kyooma olw'obuluwo, ese Omwaami, njia ohuwulira ohwekongooya hwaabwe, Ese, Nasaae wa Yisiraeli haba siinjia hubajwaang'a daawe.

¹⁸Emyaalo kyahasoohe ohutula mu bigulu byoomu, haandi ndahateeo esulo mu mahooho. Ndahahole esiparara syaaba esidiba sy'amaachi, haandi eloba lyoomu lyaaba esulo ch'amaachi.

¹⁹Ndahamese mu siparara emisaala mihuyu, emiseengese, emiritole, neende emisaala miseituuni; mu loba lyoomu ndahamesemo ebichaha by'emisaala, ebichaha by'emipaini neende emiyunipa haandi neende emisaipuraasi.

²⁰Ao mani abaandu bahabone haandi baamanya haandi babaasa mani baamanyira elalira, bati, Ese Omwaami, Niise oholere sino, haandi koti Ese Omwoolerefu wa Yisiraeli, Niise owasitaao.”

²¹Omwaami, Omutuki wa Yakobbo aboola ati, “Eng'we banasaae b'ebyaalo biindi, muleete omusaango okwohwekanyiirisa hweeng'we. Muleete ohwekanyiirisa huhiramo amaani.

²²Lehe baleete ohwekanyiirisa ohwo, mani batuboolereho ebyahakweeo.” Mutuboolere ebiindu byabaao hale, mani mutuboolere amahuluundu kabyo, hubibaaseho haandi hunyale ohumanya ebyahabitulemo; kata sa tuboolere ebiindu byahakweeo mu biha biicha.

²³Tuboolere ebiindu byahakweeo mu biha byomuumoni, mani hunyale ohumanya huti muli banasaae. Mubeeho neende esiindu silai, kata sa esyonoono si muhola, hu hunyale ohutya neende ohweyendeehera.

²⁴Bone, eng'we abeene mubulamo esiindu, haandi ebiindu bi muhola, mubulamo esiindu; haandi omuundu oheengao ohubahalaabanira, ahola sa esy'omusiro.

²⁵Ndadoola omusaacha otula emukulu, mani nguyo yoolere. Atula ebukwe, haandi yahalaange eliita lyaange. Yahaseenakire abatuki, koti oseenakira edosi, haandi koti omuloongi w'endamu anyooba eloba.

²⁶Wiina mweene hweeng'we owali nasilaanga ohutula hale, mani hu nyale ohumanya. Haandi hweeng'we, wiina owali nasilomalomeho nisitabaao, mani hu hunyale ohuboola huti, “Wadyeeri niye”? Yibulao hweeng'we owasiboola, haandi abulao owasilomalomaho, abulao owawulira emboosi cheeng'we.

²⁷Ese Omwaami, ese niise owataangira ohusiboolera Siyooni mani ndaatuma bawamwaanda ohuboolera Yerusalemu emboosi ndai.

²⁸Nae nitingaala hu basuku baange, haba simbonamo oli neende esy'ohuboola daawe; haandi mwaabo, yibulamo onyala ohukeraka haandi buli yiteeba esiteebo, abulao owungobolamo.

²⁹Bone, banasaae bano boosi, abulao oli neende obuhoonyi; sibulao esiindu sibanyala ohuhola. Ebiloongaloongwe byaabwe ebitaanywa, ni emboo ehaya, bibulamo amahuluundu.