Read saamia Yisaaya 43 Bible Online

Yisaaya 43 - saamia bible

Yisaaya 43

¹Nae bulaanu Ewe Yakobbo, Omwaami oyo owahuloonga, Ewe Yisiraeli, Omwaami oyo owahuhola, aboola ati, “Otatya daawe, olwohuba ese hununuule; hukuliihe eliita lyao lyeene, mani oli owaange.

²Niwahabe niwaambuha amaachi k'ebusiba, ndahabe alala naawe, haandi emyaalo ki wahaambuhe kyoosi, haba si kyahahusihirise daawe. Niwahabiteenge mu muliro kwosi, haba sikwahahusaambeenge daawe, kata sa enjeserye chakwo haba sichahahusihiriseenge daawe.

³Olwohuba niise Omwaami Nasaae wao, Omwoolerefu wa Yisiraeli, Omuwonia wao. Nyaanayo Misiri koti esiyaanwa syohuhununula, ndaberesayo Etiopia neende Sebba mu bweyaango bwao.

⁴Olwohuba oli ow'engaanga y'aakulu mu moni waange, ow'oluyaali, haandi ndahuheera muno, mani sakira hukulaasaniamo ebyaalo biindi hulwao, haandi ngulaasaniamo abaandu baandi ohuwonia obulamu bwao.

⁵Otatya daawe, olwohuba ndi naawe; njia ohubuusa alala abaandu bao, mani mbaleete nimbatusa ebukwe, neende emuumbo.

⁶Njia ohuboolera ab'emukulu endi, ‘Lehuule’ neende ab'emwaalo endi, ‘Mutabahayiraho’. Leete abaandu baange basaacha ohutula eyale neende abaandu baange bahasi ohutula hu njakamo y'esyaalo.

⁷Njia ohulaanga buli muundu hu abo, olwohuba n'amala ohumukuliha eliita lyae, ndamuloonga ohumuberesa oluyaali, ndahuhola haandi ndahutaao hulw'esyeene sino.”

⁸Omwaami aboola ati, “Leete abaandu baange bayaaswe omusaango. Bali neende emoni, nae haba sibabona, bali neende amatwi, nae haba sibawulira!

⁹Lehe ebyaalo byoosi biiche, mani lehe abaandu bebuuse alala. Wiina mweene hu banasaae baabwe onyala ohutuboolera ebiindu bichia ohukwaao, haandi yaatweekesa ebiindu byaliwo hale? Lehe baleete abaloli baabwe ohwomiisa bati nibo abadyeeri, haandi lehe baboole bati ebiindu bibawulira byadyeeri byeene.”

¹⁰Omwaami aboola ati, “Eng'we Abaisiraeli, niing'we abaloli baange,” “Haandi niing'we abahalaabani baange baandedoolera omweene, hu munyale ohuumanya neende ohufukiirira haandi mumanya muti Niise Ese. Abulao nasaae wuundi owataangira ohubaao, kose haandi yichia hubaao nasaae wuundi owiicha enyuma waange.

¹¹Ese syeeng'ene, Niise Omwaami, haandi yibulao Omuwonia wuundi, ohumalaho Ese.

¹²Mboola ebyahabeeo haandi niise obawonia haandi ndalaangirira, abulao nasaae wuundi owali naaholereho atyo daawe. Eng'we niing'we abaloli baange.” Ese Omwaami niise oboolere.

¹³“Niise Nasaae, haandi buli ludaalo Niise Ese. Abulao onyala ohweetusa mu bunyala bwaange. Buli siindu siihola, abulao onyala ohusikaluuhania.”

¹⁴Omwaami Omuwonia weeng'we, haandi Omwoolerefu wa Yisiraeli aboola ati: “Olwohubawonia eng'we, njia ohusiindiha eye ohuseeta Bbabbilooni. Ndahafunake ebichuma biikala ebiruwa byaabwe ebyo, haandi ohuhuumula hw'Abakaludaya ohubeere ohw'esangaalo, hwahehole ohuubba embuungu.

¹⁵Niise Omwaami, Omwoolerefu weeng'we Mweene, Omuloongi wa Yisiraeli, haandi Omutuki weeng'we.”

¹⁶Hale Omwaami yaholaho engira mu nyaanja, haandi yaata omuhoosi mu maachi k'amaani.

¹⁷Yasihirisa eye hoongo ely'abasikaari abali neende ebigaari neende efaraasi. Bakwa aasi, mani byabahayira elalira ohusiingira, mani boosi baasihamira elalira mu maachi, koti olutaambi lw'etaara lwahasima.

¹⁸Omwaami oyo aboola ati: “Mutatingaala hu biindu bya hale, kata sa mwabaasa hu biindu byaliwo mu ndaalo cha hale.”

¹⁹Bone, ndi ohuhola esiindu siyaaha; mbano njaakire ohusihola hale. Kata eng'we nimusiiri ohusibona daawe? Njia ohutaao engira mu sichiimi neende emyaalo mu sichiimi.

²⁰Esolo ndeende chichia ohunjisamo oluyaali, amabbwe neende embuuni byahaanginie; olwohuba ese ngeraanga amaachi kaba mu siparara, haandi emyaalo nikihulukusa mu siparara, ohuberesa abaandu baange badoole amaachi k'ohung'wa.

²¹Abo nibo abaandu baange. Baange ese mweene ndeeholera balaangirire efuma yaange.

²²Omwaami aboola ati: “Ewe Yakobbo, haba siniiwe owanaanga daawe; nae ewe Yisiraeli, obeere nimwasinyiha.

²³Haba simundeeteraanga amakoondi keeng'we koti ebiyaanwa bisaambwa, kata sa mwaanjisamo oluyaali neende ebiyaanwa byeeng'we.” Ese haba simbasabaanga neende amaani ohunyaanira ebiyaanwa byeeng'we daawe, haandi siimbajoong'iaanga nimbasabirisa obubbaani.

²⁴Eng'we haba simunyaaniraanga sa eseende ch'ohukula emikachi chinyunyuula ohunyaanya sa daawe, kata oti mwaambitiirisa neende amasinya k'ebisolo byeeng'we daawe. Nae eng'we mwandwiiha sa ebyonoono byeeng'we daawe, mwanjoong'ia neende ebyonoono byeeng'we.

²⁵Nae ese, Niise oyo oleheramo ebyonoono byeeng'we hulwaange ese omweene, haandi haba siinjia hukobolayo ohwiichulisaanga ebyonoono byeeng'we bbe.

²⁶Leha hwiichulisanieho, mani huwosesanie fweembi omusaango; mwewoseho, mani mweekese koti lu muli abadyeeri.

²⁷Bakuuka yeeng'we nibo abataangira ohuholaanga ebyonoono, haandi abeekesa beeng'we nibo abaholaanga ebyonoono ebyahiraangamo ohunyoolesa.

²⁸Mani sakira ese njia ohumala oluyaali mu abo abaliindaanga obweyaango bwoolerefu. Ndayaanayo Yakobbo ohusihirisirwa elalira njakamye Yisiraeli ohunyekwaanga.