Read saamia Yisaaya 49 Bible Online

Yisaaya 49 - saamia bible

Yisaaya 49

¹Eng'we ebyaalo by'eyale, mutekeerese bi mboola, muteke amatwi, eng'we abaandu b'eyale. Omwaami yanaanga nisisiiri ohwiibulwa, yanaanga eliita nisisiiri mu nda ya maama.

²Yahola emboosi chaange chaaba koti olugaanga lwooki, yaangisa mu siiniha sy'omumabaya kae. Yahola ahasaale hawaakale, mani yaangisa mu sikiingiro syae.

³Mani yamboolera ati, “Yisiraeli, niiwe omuhalaabani waange, yiinjia ohunyoleramo oluyaali.”

⁴Nae ese ndaboola endi, “Ndidiihaniire buhaya, amaani kaange kambweeramo buhaya. Nae mubwadyeeri bweene, Omwaami niye omanyire obudinyu bwaange, haandi niye oliimberesaho omukabo kwaange.”

⁵Mani bulaanu Omwaami aboola ati, oyo owaahola ndaaba omuhalaabani wae nisisiiri mu nda, ohumukoboserayo ab'olwiibulo lwa Yakobbo, haandi ati mubuusire alala Abaisiraeli basalaana. Olwohuba ese ndanyoola oluyaali mu moni w'Omwaami, haandi Nasaae waange niye amaani kaange.

⁶Mani Omwaami oyo yamboolera ati, “Haba sisihumala ewe ohuba omuhalaabani waange ohutaao oluyaali lw'abanaluyia ba Yakobbo neende ohukobosao Abaisiraeli bawonereo; haandi njia ohuhuhola ohuba obulafu bw'ebyaalo biindi, mani hu buwonia bwaange bunyale ohwoola hu njakamo y'esyaalo.”

⁷Omwaami Omununusi haandi Omwoolerefu wa Yisiraeli, aboolera oyo yi baandu balekeeresa, haandi yi byaalo byasyuula, haandi omuhalaabani w'abatuki ati, “Abatuki bahahubone mani nibasiingira ohuhwiisamo oluyaali; abachweenufu bahahubone, mani bahwiinamire; olwohuba Omwaami mweesikwa niye, haandi Omwoolerefu Mweene wa Yisiraeli, niye ohudoolere.”

⁸Omwaami aboola ati, “Ndahuwulira mu biha by'ohuhukwiira esisa, mani nihuhoonya hu ludaalo lw'obuwonia. Ndahuliinda mani nihuwabina obe koti endagaano yaange eyiri abaandu. Njia ohuhuleha obe mu muleembe mu syaalo, mani haandi ochaake ohukabulamo ebituundu byasyo ebyalehwao ao bityo,

⁹noboola oti, ‘Mutule mu jeela,’ haandi eyiri abo abali mu siirima oti, ‘Mwiiche mu bulafu.’ Bahabe koti amakoondi akanyoola ebyohulya hu ngira yikabitiraho, haandi akali neende obwayiro bwaako hu ngulu ndeeyi chiboneha.

¹⁰Enjala haba siyichia hubaluma daawe, kata sa obuluwo. Omubasu neende omuyaka kusaamba haba sibyahabahole esibi syoosi, olwohuba Oyo obakwiira esisa yahabeemereremo, mani yaboosa hu sulo ch'amaachi.

¹¹“Mani njia ohutaao engira mu ngulu chaange choosi, engira chaange hoongo ndahachiniinie aakulu.

¹²Bone, abaandu baange bahatule eyale, haandi bone, bano bahatule emukulu neende emuumbo, haandi abaandi bahatule mu syaalo sya Sinimu.”

¹³Yemba hulw'esangaalo, ewe ekulu, haandi wehoye, ewe esyaalo. Mutuleyo, mani muchaake ohweemba, eng'we engulu! Olwohuba Omwaami alemiisye emyooyo ky'abaandu bae, haandi achia ohukwiira esisa abaandu bae basaandisibwa.

¹⁴Nae esiko sya Siyooni musiboolere muti, “Omwaami yanjwaang'ire, Omwaami waange yaanjibiriire.”

¹⁵“Omuhasi anyala ohwiibirira omwaana wae onuuna, yaahaya ohuheera omwaana wae yi yeebula? Nae kata abahasi banyala ohwiibirira abaana baabwe, nae Ese haba sihwiibiriraangaho daawe.

¹⁶Ewe esiko sya Siyooni, bona, ese hubaachire koti esifwaanani mu syaaba sy'omuhono kwaange; ebida byao biri mu moni waange buli siha.

¹⁷Abaandu bahahwoombahe buyaaha bahira abahusihirisa, haandi abakera waaba ekuunda bamala hale ohuwaao baahuleha.

¹⁸Mani ewe siingisa emoni chao otingaale hu nyaande choosi mani obone; abo boosi abali ohwebuusa alala, beeche yooli. Ese Omwaami, koti luundi omulamu, mboola endi, ochia ohubefwaala koti engubo ch'engaanga, ochia ohubefwaala koti lu mweeya yaheehoyera mu ngubo ching'enaang'ena.

¹⁹“Mubwadyeeri esyaalo esyo syali nisisihire haandi nisyeholere ekuunda esyaalo syao esyo ese nisyeebwaabire, nae bulaanu syahabe esidiiyifu esitayeramo abaandu basyo ohusimenyamo. Haandi abo abaleha bahusihirisa bahahwebwaabe mani bahweyaaba.

²⁰Abaana beebulwa mu biha by'obuboye bwao bahaboole ludaalo olwo bati, ‘Esyaalo si hulimo sino sidiiyifu muno, haba sisitumala daawe; sitabuuse hunyoole obweyaango bwohumenyamo nihweyaaka.’

²¹Ao mani wahaboole mu mwooyo kwao oti: ‘Wiina mweene owanjibulira bano boosi? Ndafwiirwa abaana mani ndadoong'a syeeng'ene, ndali mu buboye mani ndeeruswa ebihaya ndawaao. Nae wiina mweene oweebula abaana bano? Bone, ese ndali nindadoong'a syeeng'ene deenguliru; nae bano boosi batulire yeena?’”

²²Omwaami Nasaae ow'Obunyala bwoosi aboola ati: “Bone, ndahasiingise omuhuno kwaange eyiri abateende, mani ndaniinia ahalolero haange eyiri abaandu. Bahaleete abaana baabwe nibabaakaate mu birifu byaabwe, haandi abahaana baabwe nibahakiingiirwe hu mabeka.

²³Abatuki nibo abahabaliinde koti balaata yeeng'we, haandi abahasi b'abatuki nibo abahabaliinde koti bang'ineeng'we. Baheename mu moni weeng'we nibabeesamo oluyaali, nibahoomba olufu lwohu makulu keeng'we. Ao mani niwo yimwahamanyire muti ese Niise Omwaami; haandi buli owuniinda ohumuhoonya haba siyahadiirwe esoni daawe.”

²⁴Omusikaari w'amaani, onyala mani ohumutusaho ebiindu bi ayaayire, kose ohwaabina owudiirirwe ohumutusa mu mahono k'omusikaari mwaalaba?

²⁵Mubwadyeeri bweene, Omwaami aboola ati: “Kata abawaambe b'omusikaari w'amaani achia ohuyirwa, haandi ebipeeye by'omusikaari mwaalaba bichia ohuwaabinwa. Olwohuba njia ohulwaania oyo obalwaania, haandi njia ohuwonia abaana beeng'we.

²⁶Njia ohukera abo ababafwiinyirira beetane abeene-na-beene, bahameere neende obumeesi bw'amabaanga kaabwe keene koti lu bahameere neende efiini. Mani ao abaandu boosi bahamanye bati, Niise Omwaami, Omuwonia weeng'we, haandi Omununusi weeng'we, ow'Obunyala Mweene wa Yakobbo.”