Read saamia Yisaaya 5 Bible Online

Yisaaya 5 - saamia bible

Yisaaya 5

¹Leha nyembere omwiicha waange olweembo lw'obuheeri oludiira hu ndalo yae y'emisabbiibbu: Omwiicha waange yali neende endalo y'emisabbiibbu hu sigulu sy'eloba lai muno.

²Yayilima bulai muno, yadoolamo amakina, yaayitaakamo emisabbiibbu milai muno. Mani akatikaati wayo yoombahao omunara kw'ohuliindiramo, haandi yaayabamo esinyuhiro sy'emisabbiibbu. Mani n'asuubira ati yichia ohumwaamira emisabbiibbu milai, nae yaamamo emisabbiibbu mibi chomu siino.

³Bulaanu, eng'we abaandu bomu Yerusalemu neende abomu Buyudaaya, mbekongooya muheengeo omusaango akatikaati waange neende endalo y'emisabbiibbu yaange.

⁴Siina syeene siindi sindahaholeere endalo yaange y'emisabbiibbu yino, si ndahaya ohuhola? Lwasiina yaama emisabbiibbu mibi chomu siino, mu esiha syohwaama emisabbiibbu milai?

⁵Bulaanu lehe mbeekese esiindu siinjia ohuholera endalo yaange y'emisabbiibbu yino. Njia ohumalao olukaka lwayo, mani ebisolo biyirye. Njia ohulikula esida syayebodoohania, mani ebisolo biyiseenakire.

⁶Njia ohuyileha yisihe; haba siinjia huhalakiraanga emisabbiibbu oba ohwakaangamo daawe. Mani oluyoongo neende amawa nibyo ebyahamereengemo; haandi njia ohulagira amaleesi kahaye ohukwiisamo efula.

⁷Endalo y'emisabbiibbu y'Omwaami w'Obunyala niyo esyaalo sya Yisiraeli, haandi abaandu ba Buyudaaya nibo ebirime bi yataaka ohumusangaasa. Mani yabasuubiramo ohuhola eby'obwadyeeri, nae bone, bahola ebyobusuku sa; yabasuubiramo ohuhola ebiluungifu, nae bone, bahola ebirisya abaandu amasika!

⁸Chibaakaanire, eng'we abakula enyuumba ohumeeda hu echo chi muli nacho, haandi abameeda emikuunda hu ekyo kimuli nakyo, mbwe ohwoola lu mumalao buli bweyaango, mbwe mudoong'e nimumenyere mweeng'ene mu syaalo syoosi.

⁹Mbuliire Omwaami w'Obunyala niyechuba n'aboola ati: “Mubwadyeeri bweene, enyuumba nyiingi chino chichia ohulehwa, enyuumba hoongo echio haandi endai, abulao omuundu yahachimenyemo kata.”

¹⁰Olwohuba endalo y'emisabbiibbu eya hekiteya ehumi, yahatuleengemo elita chitaanu-na-chidatu ech'efiini choong'ene, haandi elita emia ndala neende amahumi kataanu-na-kadatu (180) y'emisabbiibbu syahatuleengemo esideru silala syoong'ene.

¹¹Chibaakaanire, abo abawuuna ohusiingira echuli-chuli, nibakoonya ebyohung'wa bimeesa, mani baang'wa ohwoola engoloobe ohwoola lu malwa kabalalusa!

¹²Hu bidyaalo byaabwe huliho endoongo neende obuhana, amalere neende ebiriri neende amalwa; nae haba sibadeeba hu biindu bi Omwaami ohola, kata ohubonaho omulimo kw'amahono kae.

¹³Mani sakira abaandu baange bachia ohuyirwa mu jeela nisibulao esiindu si baholere. Abaandu bahunuufu baabwe ohufwiichaanga enjala, haandi abaandu baabwe abaangi bachia ohufwiichaanga obuluwo sa.

¹⁴Mani sakira emakoombe yibekoomba mani yaasamia eminwa kyayo ohubamira mani abahunuufu bomu Yerusalemu neende abaandu baabwe abahubba oluyoka boosi bahehirire mu makoombe omwo.

¹⁵Buli muundu yahadiirwe esoni kata neende abo abehuduumbasaanga boosi bahaloongoyaswe.

¹⁶Nae Omwaami w'Obunyala, yahakinisibwe mu huheengera abaandu omusaango mubwadyeeri, haandi Nasaae Mwoolerefu omweene yaheekese obwoolerefu n'ahola ebiluungifu.

¹⁷Mani amakoondi madoto kahaayire mu byaayiro byako, emoosi neende emeeme byahaayire mu makuunda.

¹⁸Chibaakaanire abo abeekachakachania mu bibi byaabwe neende emikoye ky'obubacha, abo abahwehwesana neende ebyonoono byaabwe koti abahwehweesa ebigaari neende emikoye,

¹⁹abo ababoola bati: “Leha Omwaami yanguyeho mani hunyale ohubonaho esiindu syaachia ohuhola; leha esichiiririrwa sy'Omwoolerefu wa Yisiraeli sisude aambi, mani leha syoolerere, mani hunyale ohusimanya!”

²⁰Chibaakaanire abo abalaanga esyonoono ohuba esilai haandi esilai basilaanga ohuba esyonoono, abo abaleeta esiirima mu siha sy'obulafu haandi obulafu mu siha sy'esiirima, abaleeta ebihahaata mu siha sy'ebinyunyuula haandi ebinyunyuula mu siha sy'ebihahaata.

²¹Chibaakaanire abo abebaasa abeene bati bakesi-kesi, haandi abeefumia abeene bati nibo bamanyire buli siindu!

²²Chibaakaanire abo abamanyihaane bati bang'wi b'amalwa, haandi abamanyihaane mu husaasa amalwa akameesa muno,

²³abo abakuliirirwa mani baalehuula abonooni beweerao, nae bahaya ohudeebaho hu baandu babulaho omusaango mani baabaholera ebibahoyera!

²⁴Mani sakira, koti lu muliro mudiidi kusaamba olusaambu, haandi lu bunyaasi bumirihira mu muliro kwaaduha, nilwo lu biindu bibeesika byahabe koti ebyabola, haandi bi bahola byahadumuuhe koti olufu olwohuba bekaana amalako k'Omwaami w'Obunyala, haandi baalekeeresa emboosi y'Omwoolerefu wa Yisiraeli.

²⁵Mani sakira etima ly'Omwaami lyasiingirira hu baandu bae, haandi yakolola omuhono kwae ohubasaandya, mani engulu chaadengaana; haandi emilaambo ky'abaandu beetwa kyaaba koti ebikoha akatikaati w'engira ch'ebiko byaabwe. Olwohuba ebiindu bino byoosi haba sibyamalao etima lyae haandi yadoong'a sa n'akoloole omuhono kwae.

²⁶Omwaami achia ohweekesa ahalolero esyaalo sy'eyale muno, achia ohusilaanga ohutula hu njakamo y'esyaalo; mani bone, syosi sichia ohwaanguya muno ohwiicha yi muli!

²⁷Mwaabo, abulao ojoong'a, abulao odandaakira, abulao okuunuha oba okona, eminyororo kibeeboya haba sikinyikuha daawe, kata eesya ch'ebiraato byaabwe chahaliha daawe.

²⁸Obusaale bwaabwe bwooki nibwo, obuyiingo bwaabwe bwosi bweng'aada, ebirekeyi by'efaraasi chaabwe byoomeranu koti amakina, haandi emikuruduumu ky'ebigaari byaabwe kyeebodoohania koti esiifuusye.

²⁹Ohuwoola hwaachio huli koti ohw'edalang'i, koti edalang'i ndoto lu chiwoola; nichidiirire esisolo sichidiirire, nichisihwehwesa, nae abulao onyala ohuchiwaabina.

³⁰Oludaalo olwo nilwahoole, bahawoolere hu Yisiraeli, koti ohuwoola hw'enyaanja. Omuundu niyahatingaaleho hu syaalo esyo, bone, yahabone esiirima neende amasira; mani ebireesi bimali byahakaire omubasu ohufwa.