Read saamia Yisaaya 51 Bible Online

Yisaaya 51 - saamia bible

Yisaaya 51

¹Omwaami aboola ati, “Tekeerese bi mboola eng'we abadaha ohuwonisibwa, eng'we abakoonya Omwaami. Baase hu lwaanda lumwabaachwamo, neende hu siroombe sy'amakina simwayabwamo.

²Baase hu Abburahamu kuuka yeeng'we neende hu Saara, ababeebula. Olwohuba nindamulaanga, yali naali yeeng'ene nataali neende omwaana yeesi, mani nimuberesa ehabi niinyingiya olwiibulo lwae.

³Omwaami achia ohulemya Siyooni omwooyo; achia ohulemya emyooyo ky'abo boosi abamenya mu omukuunda kwasyo. Mani esiparara syasyo sibe koti omukuunda kwa Edeni, haandi esiparara syasyo sibe koti endalo y'Omwaami yeene. Esangaalo neende omwehoyo nibyo ebyahabeeo, ohweebasa neende ekono ly'ohweemba.

⁴“Tekeerese bi mboola, eng'we abaandu baange. Eng'we esyaalo syaange, muteke amatwi. Njia ohutaao amalako kaange, mani obwadyeeri bwaange buchia ohuleetera abaandu obulafu.

⁵Njia ohwiicha bwaangu muno ohubanunula, ebiha by'ohuyiingiri hwaange bisudire aambi. Ese Omweene Niise ochia ohutuka abaandu baange. Ebyaalo by'eyale biniindire njiche, mani biniindire neende esuubi ohubiwonia.

⁶Tingaale aakulu hu kulu, haandi tingaale aasi, hu syaalo. Olwohuba ekulu lichia ohuhamyuuhao koti omwoosi, haandi esyaalo syahakofule koti engubo, mani abayimenyamo nilwo lu bahafwe batyo koti embeba. Nae obuwonia bwaange bulidoong'ao endaalo choosi, haandi obununusi bwaange haba sibwahakame daawe.

⁷“Tekeerese bi mboola, eng'we abamanyire obuluungifu, haandi abaliinda amalako kaange mu myooyo kyeeng'we. Mutatichaanga abaandu nibabadyaabuhira, haandi mutawechaangamo omwooyo abaandu nibabanyeka.

⁸Olwohuba amasiriri kachia ohubalya koti lu kalya engubo, haandi enyeende chahabalye koti achahalya epaamba. Nae obununusi bwaange bulidoong'ao endaalo choosi, haandi obuwonia bwaange bw'endaalo choosi pe.”

⁹Siingira Ewe Omwaami, siingira otuhoonye. Ewe Omwaami, wehoonyere obunyala bwao otuwonie! Bwehoonyere koti lu wabwehoonyera mu ndaalo cha hale, mu biha bya hale muno ebyabita. Niiwe owatematemamo Rahabbu esisyuuhira-banaabi, Niiwe owafumitafumita okusyuhira banaabi okwo.

¹⁰Ewe niiwe owahamya enyaanja, amaachi k'ebusiba maangi; niiwe owaterao abaandu boonunuule engira mu nyaanja oyohwambuhiraho.

¹¹Mani Ewe Omwaami, abaandu b'onunuule bahakobole, haandi bahakobole mu Siyooni nibeemba hulw'esangaalo.

¹²Omwaami aboola ati, “Ese, Niise oyo obalemya emyooyo; mani lwasiina mutya omuundu-buundu olifwa sa, omwaana w'omuundu oli sa koti obunyaasi?

¹³Mwiibiriire Omwaami Omuloongi weeng'we, oyo owabaamba ekulu haandi n'ataao emisiingi ky'esyaalo? Lwasiina wemeeda ohutya oludaalo lwoosi olwohuba obwaalaba bw'oyo ohufwiinyirira, niyetekeha ohuhusihirisa? Mani bulaanu obwaalaba bw'oyo ohufwiinyirira buli yeena?

¹⁴Oyo owawaambwa haandi ofwiinyirirwa ali aambi ohulehuulwa. Haba saachia hufwa yeehe emakoombe daawe, haandi saachia huhaywa esyohulya.

¹⁵Olwohuba Ese Omwaami Nasaae weeng'we, odubuula enyaanja mani efwiinda cheeya, Omwaami w'Obunyala nilyo eliita lyaange.

¹⁶Ndeere emboosi chaange muuhanwa mwao, mani niihukisa mu siiniha sy'omuhono kwaange. Ndabaamba ekulu, mani ndataao omusiingi kw'esyaalo, mani ndi ohuboolera abomu Siyooni endi, ‘Niing'we abaandu baange.’ ”

¹⁷Simuha omweene, simuha omweene, siingira weeme, ewe Yerusalemu. Wang'wa esikoombe syohusaanda ohutula eyiri Omwaami esikoombe sy'etima lyae, wang'wa neende amachehe keene mani nisihuleetera ohudokaana.

¹⁸Mu baana bao baweebula, abulao ohwemereramo daawe; haandi mwaabo bawahusa, yibulamo ohudiira hu muhono.

¹⁹Amasira amahabi kabiri kahukwiireho wiina onaahulemye omwooyo? Esyaalo syao sinyaasirwe neende ebiita mani syasihiriswa, abaandu bao baafwa enjala haandi beetwa neende olugaanga. Wiina mweene onaahulemye omwooyo?

²⁰Abaandu bao bakwiiremo oluteengo mani bawuleera, beyaliise aasi wa buli soonda y'engira. Bali koti emboongo yiyaambiiswe mu muteego kw'omuyiimi. Bawuliire amaani k'obwaalaba bw'Omwaami, egiili ya Nasaae weeng'we.

²¹Mani sakira wulire sino, eng'we abasaanda, mani mwadokaana, nae nimutang'weere amalwa.

²²Omwaami weeng'we, Omwaami Nasaae weeng'we, owabina abaandu bae aboola ati: “Bone, ndusire mu mahono keeng'we esikoombe syohudokaana; ebbakuli y'etima lyaange. Haba simuchia husing'wa mani sibaleetere ohudokanaanga haandi.

²³Esikoombe esyo njia ohusita mu mahono k'abo ababasaandyaanga, abo abababoolera bati: ‘Mweyalise aasi hunyale ohubabitaho nihuwaao;’ mani eng'we nimutaao emikoongo kyeeng'we nikiba koti eloba neende engira yi abo babitaho haandi yibakeenderaho.”