Read saamia Yisaaya 54 Bible Online

Yisaaya 54 - saamia bible

Yisaaya 54

¹Omwaami aboola ati, “Ewe Yerusalemu, obeere koti omuhasi mukuumba, oteebulaangaho omwaana yeesi, nae bulaanu siingira weembe hulw'esangaalo haandi ohuumulire aakulu, haba sowuliraangaho obuchuuni bw'engasi! Olwohuba ochia ohwiibula abaana baangi ohuhira omuhasi yi wamwe atalehaangaho yeeng'ene daawe.

²Baambaliya eyeema lyao, mani olehe engubo chomu nyuumba yao chideembe haandi chibaambuluhe; oteembikitania, nae kaangulula emikoye kibe emileeyi mani womiise ebihoondo byaalyo.”

³Olwohuba enjaho ch'esyaalo syao chichia ohubaambaliya enyaande choosi. Haandi olwiibulo lwao ohweekobosera esyaalo si baandu b'ebyaalo biindi bali nibamenyamo. Mani ebiko byali nibyeehola ekuunda, bichia ohwiichulamo abaandu.

⁴Otatya daawe, olwohuba haandi siwahaweemo oluyaali daawe; oteyendehera daawe, olwohuba esoni haba sichahahudiireho haandi. Oliibirira esoni ch'omuburaaga bwao, haandi oliibirira engisa yohulehwa ao koti omuhasi mufwiirwe.

⁵Olwohuba omuloongi wao, niye wamwo, Omwaami w'Obunyala nilyo eliita lyae; haandi Omwoolerefu wa Yisiraeli niye Omuwonia wao, alaangwa ati, Nasaae w'esyaalo syoosi.

⁶Olwohuba Omwaami yahulaanga nooli koti omuhasi yibajwaanga haandi nooli mu ngisa, koti omuhasi yibasukuna mu buraaga bwae. Mani Omwaani aboola ati:

⁷“Ndahuleha ohumala embaka endiidi muno, nae mu buheeri bw'amaani, njia ohuhukobosa haandi.”

⁸Hulw'etima liingi muno, ndahufudatira emukoongo ohumala esiha sidiidi muno, haandi ndahweekisa. Nae neende obuheeri butaakama, njia ohuhukwiira esisa. Omwaami, Omununusi wao, nilwo lu aboola.

⁹Olwohuba, koti lundeechuba mu ndaalo cha Nowa, endi haba siinjia huleeta amaachi k'ofwomboole, kata neende bulaanu ndeechuba endi haba siinjia huhunyoolerera daawe haandi siinjia huhwoolobya daawe.

¹⁰Olwohuba engulu chinyala ohuwaao neende ebigulu ohumalwao, nae obuheeri bwaange butaakama haba sibuchia ohuwaao daawe. Omwaami ohukwiira esisa, nilwo lu aboola.

¹¹Omwaami aboola ati: “Ewe Yerusalemu, esiko si saandisibwa, esiwuuchwa omuyaka, haandi abulao ohulemya omwooyo, bona, njia ohuhwoombaha neende amakina malai, haandi omusiingi kwao njia ohukwoombahira amakina k'engaanga y'aakulu.

¹²Eminara kyao njia ohuchoombaha neende amakina magumu, ebiruwa byao, njia ohubyoombahira amakina ka rubbia, haandi ebida byao byoosi njia ohubyoombahira amakina k'engaanga.

¹³Omwaami mweene niye ochia ohweekesa abaana bao, haandi buli siindu sibahola sichia ohubachiiraanga bulai muno mani babe neende omuleembe.

¹⁴Obuluungifu buchia ohuhuhola ow'amaani; mani wahawone ohufwiinyirirwa, olwohuba yibulao esichia ohuhutiisaho haandi; amatiichasi haba sikachia husudaho aambi naawe daawe.

¹⁵Niyibaao ohuseeta, haba siyahabe n'atula yi ndi. Buli wahahuseete ohuhulwaania yahakwicheenge bukwa hulwao.

¹⁶Bona, ndaloonga omwiitaanyi obwaana omuliro kw'amaanda, mani niyetaanya esilwaaniso syaaba naadaha. Haandi Niise owaloonga omusikaari osilwanisira ohusihirisa.

¹⁷Nae sibulao esilwaaniso sibahetaanye ohulwaania esyahabe neende ehabi, haandi buli owahawose naawe omusaango, kwahamuhire. Njia ohukayirira abahalaabani baange, haandi njia ohukera bayiingire.” Omwaami nilwo lu aboola.