Read saamia Yisaaya 6 Bible Online

Yisaaya 6 - saamia bible

Yisaaya 6

¹Mu mwaaka ku mutuki Wusiya, yafwiiramo, ndabona Omwaami niyehaale hu sisaala sy'obutuki sileeyi haandi esy'oluyaali, eganjuula lyae lyali niliichuule enyuumba ya Nasaae yoosi.

²Mani abaseraafi bali nibeemere aakulu w'esisaala esyo; buli seraafi yali naali neende embaya chisaasaba; embaya chibiri nichibwiihire mu moni, haandi embaya chibiri nichibwiihire amakulu, haandi embaya chibiri nacheehoonyera ohubburuha.

³Mani abaseraafi bali nibabooleranaanga bati: “Omwoolerefu, Omwoolerefu, Omwoolerefu, niye Omwaami w'Obunyala; esyaalo syoosi sichuule oluyaali lwae.”

⁴Mani ekono lyaabwe niyidengaania obwaalo bw'Enyuumba ya Nasaae. Mani Enyuumba ya Nasaae niyiichulamo omwoosi.

⁵Mani nimboola endi: “Chiinjakaanire! Olwohuba ngotere; olwohuba buli mboosi yi nomanoma haba siinjolerefu daawe, haandi ndamenya neende abaandu batalomaloma ebyoolerefu. Nae ese mbweene neende emoni chaange Omutuki, Omwaami w'Obunyala!”

⁶Mani mulala hu Baseraafi naabburuha niyeecha yi ndi, naali neende elyaanda lyaaduha, li yaali n'atusire hu alutaari n'adiirire neende magalo.

⁷Mani nageeng'a hu munwa kwaange, n'aboola ati: “Bona, elyaanda lino koti lu lyegeeng'ere hu munwa kwao; ebyonoono byao bimalirweo, haandi ebyonoono byao bihuleheerwemo.”

⁸Mani ndawulira ekono ly'Omwaami niliboola liti, “Wiina mweene yindaatume, haandi wiina onaabe wamwaanda weefwe?” Mani ese nimboola endi, “Ese mbano ndi ano! Ndume.”

⁹Mani Omwaami niyaamboolera ati, “Chia, mani oboolere abaandu bano oti: ‘Muwulira haandi muwulire luundi, nae haba simuchia humanya; mubone haandi mubone luundi, nae haba simuchia hutusamo amahuluundu, nae haba simuchia ohwehaliirisa daawe.’

¹⁰Haandi niyaamboolera ati, ‘Ewe hola emyooyo ky'abaandu kibe emyoomeranu, haandi wikale amatwi kaabwe, haandi wofusa emoni chaabwe; mani bahae ohubona neende emoni chaabwe, haandi bahae ohuwulira neende amatwi kaabwe, haandi bahaye ohumanya neende emyooyo kyaabwe, bahakaluuhana mani bawonisibwa.’”

¹¹Mani ndateeba endi, “Omwaami waange, sino syahoole liina ohuba siti?” Mani nae n'akobolamo ati: “Ohwoola lu biko byahasihirire nibibulamo omuundu yeesi omenyamo, haandi amayuumba kaabwe nikabulamo omenyamo, haandi esyaalo syoosi nisisihiriire elalira.

¹²Mani ese Omwaami njia ohutusamo abaandu mbayire eyale, mani hole esyaalo esyo sibe ekunda.

¹³Nae kata silala sy'ehumi sy'abaandu abo nisyahadoong'e mu syaalo omwo, syahasihirisibwe, koti esisina sy'omutuumba kwatemwa, ku esisina sidoong'a nisisyeemere nikutemerwe kwaakwa aasi.” Olumwo lwoolerefu nilwo olwahabe esaga lyasyo.