Read saamia Yisaaya 63 Bible Online

Yisaaya 63 - saamia bible

Yisaaya 63

¹ “Wiina mweene wuno otula mu siko sya Bbosira mu Edomu? Wiina mweene wuno owefwaalire ebyefwaalo bilai eby'e Bbosira, oli mu ngubo ch'oluyaali, akeenda neende amaani maangi?” “Niye Ese, Omwaami, oli neende obunyala bwohununula, haandi olaangirira ohuyiingira hwaange.”

²Lwasiina engubo chao chahaanye, haandi lwasiina chiri koti engubo ch'oyo onyuha efiini?

³Mani Omwaami naakobolamo ati: “Ese syeeng'ene, niise osenakiire ebyaalo koti omuundu oseenakira efiini mu sihunyiro; ndabiniinaho neende etima lyaange lyoosi haandi ndabiseenakira mu bwaalaba bwaange. Amabaanga kabwo kaanyuhira hu ngubo chaange, mani nichiichulaho amabboondo.

⁴Olwohuba oludaalo lw'ohwetuunga lwali mu mwooyo kwaange, haandi omwaaka kwaange kw'ohununula kwoolere.

⁵Ndaliinda, nae naabulao omuundu wuhoonya; ndawuka, nae yaabulao omuundu wiicha ohunjabina. Nae etima lyaange niliimberesa amaani, mani ese omweene ninyiingira.

⁶Ndaseenakira ebyaalo mu tima lyaange, mani ndabidobaania mu bwaalaba bwaange. Mani ndeedisa amabaanga kaabwe hu loba.”

⁷Njia ohulomaloma hu hudaha hutaakama hw'Omwaami. Njia ohufumia Omwaami, ohuchianakana neende ebyo byoosi bi Omwaami atuholeere, neende obuheeri buungi bu yekeese ab'enyuumba ya Yisiraeli, hwababereese ohuchianakana neende esisa syae, neende ohuchianakana neende obuheeri butaakama bwae buungi.

⁸Olwohuba Omwaami aboola ati: “Mubwadyeeri bweene, bano nibo abaandu baange, haba sibachia huumbacha daawe.” Mani naaba Omuwonia waabwe.

⁹Yabachuunirwa mu husaanda hwaabwe hwoosi. Niye omweene, ataali malaika wae, owabawonia. Mu buheeri bwae neende mu sisa syae, yabanunula. Yabaliinda mani yaabahoonyaanga mu bidinyu byaabwe ohutula hale.

¹⁰Nae mani nibamujeemera mani nibanyoolesa Mwooyo Mwoolerefu wae, mani sakira yeehola omusuku waabwe, haandi omweene n'abalwaania.

¹¹Mani abaandu bae nibeechulisa endaalo ehale, mu biha bya Musa omuhalaabani wae, mani nibateeba bati: “Omwaami ali yeena eyabaambusa enyaanja alala neende abeemirisi b'abaandu bae?” Ali yeena owata Mwooyo Mwoolerefu wae akatikaati waabwe?

¹²Omwaami ali yeena owehoonyera obunyala bwae owahola eby'amaani naabitira mu Musa, n'akabulamo amaachi k'enyaanja nibabona omweene ohweholera eliita litaheebirirwe?

¹³Yababisa mu nyaanja, koti lu faraasi yibita mu siparara niyitegumuule.

¹⁴Koti lu ng'oombe chiyirwa aasi mu hooho lai, nilwo lu Mwooyo w'Omwaami aberesa abaandu bae ohuwuluuha. Mani nilwo lu weemereramo abaandu bao, mani baleetera eliita lyao oluyaali.

¹⁵Ewe Omwaami, tulingaale nooli muukulu, mani obone nooli eyomu bwiihalo bwao bwoolerefu haandi obw'oluyaali. Esira yao neende amaani kao mu hutuhoonya biri yeena? Obuheeri bwao neende esisa syao biri yeena? Omalire ohubitutusaho.

¹⁶Olwohuba niiwe Seefwe, kata asyahaba mbwe Abburahamu kuuka yeefwe haba saatumanyire haandi Yisiraeli yatwekaana, nae ewe, Ewe Omwaami, niiwe Seefwe, Omuwabini weefwe, ohutula hale-na-haandi nilyo eliita lyao.

¹⁷Ewe Omwaami, lwasiina otuleha hwawaaba nihutula hu ngira chao? Lwasiina otwoomya emyooyo otyo, mani hwahaya ohuhwiisamo oluyaali? Kobola hu hola yao ehale hulw'abahalaabani bao, hulw'abaandu bao beene, ob'oluyia lwa Yisiraeli.

¹⁸Abaandu bao boolerefu bali abuundu wao woolerefu ebiha bidiidi muno; nae abasuku beefwe nasisenakiire.

¹⁹Hweeholere koti abo bootatukaangaho daawe, koti abo abatabeechangaho abaandu bao.