Read saamia Yisaaya 64 Bible Online

Yisaaya 64 - saamia bible

Yisaaya 64

¹Aaa, oba noonyala ohutaandula ekulu mani weeha aasi, engulu chahahubweene mani chateengereha obuti.

²Chahateengerehe koti omuliro kwaaduha hu bikoha haandi kwaabasa amaachi kaatokota. Yiicha mani weekese obunyala bwao abasuku bao babubone, haandi leha ebyaalo biteengerehe mu moni wao!

³Niwahola ebiindu bitiisa bi hwali nihutasuubira, weeha aasi, mani engulu nichiteengereha mu moni wao.

⁴Ohutula hale-na-haandi, abaandu haba sibawuliraangaho kata sa ohumanyaangaho kata sa ohubonaangaho Nasaae wuundi, ohumalaho Ewe oholeraanga eby'amayia abo abamusuubiriramo.

⁵Osangaaliraanga abo abasangaalira ohuholaanga ebiluungifu, abo abeechulisa koti lw'odaha bamenye. Bona, Ewe watunyoolerera, nae hwemeeda sa ohwonoona. Hwadoong'a mu bibi byeefwe ebiha biingi muno. Mani ebyo byahatuwonie, kose?

⁶Efwe fweesi hweholere abataali aboolerefu, haandi ebiholwa byeefwe biluungifu byoosi, biri koti ebyefwaalo biriho eehwe. Fwesi-fweesi huli koti esaafu lihoohere, haandi hulw'ebyonoono byeefwe, hwadumuulwa neende omuyaka hwasukunwa eyale muno.

⁷Abulao omuundu wiicha yooli ohwekongooya, abulao owiiruhira yooli ohumuwonia. Olwohuba ewe otwekisire haandi otumalireo hulw'ebyonoono byeefwe.

⁸Nae, Ewe Omwaami, Niiwe Seefwe. Efwe huli eloba sa, nae Ewe Niiwe omuloongi weefwe; fwesi-fweesi, huli omulimo kw'emihono kyao.

⁹Mani Ewe Omwaami, otatunyoolerera muno daawe, haandi otatwoolobya hulw'ebyonoono byeefwe endaalo choosi. Efwe fweesi koti lu otubona, huli abaandu bao.

¹⁰Ebiko byao byoolerefu, byeholere esiparara, Siyooni syeholere esiparara, Yerusalemu syeholere ekuunda.

¹¹Enyuumba yeefwe enjoolerefu haandi endai muno, yi bakuuka yeefwe bahukinisiraangamo, yisaambirwe neende omuliro, neende abuundu weefwe asangaasa, asihiriiswe.

¹²Ewe Omwaami, haba soodeebayo kata ebyo byoosi nibikwaao? Onabuleere sa buwuleera, mani watuleha hwasaanda muno hutyo?