Read saamia Yisaaya 65 Bible Online

Yisaaya 65 - saamia bible

Yisaaya 65

¹Omwaami yaboola ati: “Ndafukiirira ohukoonywa neende abo abataandeebaanga.” Ndafukiirira ohunyoolwa neende abo abatangoonyaanga. Esyaalo sitandekongooyaanga ndasikobolamo endi, “Mbano ndi ano, mbano ndi ano.”

²Ndakolola amahono kaange oludaalo lwoosi eyiri abaandu bajeemu, abaloondakana neende esaambo chitaali endai. Bachiira hu biindu bi beene babaasiramo sa.

³Abaandu bano banyoolesa muno kalole-ka-moni. Bayaanira mu ndalo ebiyaanwa haandi banioohesera hu matafaali obubbaani.

⁴Esiro bachia mu ng'uungu neende hu biriindwa ohweteeba hu misaambwa ky'abaandu bafwa. Balya enyama y'embiichi, mani bawuuta omuunyu kw'enyama ch'emisiro.

⁵Baboolera abasyaabwe bati, “Mweeme eyale eyo, mutasuda aambi naafwe, olwohuba mukabuhana naafwe.” Abaandu koti abo haba siinyala hubeesimiirisa daawe, baamunyira olusu, mani etima lyaange lyaaduha koti omuliro oludaalo lwoosi.

⁶Bone, syandiikwa hale siti: “Haba siinjia hubuleera, nae njia ohwetuunga, eee, njia ohwetuunga koti lu bihoyera,

⁷hulw'ebyonoono byaabwe alala neende ebya bakuuka yaabwe; olwohuba banioohesera obubbaani hu ngulu nibaanomanomera bubi hu bigulu. Njia ohubasaandya ohuchaanakana neende ebiindu bi bahola hale.”

⁸Omwaami aboola ati: “Koti lu badoola emisabbiibbu milai nibanyuhamo efiini nibaboola bati, ‘Mutasihirisa ekyo daawe, olwohuba kirimo ehabi,’ nilwo nasilala syeesi lu njia ohuhola hulw'omuhalaabani waange, mani haba siinjia hubasihirisa boosi daawe.

⁹Mu beechuhulu ba Yakobbo, neende mu Buyudaaya, njia ohwedooleramo abo abahanyoole esyaalo esy'engulu chaange esyo, esyaalo si abahalaabani baange bahamenyemo.

¹⁰Olwohuba abaandu baange bayiinamira, Saroni syahehola obwayiro bw'ebyaayo, haandi ehooho ly'Akoori lyaheehole abuundu yi byaayo biwuluuhira.

¹¹Nae eng'we abatula hu Omwaami, abeebirira Olugulu lwaange Lwoolerefu, mani nimuholera emisaambwa kiberesa ehabi esidyaalo mani nimwiichusira emisaambwa ky'ebiindu bikwaao efiini yisasaanire, yi muchuha mu bikoombe byeeng'we.

¹²Njia ohubateerao olugaanga, mani mweesi muchia ohuguunama mwiitwe; olwohuba, nindalaanga, haba simwakobolamo, nindalomaloma, haba simwadeebayo ohuwulira, nae mwahola ebiindu bindabakaania, haandi nimudoolao ohuhola ebiindu bitaasangaasa.”

¹³Mani sakira Omwaami Nasaae aboola ati: “Bone, abahalaabani baange bahalye, nae eng'we mwahalumwe enjala; bone, abahalaabani baange bahang'we, nae eng'we mwahalumwe obuluwo; bone, abahalaabani baange baheehoye, nae eng'we, esoni chahabadiire.”

¹⁴Bone, abahalaabani baange baheembe hulw'esangaalo, nae eng'we mwahalire hulw'engisa, nimuchwiila olw'obuchuuni.

¹⁵Abalobole baange bachia ohwehoonyeraanga eliita lyaange nibabwaabwa, mani Omwaami Nasaae achia ohubeeta; nae abahalaabani bae, abo abahola by'adaha, achia ohubakuliha eliita yaaha.

¹⁶Mani onasabeenge ehabi mu syaalo anayisabeenge Ese, Nasaae wadyeeri. Haandi oyo onechubeenge mu syaalo anechubireenge Ese, Nasaae wadyeeri. Olwohuba ebidinyu byaahale byeebirirwa haandi siinjia hubideebaho daawe.

¹⁷Omwaami aboola ati, “Bone, ndi ohuloonga ekulu yaaha neende esyaalo siyaaha. Mani ebiindu byaahale haba sibyaheechuliswe kata sa ohubaaswaho.

¹⁸Nae musangaale haandi mwehoye endaalo choosi mu esyo si ndi ohuloonga; olwohuba bone, Yerusalemu si noonga syahabe esy'ohusangaaliramo, haandi abaandu baamwo bahabe abasangaafu.

¹⁹Ndahasaangaalire mu Yerusalemu, mani ndeehoyera mu baandu baange. Haba siyahabeeo ohulira amasika neende ohuubba embuungu hulw'engisa.

²⁰Haba simwahabeemo haandi omwaana olifwa n'asisiiri omudoto. Abaandu boosi bahayidireenge emyaaka kyaabwe kyoosi. Abaliyiindira ohumala emyaaka emia ndala, bahalaangweenge abaana bayere. Haandi ohufwa n'osisiiri ohwoosa emyaaka emia ndala, hahabe ahalolero h'ohulaamwa.

²¹Abaandu bahoombahe enyuumba mani nibachimenyamo. Balitaaka endalo ch'emisabbiibbu, mani nibalya ebyaamo byacho.

²²Enyuumba chibalyoombaha, haba sichahamenywemo abaandu baandi daawe; haandi bi bahataake, abaandu baandi sinibo abahabilye daawe. Olwohuba koti lu misaala kiyiindira emyaaka miingi, nilwo lu baandu baange bahayiindireenge. Abaloonde baange bahahiinde nibalya hu byaamo by'ohudidiihana hwaabwe.

²³Emirimo kibalihola haba sikyahabe eky'ebihaya, kata sa abaana abaheebulwe, haba sibalinyoola amasira. Olwohuba bahabe olwiibulo lw'abo ba Ese Omwaami, ndaberesa ehabi, abo abeene, alala neende olwiibulo lwaabwe.

²⁴Kata nibasisiiri ohunaanga, njia ohubakobolaangamo, nibanabecheenge nibasiilomalomaanga, njia ohubawuliraanga.

²⁵Aarara neende amakoondi madoto, byahalireenge alala. Edalang'i yahaaye obunyaasi koti eng'oombe; haandi olufu nilwo olwahabecheenge ebyohulya by'endemo. Hu ngulu chaange njoolerefu choosi, haba sihwahabecheengeho ebidinyu kata sa ohusihirira, Omwaami nilwo lu aboolere.”