Read saamia Yisaaya 9 Bible Online

Yisaaya 9 - saamia bible

Yisaaya 9

¹Nae haba siyahabeeo engeri y'ohweewonia ohusaandisibwa. Hale bali nibalekeeresa esyaalo sya Sebbulooni neende esyaalo sya Nafutaali, nae mu ndaalo chiichayo, esituundu esyo siliba esy'oluyaali, ohutula hu nyaanja Mediterania noochiira ebukwe niwambuuhe omwaalo kwa Yorodaani, ohwoola Galili esyaalo sy'abateende.

²Abaandu abakeenderaanga mu siirima babweene obulafu buungi; abo abakeenderaanga mu siirima sya titititi, obulafu bubaaduhiire.

³Omeedere obuungi bw'abateende, obameedere esangaalo lyaabwe. Beehoyera mu moni wao koti lu baandu basangaala mu kesa, koti lu baandu basangaala nibakabana ebiindu bibayaayire.

⁴Olwohuba ekoombo lyali nilibasidoyeere, neende endawusi eyabahuyaanga hu mabeka, omukwaajo kw'abaandu babasaandyaanga, ewe obifunaake-funaake koti hale lu wafunaka-funaka eye ly'Abamidia.

⁵Olwohuba ebiraato byoosi eby'abasikaari abatuseeta neende buli ngubo yeenihwa mu mabaanga byaheehole eehwi mani byaasihirisirwa mu muliro.

⁶Olwohuba batwibuliire omwaana, batubereese omwaana w'obusyaani; obutuki buchia ohuba mu mahono kae, eliita lyae lichia ohulaangwa liti, “Omukabi w'Amakesi Owukisa, Nasaae w'Amaani, Seefwe w'Endaalo Chitaakama, Omuleeti w'Omuleembe.”

⁷Ohwemeeda hw'obutuki bwae neende omuleembe ku yahaleete haba sibyahabeeho enjakamo. Yaheehale hu sisaala sy'obutuki sya Daudi, haandi yaatuka obwaami bwae, ohubutaao, neende ohubwomiisa hu bwadyeeri neende obuluungifu ohutula lu yahachaake ohutuka endaalo choosi. Omwaami w'Obunyala niye ochia ohuhola bino byoosi.

⁸bi Omwaami yalabula abeechuhulu ba Yakobbo, mani byahakwe hu syaalo sya Yisiraeli.

⁹Mani abaandu boosi bahamanye, Yisiraeli neende abaandu bamenya mu Samaria bahamanye, abalomaloma nibesuunga neende aboomeranu emyooyo, nibaboola bati:

¹⁰“Ebyoombahe by'amatafwaali bikwiire, mani huchia ohwombahira amakina mabaache. Emisaala misikamoore kitemerwe kyaakwa aasi, nae abuundu wakio huchia ohutaakao emituumba.”

¹¹Sakira Omwaami asingiise abasuku ba Resini ohubalwania, haandi yasiingisa abasuku baabwe ohubaseeta.

¹²Abasiria ohutula ebukwe neende Abafilisiti ohutula emuumbo, bahaasame eminwa kyaabwe ohumira Yisiraeli. Olwohuba bino nibimalire ohukwaao, etima ly'Omwaami haba siryahaakame haandi yahabe nasikoloole omuhono kwae ohubasaandya.

¹³Nae Abaisiraeli haba sibefunaka baakaluha eyiri Omwaami kata ayahaba niyabasaandya, kata bakoonya Omwaami w'Obunyala.

¹⁴Mani Omwaami yaheenga hu Yisiraeli omutwe neende omuhira, amasaga k'esaasa neende amakada mu ludaalo lulala.

¹⁵Abasaacha bahuluundu neende abahunuufu nibo omutwe, nae abanabbi abeekesa eby'obubacha nibo omuhira;

¹⁶olwohuba abeemirira abaandu bano babakosa, haandi abo abeemirirwa neende abaandu abo bamala ohukoswa.

¹⁷Sakira Omwaami haba saachia ohuleha abaraaga baabwe ohuba neende obuwonero, haandi saachia hukwiira esisa abaana baabwe bafwiirwe neende abahasi baabwe bafwiirwe, olwohuba buli muundu siyeesa oluyaali mu Nasaae haandi mwonooni sa, haandi buli muundu alomaloma eby'obusiru. Olwohuba bino nibimalire ohukwaao, etima ly'Omwaami haba siryahaakame haandi yahabe nasikoloole omuhono kwae ohubasaandya.

¹⁸Olwohuba ebyonoono by'abaandu byahasaambwe koti omuliro, kusihirisa olunani neende amawa; kwawaambya esichaha syaaya, mani omwoosi kudiiraane nikuniooha nikuniina aakulu.

¹⁹Olwohuba obwaalaba bw'Omwaami w'Obunyala, esyaalo siyambiisweho omuliro, mani abaandu baaba koti eehwi chaaduha; mani abulao omuundu owonia owaasye.

²⁰Abaandu beebera hu muhono muluungi, nae bang'iidira hu muhono mukaada nihaandi badoong'a sa enjala niyisiibaluma, haandi banyaka hu muhono mukooda, nae badoong'a nibatekuute; buli muundu anyaka hu waasye; bahoole neende ohulya abaana baabwe beene.

²¹Abamanase bahaseete Abefuraimu, haandi Abefuraimu nibaseeta Abamanase, mani boombi baheeyambaanie alala mani baseete ab'enono ya Yuda. Olwohuba bino nibimalire ohukwaao, etima ly'Omwaami haba siryahakame haandi yahabe nasikoloole omuhono kwae ohubasaandya.