Read saamia Esy'Abaleefi 1 Bible Online

Esy'Abaleefi 1 - saamia bible

Esy'Abaleefi 1

¹Omwaami naali mu Yeema ly'Ohubaao hw'Omwaami yalaanga Musa mani yaamuberesa amalako kaloondaho kano.

²Ati lomaloma eyiri abaandu ba Yisiraeli mani obaboolere oti, “Omuundu yeesi n'ayaana esiyaanwa eyiri Omwaami ahoyere ohuleetaanga esiyaanwa esy'eng'oombe, oba esy'ekoondi oba esy'embusi.

³“Naaba niyoobba eng'oombe yae ohuba esiyaanwa sy'ohusaambwa, ahoyere ohuleetaanga esurusi yitaaliho obufwoolwa bwoosi. Ahoyere ohuyileetaanga hu mulyaango kw'Eyeema ly'Ohubaao hw'Omwaami, hu Omwaami anyale ohumusiima.

⁴Omusaacha oyo ageeng'anga omuhono kwae hu mutwe kwayo, hu yinyale ohufukiirirwa koti esiyaanwa si nyala ohumalao ebyonoono byae.

⁵Aba achia bulaanu ohwiitira abweene ao esurusi eyo, hu bulaanu abalaamisi b'Arooni abo banyale ohuyira mu moni w'Omwaami amabaanga, bakanyulaanyuse hu nyaande chine choosi ech'alutaari yiri mu siruwa sy'Eyeema elyo.

⁶Bulaanu ao hwaaba achia ohuchaaka ohuyibaaka neende ohuyidonyadonya,

⁷nae abalaamisi baba bachia ohutekeha eehwi hu alutaari, bachiyaambieho omuliro.

⁸Haandi baba bachia ohuta hu muliro okwo ebituundu by'esisolo siba nisiitirwe, kata neende omutwe kweene neende amasinya koosi.

⁹Omuundu oyo ahoyere ohwoosa bulai ebituundu biba mukati byoosi, alala neende ebireenge by'adaho byoosi, mani omulaamisi oba n'ahoyere ohuba hu mulimo esiha esyo, niye oba naachia ohusaamba esiyaanwa esyo syoosi siweere hu alutaari. Mani esaami y'esiriiro siyaanwa sino yiba yichia ohuba eyisangaasa Omwaami.

¹⁰“Omuundu oyo naaba naali ohuubba esiyaanwa sy'ekoondi oba esy'embusi, sihoyere ohuba nisiri esisaacha esitaaliho obufwoolwa bwoosi.

¹¹Ahoyere ohusiitira hu lwaande lw'emukulu olwa alutaari, nae abalaamisi nabo nibo ababa nibachia ohunyulaanyusa amabaanga kasyo hu nyaande chine choosi echa alutaari.

¹²Omuundu oyo naaba n'amalire ohuyidonyadonya, omulaamisi oba naali niye omwiimirisi w'omuholo okwo, niye oba naachia ohuta ebituundu byoosi hu muliro, n'otaaho omutwe kweene, neende amasinya keene koosi.

¹³Omuundu oyo haandi ahoyere ohwoosa bulai ebituundu biri mukati byoosi, haandi neende ebinama by'adaho, hu bulaanu omulaamisi oyo ayire esiyaanwa esyomu moni w'Omwaami, mani asisaambire syoosi hu alutaari. Esaami eyo, ey'esiyaanwa sy'esyohulya sino hu yiba yichia ohuba eyisangaasa Omwaami.

¹⁴“Nae naaba naali ohuubba eyoni ohuba esiyaanwa sisaambwa esilaamba, lihoyere ohubechaanga eguugu, oba ebburuuku.

¹⁵Omulaamisi niye oba naachia ohuliyiraanga mu moni w'alutaari, alihoniole eekosi lyalyo mani amale asaambire omutwe kwalyo hu alutaari. Amabaanga kalyo kahoyeere ohuhenenwaanga kawaamo, nikadaachira endulo w'alutaari.

¹⁶Ahoyere ohutusaangamo esahiro alala neende amooya byoosi, mani naamala naabisukuna eyale hu lwaande lw'ebukwe wa alutaari yi baba nibachuhaanga ekohe.

¹⁷Ahoyere ohudiiraanga embaya chalyo, mani yaabulaniamo eyoni elyo amahabi kabiri, naatahalaakeho embaya echio mani amale alisaambire lyoosi hu alutaari. Esaami y'esiyaanwa esyohulya yino yisangaasa Omwaami.”