Read saamia Esy'Abaleefi 11 Bible Online

Esy'Abaleefi 11 - saamia bible

Esy'Abaleefi 11

¹Omwaami yeemao yaaberesa Musa neende Arooni amalako kaloondaho kano

²akadiira hu baandu ba Yisiraeli. Muhoyere ohulichaanga buli sisolo siri hu syaalo huno

³esiri neende ebirekeyi byakabuhanamo haandi ebikobosa ebyohulya byaabikaayamo.

⁴Kata katyo mu bisolo bikaaya haandi ebiri neende ebirekeyi byakabuhanamo, haandi simuhoyere ohulichaanga bino biti: Engamia, olwohuba yikaaya, nae haba siyiri neende ebirekeyi byakabuhanamo daawe, olwohuba by'omusiro nibyo yi muli.

⁵Haandi neende esaabale chomu makina, olwohuba echio chosi chikaaya, nae haba sichiri neende ebirekeyi byakabuhanamo daawe, olwohuba ebyo byosi by'omusiro yi muli.

⁶Haandi neende kata emuuna yosi, olwohuba yosi yikaaya nae haba siyiri neende ebirekeyi byakabuhanamo, mani yosi yiba niyiri ey'omusiro yi muli.

⁷Kata neende embiichi yosi, olwohuba eyo yosi yiri neende ebirekeyi byakabuhanamo, haandi ebirekeyi byayo byeefufuga, nae haba siyinyala hukobosa muhanwa ebyohulya bi yiba niyiriire haandi yaabikaaya daawe, mani yosi yiba niyiri ey'omusiro yi muli.

⁸Haba simuhoyere ohulichaanga ebisolo bino daawe, kata sa ohudiraanga hu milaambo kyaabyo nibiba nibifwiire; bino byoosi by'omusiro yi eng'we muli.

⁹Muhoyere ohulichaanga eng'eeni choosi echiri neende amakeendero haandi neende amakaamba,

¹⁰nae esiindu syoosi esiba nisyamenya mu maachi esitaaliho amakeendero neende amakaamba, haba sisihoyere ohuliibwa daawe.

¹¹Ebiloonge bifwaana bityo, bihoyeerwe ohuyirwaanga koti eby'omusiro yi muli. Mani eng'we haba simuhoyere ohubirichaanga daawe, haandi kata sa ohudiraanga hu milaambo kyabyo nibifwiire.

¹²Haba simuhoyere ohulichaanga esiindu syoosi esyamenya mu maachi, nae haandi haba sisiri neende amakeendero kata neende amakaamba.

¹³Haandi haba simuhoyere ohulichaanga amayoni kano koti, eeswi, engosya, gwaasule,

¹⁴ewuungu, esihubbi neende enjia chasyo chiindi,

¹⁵ehoofwa, alala neende embya chiindi chichiiraho,

¹⁶ewudo, dulyeenge, namulobi,

¹⁷ehirihiihi, ogoongogoongo, namuniingye,

¹⁸eyoyo lyohu maachi, namweenge, awudu

¹⁹namunaha, esihoohootole neende akafwaana nasyo, adyeedo, neende embuudombuudo.

²⁰Ebikooko ebiriho embaya byoosi by'omusiro nibyo yi muli,

²¹ohutusaho ebyo ebinyala ohuduuma-duuma.

²²Munyala mwaalya esike, esiyeenje, oba edeede.

²³Nae ebiindu biindi bidiidi byoosi ebiri neende embaya, nae haandi binyala ohwambaaka, bihoyere ohuyiribwa koti eby'omusiro yi muli.

²⁴Nae oyo yeesi ochia yadiira hu mulaambo kufwiire okw'ebisolo bino biti, yesi achia ohubalwaanga koti ow'omusiro ohwoola lu bwiira oludaalo olwo,

²⁵haandi oyo yeesi okiinga emilaambo kifwiire ky'ebisolo ebyo, ahoyere ohuchichaanga yoosa engubo chae, nae kata katyo adoong'a sa naayirwa koti ow'omusiro yi muli ohwoola engoloobe y'oludaalo olwo.

²⁶Buli sisolo syoosi esiri neende ebirekeyi byakabuhanamo, nae haba sibyefufuga daawe, oba esitanyala ohukaaya, sy'omusiro yi muli; haandi oyo yeesi osidiiraho yesi aba ow'omusiro sa yi muli.

²⁷Haandi ebisolo byoosi ebikeendera amadete mooki, mu bisolo by'amakulu kane, byosi by'omusiro yi muli; haandi oyo yeesi odiira hu milaambo kyabyo aba achia ohubechaanga ow'omusiro ohwoola lu bwiira ludaalo olwo,

²⁸haandi kata oyo yeesi okiingaho emilaambo kyabyo aba ahoyere ohuchia yoosa engubo chae, haandi yadoong'a sa n'asisiiri ow'omusiro yi muli ohwoola lu bwiira oludaalo lweene olwo; ebisolo ebyo byoosi by'omusiro yi muli.

²⁹Nae bino nibyo ebiindu bifwiindikana ebyeechulana hu syaalo ebiri eby'omusiro: Efuho, embeba, oluunyu, embaakala alala neende ebisolo biindi byoosi ebifwaanaho bityo koti;

³⁰ehoohome, embulu, embaakala ch'omuuloba, alala neende ehaaniafu.

³¹Bino byoosi nibyo ebiindu bifwiindikana ebitaali ebilafu yi muli; mani oyo yeesi obidiiraho nibifwiire, aba achia ohubechaanga ow'omusiro ohwoola engoloobe y'oludaalo olwo.

³²Nae haandi nikali mbwe emilaambo kyabyo kifwiire nikikwa hu siindu siindi syoosi, syosi siba sichia ohubechaanga sa esy'omusiro sityo yi muli. Sino sidiira hu biindu biindi koti, embaao, engubo, eseero, oba egunia, ataali ohufwaayo muno hu mulimo ku siindu esyo siba nisiholaanga. Mani esiindu koti esyo sihoyeerwe ohwiinihirwaanga mu maachi, mani sidoong'anga sa nisisisiiri esy'omusiro yi muli ohwoolaangaa engoloobe y'oludaalo lweene olwo.

³³Nae nikali mbwe emilaambo ekyo kikwa mu ndamu y'eloba, buli siindu syoosi esiba nisirimo, siba siri esy'omusiro, mani haandi muba muhoyere ohwaataanga endamu koti eyo yityo.

³⁴Nae esyohulya syoosi esinyala ohuliibwa, nae amaachi katula mu ndamu eyo kanyalire ohusidoonyaho, syosi siba simalire ohweehola esy'omusiro yi muli, haandi kata esiindu syoosi esing'weebwa esiba mu ndamu eyo, syosi siba siri esy'omusiro sa yi muli.

³⁵Mani buli siindu syoosi si mulaambo kwoosi okwo sikwegeeng'aho siba syosi syeholere sa esy'omusiro yi muli; kata amaika maloonge mu loba, oba ofeni, byoosi biba bihoyere ohwaatwa sa,

³⁶nae niyiba esulo oba esisiima, ebyo bidoong'a sa nibiri ebilafu, kata neende nikali mbwe buli siindu syoosi siindi nisyegeeng'a sa siti hu milaambo kyabyo siba nisiri esy'omusiro.

³⁷Nae nikali mbwe omulaambo kuundi kwosi kwoola ohwegeeng'aho hu emwo yichia ohutaakwa, emwo eyo yidoong'a sa niyiri endafu.

³⁸Nae emwo eyo nikali mbwe yibeere niyiri ohwiinihirwa, nae omulaambo kwoosi ku yegeeng'aho, emwo eyo yiba yimalire ohukaluuhana ohuba ey'omusiro.

³⁹Nae nikali mbwe esisolo syoosi esihoyera ohuliibwa sifwa esyeene, oyo yeesi osidiiraho, aba achia ohubechaanga sa ow'omusiro yi muli ohwoola engoloobe ludaalo lweene olwo.

⁴⁰Haandi nikali mbwe aliwo omuundu yeesi oba n'aliireho hu nyama y'esisolo esyo esifwiire esyeene, aba ahoyere ohuchichaanga yoosa engubo chae choosi, nae kata katyo adoong'a sa n'asisiiri ow'omusiro ohwoola engoloobe y'oludaalo lweene olwo; haandi oyo yeesi okiinga omulaambo kw'esisolo siba nisifwiire esyeene esyo, yesi ahoyere ohuchichaanga mani yoosa engubo chae choosi, ni yesi adoong'a sa n'asisiiri ow'omusiro ohwoola engoloobe y'oludaalo lweene olwo.

⁴¹Eng'we haba simuhoyere ohulichaangaho hu tusolo otudiidi-diidi otukeendaana hu loba daawe,

⁴²kata sa nituba nitwaafula, oba nitunyala ohukeendaanga sa neende amakulu kaatwo kane, kata sa nituba nituli neende amakulu maangi sa.

⁴³Muteholaanga abeene ohuba ab'omusiro nimulyaho hu bisolo bino.

⁴⁴Ese niise Omwaami, Nasaae weeng'we, mani eng'we muhoyere ohweliindaanga nimuli aboolerefu, olwohuba ese syesi ndi omwoolerefu.

⁴⁵Ese niise Omwaami, owabatusa mu Misiri, hu nyale ohuba Nasaae weeng'we. Eng'we mani muhoyere ohubechaanga aboolerefu, olwohuba ese syeesi ndi omwoolerefu mweene.

⁴⁶Lino, mani, nilyo elako lidiira hu bisolo, neende amayoni, haandi neende hu buli siindu esyamenya mu maachi, haandi neende hu buli siindu esikeendera sa hu loba.

⁴⁷Mani eng'we muhoyere ohubechaanga abehaliirisa mu buli siindu, hu munyaleenge ohumanyaanga ohukabuhanianga akatikaati w'esiindu si muduunga kuyira ohubechaanga esilafu, neende esyo si kuyira ohubechaanga esy'omusiro, akatikaati w'ebisolo bihoyere ohuliibwaanga, neende ebyo ebitahoyeere ohuliibwaanga daawe.