Read saamia Esy'Abaleefi 12 Bible Online

Esy'Abaleefi 12 - saamia bible

Esy'Abaleefi 12

¹Omwaami haandi yaberesa Musa amalako kano

²ak'abaandu ba Yisiraeli. Endaalo chitaanu-na-chibiri (7) omuhasi n'amalire ohwiibulaanga omwaana musyaani, aba asisiiri sa ow'omusiro eyiri abaandu, ohweema hu miduunga koti lu kiri, koti lwaaba sa naaba naali mu mwoosi.

³Mani hu ludaalo lwa hataanu-na-hadatu, omwaana oyo aba ahoyere ohuhebwaanga.

⁴Mani haandi ohutula ao aba achia ohumalaanga endaalo amahumi kadatu neende chidatu, hu yeemeo abe nataali ow'omusiro eyiri abaandu ohweema hu miduunga koti lu kiri ohutula niyali n'adaachireho amabaanga; esiha sino syoosi, omuhasi oyo haba saaba n'ahoyere kata ohudiiraangaho hu siindu syoosi esiyirwa koti esyoolerefu, oba ohuchia yeengiraangaho mu Yeema ly'Ohubaao hw'Omwaami elyo, ohwoolera elalira esiha sy'ohulabiswaanga koti lu siba nisichia ohuba nisiwereere elalira.

⁵Nae endaalo ehumi neende chine nichinabechaanga nichimalire ohuwa ohutula omuhasi naaba niyebuule omwaana muhaana, aba anabechaanga naali ow'omusiro ohweema hu miduunga koti lu kiri, koti sa lwaaba naali mu mwoosi. Nae endaalo amahumi kasaasaba neende chisaasaba nichinabechaanga nichiweere, ao niwo yanabechaanga niyeholera ohuba nataali ow'omusiro eyiri abaandu ohweema koti lu miduunga kiri, ohutula niyadaachaho amabaanga.

⁶Mani esiha syae sy'ohulabiswaanga koti emiduunga kiri, nisinabechaanga nisimalire ohuweera elalira, oba omwaana oba niyeebulwa niyali omusyaani oba omuhaana, omuhasi oyo ahoyere ohubukulaanga ekoondi doto ely'omwaaka mulala, mani aliyiriraanga omulaamisi hu mulyaango kw'Eyeema ly'Ohubaao hw'Omwaami, koti esiyaanwa sisaambwa sa syaawa, haandi abweene ao, ameedaho ebburuuku oba eguugu lala ely'esiyaanwa sy'esyonoono.

⁷Mani omulaamisi oyo aba achia ohubukulaanga esiyaanwa sy'omuhasi oyo, mani asiyaanayo eyiri Omwaami, ohola emiduunga kimala hu muhasi oyo omusiro kwoosi, mani anyale ohubechaanga niyeholere olabisibwe ohweema hu miduunga koti lu kiri. Sino mani nisyo esiindu si muhasi yeesi ahoyere ohuholaanga naaba n'amalire ohwiibula.

⁸Nae nikali mbwe omuhasi oli atyo naaba naatanyala ohunyoola ekoondi doto, mani aba achia ohunyala ohuleetaanga amabburuuku kabiri oba amaguugu kabiri, lala liba lichia ohubechaanga ely'esiyaanwa sisaambwa syaawa, nae eliindi liba lichia ohubechaanga ely'esiyaanwa sy'esyonoono, mani omulaamisi yeemeo anyale ohuhola omuduunga kw'ohumumalaho omusiro kwae okwo, hwaabe olabisibwe koti emiduunga kiba nikiri.