Read saamia Esy'Abaleefi 17 Bible Online

Esy'Abaleefi 17 - saamia bible

Esy'Abaleefi 17

¹Omwaami yalagira Musa

²ohuberesa Arooni neende abaana bae, haandi neende abaandu ba Yisiraeli boosi, amalako kaloondaho kano.

³Omuisiraeli yeesi niyeetera Omwaami esiyaanwa sy'eng'oombe esurusi, oba esy'ekoondi doto, oba esy'embusi abuundu woosi erwaanyi w'ekaambi yino,

⁴mani yaahaya ohuyileeta yeetera ena mulyaango kw'Eyeema ly'Ohubaao hw'Omwaami, ohuyiyaana koti esiyaanwa eyiri Omwaami mu moni w'alutaari, ao aba amalire ohuhalaka elako. Aba amalire ohwiidisa amabaanga, mani haba saaba naachia ohuyirwa koti mulala hu baandu ba Nasaae.

⁵Amahuluundu k'elako lino niko mbwe, abaandu ba Yisiraeli bulaanu banahoyerwaanga ohuleetaanga eyiri Omwaami ebisolo byoosi bi bali nibanaliirira ohwiitiraanga erwaanyi mu syaalo eyo sa. Bulaanu bahoyere ohubileetaanga eyiri omulaamisi ena mulyaango kw'Eyeema, hu bamale babiiteenge koti ebiyaanwa by'ohukobosania alala.

⁶Bulaanu omulaamisi aba achia ohubukulaanga amabaanga, mani amala akawaanya hu nyaande chine choosi ech'alutaari eyiri ena mulyaango kw'Eyeema ly'Ohubaao hw'Omwaami, mani hwaamale asaambe amasinya koosi, hukahole esaami yisangaasa Omwaami.

⁷Abaandu ba Yisiraeli bahoyere bulaanu ohuhaya ohubechaanga abataali abeesikwa eyiri Omwaami, nibeeteraanga ebisolo byaabwe byoosi mu siino koti ebiyaanwa eyiri emisaambwa ky'embusi sa. Abaandu ba Yisiraeli bahoyere ohuloondakanaanga neende ebilagiro bino endaalo choosi echomu moni.

⁸Omuisiraeli yeesi, oba omuteende yeesi owamenya mu baandu bano n'ayaanira esiyaanwa sy'ohusaamba syaawa, oba esiyaanwa syoosi

⁹koti esiyaanwa sy'Omwaami, abuundu woosi ataali hu mulyaango kw'Eyeema ly'Ohubaao hw'Omwaami, aba yakaame ohuyirwaanga koti mulala hu abaandu ba Nasaae.

¹⁰Omuisiraeli yeesi, oba omuteende yeesi owamenya mu baandu bano olya amabaanga, Omwaami aba achia ohumukaluuhanira mani yaakame ohuyirwaanga koti mulala hu baandu bae.

¹¹Olwohuba obulamu bwa buli siindu silamu buli mu mabaanga, mani sakira, Omwaami yalagira ati, amabaanga koosi kahoyeere ohuchuhwaanga hu alutaari, hu kanyale ohumalaangao ebyonoono by'abaandu. Mani amabaanga kano, akeene akali obulamu niko akanyala ohumalao ebyonoono.

¹²Mani sino nisyo esyakera Omwaami yaaba nabooleere abaandu ba Yisiraeli ati, kata abeene abo, oba omuteende yeesi owabamenyamo, haba s'ahoyere ohulichaangaho enyama yoosi eyiba niyisisiirimo amabaanga.

¹³Nae Omuisiraeli yeesi, oba omuteende yeesi owabamenyamo naaba nayiimire mani yeeta esisolo syoosi esiba nisiri esilafu ohweema hu miduunga koti lu kiri, oba eyoni lyoosi eliba niliri elafu ohweema hu emiduunga koti lu kiri, aba ahoyere ohwiidisaanga amabaanga koosi ak'esisolo esyo, oba eyoni elyo, hu loba mani amala abbuukaho neende eloba liindi.

¹⁴Olwohuba obulamu bw'esiindu syoosi esilamu, buli mu amabaanga kasyo, mani esyo nisyo esyakera Omwaami n'aboolera abaandu ba Yisiraeli ati, abo haba sibahoyere ohulichaanga enyama yoosi eyiba niyisisiirimo amabaanga, haandi ati, oyo yeesi ohaya mani yaahola sa atyo, aba hu yakaame ohuyirwaanga koti mulala hu baandu bae.

¹⁵Mani omuundu yeesi, Omuisiraeli oba omuteende sa, olichaanga enyama y'esisolo esiba nisyafwa obulwaae bwa buli ludaalo, oba esiba nisyeetwa neende ebisolo biteende, aba ahoyere ohuchichaanga mani yoosa engubo chae bulai bweene, haandi amala achia omweene yeeyoka omubiri kwae kwoosi bulai, mani yaliinda ohwoola lu bwiire bwiira, hwaanyale ohuba omulafu ohweema hu miduunga kiba nikiri.

¹⁶Nae naahaya ohuhola atyo, omweene aba ahoyere ohusaandisibwaanga koti lu bihoyera.