Read saamia Esy'Abaleefi 2 Bible Online

Esy'Abaleefi 2 - saamia bible

Esy'Abaleefi 2

¹Omuundu yeesi naleeteraanga Omwaami esiyaanwa sy'emere, ahoyere ohusisyechaanga syehola obusye. Haandi ahoyere ohumeedaangaho amafuta k'emiseituuni alala neende obubbaani

²hu yaabileeta eyiri abalaamisi b'Arooni. Bulaanu omulaamisi oba niye oli hu mulimo, niye oba naachia ohubukulaanga oluyu lw'obusye obwo, alala neende amafuta, obubbaani bwoosi, mani asaambira hu alutaari koti esituundu sihihirira obusye obwo bwoosi obuba ni buyaanirwe eyiri Omwaami. Mani esaami y'esiyaanwa y'esy'ohulya sino yiba yichia ohubechaanga eyisangaasa muno eyiri Omwaami.

³Emere yiba niyidoong'ereho hu siyaanwa sy'emere eyo yiba yoosi ey'abalaamisi. Njolerefu muno niyo, koti lu yiba niyitusirwe hu ebyohulya biba nibiyaaniirwe Omwaami.

⁴Nikali mbwe esiyaanwa esyo sy'emigaati kideheerwe mu ofuna, kiba ekideeherwe nikitaalimo emera lyoosi. Kinyala ohuba emigaati mihomefu ekiholerwe mu busye obwakaandwa neende amafuta k'emiseituuni, oba bbisikuuti ebyabahwaho amafuta k'emiseituuni.

⁵Nae esiyaanwa nisiba emigaati kideheerwa hu luchio, kihoyere ohuba nikiholerwe neende obusye bwakaandirwa amafuta k'emiseituuni, nae obutabbaahirwe daawe.

⁶Kidonyadonyemo ebituundu mani okichuheho amafuta hu ochie okiyaane koti esiyaanwa.

⁷Nae nikali mbwe esiyaanwa esyo sy'emigaati kideheerwe mu sifulya, kihoyere ohuba nikiholeebwe mu busye alala neende amafuta k'emiseituuni.

⁸Mala otyo mani okileete kibe esiyaanwa sy'Omwaami, mani okiyire eyiri omulaamisi, oba niye ochia ohukiyira hu alutaari.

⁹Omulaamisi achia ohubukulaho ekiindi, kibe ekihiihirira ekidoong'ereyo koti kyoosi ekiyaanirweyo eyiri omwaami, mani achia ohumala atyo mani akisaambire hu alutaari eyo. Mani esaami y'esiyaanwa sino esy'esyohulya yiba yichia ohuba eyisangaasa Omwaami.

¹⁰Ebiyaanwa biba nibidoong'ereo biba bichia ohuba eby'abalaamisi; biba biri ebyoolerefu muno, koti lu biba nibitusirwe hu byohulya biyaniirwe Omwaami.

¹¹Abulao esiyaanwa sy'emere syoosi syooba noochia ohuyira eyiri Omwaami esiba siholeerwemo eemera; haba siohoyera ohwehoonyeraanga eemera lyoosi, oba obuuhi, mu siyaanwa sy'esyohulya sy'Omwaami.

¹²Esiyaanwa sy'emere yitaangira yooba nookesa buli mwaaka, sihoyere ohuleetwaanga eyiri Omwaami, nae haba sisihoyere ohusaambirwaanga hu alutaari daawe.

¹³Techaanga omuunyu hu buli siyaanwa sy'emere, olwohuba omuunyu kweekesa endagaano yiri akatikaati wao neende Nasaae. (Ohoyere ohuta omuunyu hu biyaanwa byao byoosi.)

¹⁴Nae nooba noleetera Omwaami esiyaanwa sy'emere yikeserwe, yanaanga emere ehalaange, oba eyiba niyisyeerwemo obusye.

¹⁵Meedaangaho amafuta k'emiseituuni haandi otecheengeho obubbaani bwosi.

¹⁶Omulaamisi aba bulaanu achia ohusaambaanga esituundu sy'obusye esyo alala neende amafuta ebiba nibichia ohuhiihiriraanga ebidoong'ereo, haandi kata neende obubbaani bwoosi, bino biba bichia ohubechaanga esiyaanwa sy'esyohulya eyiri Omwaami.