Read saamia Esy'Abaleefi 22 Bible Online

Esy'Abaleefi 22 - saamia bible

Esy'Abaleefi 22

¹Omwaami yalagira Musa

²ohuboolera Arooni neende abaana bae ati, “Eng'we haba simuhoyere ohuchalaasaanga eliita lyaange daawe, mani yiseenge oluyaali mu biyaanwa bilafu bi baandu ba Yisiraeli bayaana yiindi. Ese niise Omwaami.”

³Nae oyo yeesi hu beechuhulu bao, naaba niyebahire omusiro, mani yaasuda aambi neende ebiyaanwa bilafu bi baandu bayaana yiindi, saaba n'ahoyere ohuhalaabana hu alutaari eyo. Sino sidiira hu ndaalo choosi echiicha. Ese niise Omwaami.

⁴“Yibulao kata mulala hu beechuhulu b'Arooni, oba neende obulwaae bw'ebigeenge, oba odaacha esiindu syoosi, onyala ohulya hu siindu syoosi hu biyaanwa bilafu, ohwoola lu yetusaho omusiro okwo kwoosi. Omulaamisi yeesi aba yebahire omusiro n'adiira hu siindu syoosi esy'omusiro koti ohubitira muhwegeeng'a hu mulaambo, oba naaba naatulamo amaachi k'obusaacha

⁵oba naaba niyegeeng'ere hu sisolo oba omuundu oliho omusiro.

⁶Omulaamisi yeesi owebaha omusiro, adoong'a sa naali neende omusiro okwo ohwoola engoloobe y'oludaalo olwo, haandi kata katyo, haba saaba n'ahoyere ohulyaaho hu biyaanwa bilafu ohwoola lwaaba n'amalire ohweyokaho.

⁷Elyuuba nilimala lyaakwa, aba ali owumaho omusiro, mani bulaanu aba anyala yaalya hu biyaanwa bilafu, ebihoyere ohuba ebyohulya byae.

⁸Haba saaba achia ohulya enyama y'esisolo syoosi esiba nisifwiire oluumbe lwabuli buhya, oba esiba nisiitirwe neende ebisolo biteende; yiba yichia ohumuhola abe ow'omusiro. Ese niise Omwaami.

⁹“Abalaamisi boosi bahoyere ohuloondakanaanga neende amalako ka ndusire. Ataali ao, baba bachia ohuba abanieere omusaango, mani bafwe, olwohuba baba nibahayire ohuwulira amalako malafu. Ese niise Omwaami, haandi niise okahola nikaba amoolerefu.

¹⁰Omuundu wohu mabaanga k'obulaamisi, niye yeeng'ene onyala ohulya hu biyaanwa bilafu; abulao omuundu yeesi onyala ohubilya kata sa neende oyo oba niyamenya sa neende omulaamisi oba niyapakaswa sa nae.

¹¹Nae abawaambe b'omulaamisi, abawaambe abakulwa neende eseende chae omweene, oba abeebulirwa mu daala lyae, nibo abanyala ohulya hu byohulya bi mulaamisi anyoola.

¹²Omwaana muhaana w'omulaamisi odeehera omuundu otaali omulaamisi haba saanyala ohulyaaho hu biyaanwa bilafu.

¹³Nae omuhaana wafwiirwa wamwe, oba owaloba otaali neende omwaana, haandi owakobola ohumenya mu daala lya laatang'ene koti owoolwa, aba anyala ohulya hu byohulya bi laatang'ene anyoolaanga koti omulaamisi. Ohutusaho mulala hu baandu bali mu daala ly'omulaamisi niye onyala ohusilyaaho.

¹⁴“Omuundu yeesi otaali mulala hu baandu bomu daala ly'omulaamisi naalya hu biyaanwa bilafu nataachiririire ohuhola atyo, aba ahoyere ohutuunga omulaamisi oyo ebyaaka neende byaaba n'aliire, haandi yameedaho ebyaaka neende amahumi kabiri hu buli emia eyebyeene ebyo.

¹⁵Abalaamisi haba sibahoyere ohubaha omusiro ebiyaanwa bilafu

¹⁶nibaleha omuundu yeesi otafukiirirwa ohubilya; sino siba sichia ohuleeta omusaango haandi neende esinyaaso hu muundu ofwaana atyo. Ese niise Omwaami haandi niise oholaanga ebiyaanwa ebyo nibiba ebyoolerefu.”

¹⁷Omwaami yalagira Musa

¹⁸Ohuberesa Arooni neende abaana bae, neende abaandu boosi aba Yisiraeli amalako kano kati. Omuisiraeli yeesi, oba omuteende yeesi owamenya mu Yisiraeli, naayira esiyaanwa sisaambwa syaawa, oba mu hwooseresa esyeyamo syoosi, oba sa koti esiyaanwa syebihaya, esisolo esyo haba sisihoyere ohubaaho obufwoolwa bwoosi.

¹⁹Hu sinyale ohufukiirirwa, siba sihoyere ohuba nisiri esisaacha esitaaliho obufwoolwa bwoosi.

²⁰Nooba n'oyaana esisolo syoosi esiriho obufwoolwa, Omwaami haba saaba naachia ohusisiima daawe.

²¹Omuundu yeesi n'aleeta esiyaanwa sy'ohukobola alala eyiri Omwaami, oba niyooseresa esyeyamo syoosi, oba koti esiyaanwa syebihaya sa, esisolo sihoyere ohuba nisitaaliho obufwoolwa bwoosi hu sinyale ohufukiirirwa.

²²Otayanaanga eyiri Omwaami esisolo syoosi esiwofu, oba esilema, oba esyaheengwaho esiindu syoosi, oba esiriho esifwiimba sidaacha, oba esiri neende eseero lyadomoha-domoha, oba amabute. Otayaanaanga esisolo syoosi esifwaana sityo hu alutaari koti esiyaanwa sy'ebyohulya daawe.

²³Koti esiyaanwa syebihaya, onyala wayaana esisolo syadoondobana ohuhula, oba esyahula bubi, nae haba sisifukiirirwa mu hwooseresa esyeyamo daawe.

²⁴Otayanaanga eyiri Omwaami, esisolo syoosi esyasaasakwa, oba esyaheengwa, oba esyanyubululwa, oba sa esyakusulwaho obusaacha. Sino haba sisifukiirirwa mu loba lyeeng'we lino.

²⁵Otayanaanga esiyaanwa sy'ebyohulya esy'esisolo syoosi esyatula hu muundu muteendee.

²⁶Haandi Omwaami yemeeda ohuboolera Musa ati,

²⁷Eng'oombe esurusi, oba ekoondi, oba embusi niyiibulwa, yihoyere ohulehebwaanga hu ng'ina ohumalaanga endaalo chitaanu-na-chibiri; mani ohutula hu ludaalo lwa hataanu-na-hadatu, ohwemeeda mu moni, yiba bulaanu yihoyere ohufukiirirwaanga koti esiyaanwa esisaambwa syaawa eyiri Omwaami.

²⁸Otayanaanga eng'oombe edwaasi, alala neende emoosi yayo, oba ekoondi edwaasi neende omwaana kwalyo, oba embusi edwaasi alala neende emeeme yayo, hu ludaalo lulala.

²⁹Nooba n'oyaana esiyaanwa sy'ohweebasa eyiri Omwaami, loondakanaanga neende amalako koti lu kaboola hwoonyale ohufukiirirwaanga;

³⁰siricheenge osimalirao oludaalo lweene olwo, n'otalehaho esituundu syasyo syoosi ohukona syoola hu ludaalo luloondaho.

³¹Omwaami haandi yaboola ati, “Funihireenge amalako kaange; ese niise Omwaami.

³²Mutaletaanga ohuchalaasa hu liita lyaange daawe; abaandu boosi ba Yisiraeli bahoyere ohweekesaanga bati, ese ndi omwoolerefu. Ese niise Omwaami haandi obaholaanga mwesi nimuba aboolerefu;

³³haandi niise owabatusa mu Misiri endi ndeehole Nasaae weeng'we. Ese niise Omwaami.”