Read saamia Esy'Abaleefi 23 Bible Online

Esy'Abaleefi 23 - saamia bible

Esy'Abaleefi 23

¹Omwaami yaberesa Musa

²amalako kano kati, akadiira hu bidyaalo by'esinadiini, abaandu ba Yisiraeli nibahung'aana alala ohwiinamira Nasaae.

³Muli neende endaalo chisaasaba chi muhoyere ohuholeraangamo emirimo kyeeng'we, nae yichuliseenge muti, oludaalo lwa hataanu-na-habiri (7), olwa Sabbaato, nilwo oludaalo lw'ohuwuuluuha. Hu ludaalo olwo mutaholeraangaho emirimo kyoosi, nae mwehung'aanienge alala ohwiinamiraanga Nasaae. Sabbaato y'Omwaami niyo, abuundu woosi yooba niwamenya.

⁴Laangirireenge ebidyaalo biloondaho bino mu biha byateebwao.

⁵Paasaka yino, yihuswaanga ohwiisa oluyaali mu Omwaami. Yichaaka elyuuba nilikwa hu ludaalo lw'ehumi-na-hane olw'omwoosi kutaangira.

⁶Hu ludaalo lw'ehumi-na-hataanu, Esidyaalo sy'Emigaati ky'Obusye Butaabbaahirwe yichaaka, mani ohumala endaalo chitaanu-na-chibiri, simuhoyere ohulichaanga emigaati kiihubburwe mu busye bubbaahirwe daawe.

⁷Hu ludaalo lutaangira lw'endaalo chino, muhoyere ohuhung'aanaanga ohwiinamiraanga Nasaae, mani simuholaho emirimo kyeeng'we kyoosi ekya buli ludaalo daawe.

⁸Yanaanga ebiyaanwa byao by'ebyohulya endaalo chitaanu-na-chibiri. Nae hu ludaalo lwa hataanu-na-habiri haandi muhoyere ohuhung'aanaanga alala ohwiinamiraanga Omwaami Nasaae, nae haba simuhoyere ohuholaho kata omulimo kwoosi hu kyeeng'we kya buli ludaalo.

⁹Haandi Omwaami yaboolera Musa ati,

¹⁰“Boolera abaandu ba Yisiraeli oti, nimwoola mweengira mu syaalo siinjia ohubaberesa, mani mwaanyoola ekesa lyasyo, muba muhoyere ohuleetaanga omukaanda kw'ebyaamo bitaangira ebyeekesa lyeeng'we eyiri Omulaamisi.

¹¹Ahoyere ohubiyira koti esiyaanwa sikabuhaaneho eyiri Omwaami, hu munyale ohufukiirirwa. Omulaamisi achia ohubiyiraanga hu ludaalo luloonda Sabbaato.

¹²Hu ludaalo lumuleeteraho esiyaanwa sy'emere, haandi neende ohuyaana esiyaanwa sy'ohusaambwa syaawa, esy'ekoondi doto esaacha ely'omwaaka mulala elitaaliho obufwoolwa bwoosi.

¹³Alala neende esiyaanwa esyo, muchia ohuyiraanga ekiloguraamu chibiri ech'obusye busasaanire neende amafuta k'emiseituuni, hu bibe koti esiyaanwa sy'ebyohulya. Esaami y'esiyaanwa sino, yisangaasa muno Omwaami. Haandi muhoyere ohuyaanaanga alala neende sino siyaanwa, esiyaanwa sy'elita ndala ey'efiini.

¹⁴Mutalichaangaho hu mere njaaha, oba embisi, esaambe, oba eyihubbirwemo omugaati, ohwoola nimumalire ohuleeta esiyaanwa sino eyiri Nasaae. Esilagiro sino sihoyeerwe ohuloondwaanga neende abeechuhulu beeng'we boosi endaalo choosi echiicha mu moni.

¹⁵ “Baleenge ejuma chitaanu-na-chibiri enjichufu, ohutula hu ludaalo luloonda Sabbaato, lu muba nimuleeteraangaho ebikaanda by'emere, ohuyira eyiri Omwaami.”

¹⁶Hu ludaalo lw'amahumi kataanu, oludaalo luloonda Sabbaato ya hataanu-na-habiri, yireenge eyiri Omwaami esiyaanwa siyaaha siindi esy'emere.

¹⁷Buli daala, lihoyere ohuleetaanga emigaati kibiri mani likiyira eyiri Omwaami, koti esiyaanwa sikabuhaaneho. Buli mugaati kuhoyere ohuba nikuholerwe mu kiloguraamu chibiri ech'obusye bukandiirwe alala neende eemera, mani kuhoyere ohuyirwa eyiri Omwaami koti esiyaanwa sy'emere yitaangira ohukeswa.

¹⁸Mani, alala neende emigaati, oluyia lwoosi luhoyeere ohuleeta amakoondi amayere kataanu-na-kabiri ak'omwaaka mulala-mulala, eng'oombe esurusi ndala, amakoondi amamiiku kabiri, nga buli litula libulaho obufwoolwa bwoosi. Bihoyere ohuyaanwa eyiri Omwaami koti esiyaanwa sisaambwa syaawa, haandi alala neende esiyaanwa sy'emere, haandi neende esiyaanwa sy'efiini. Esaami y'esiyaanwa sino, yisaangaasa muno Omwaami.

¹⁹Haandi yanaanga embusi ehole ndala, koti esiyaanwa sy'esyonoono, alala neende amakoondi mayere kabiri amasaacha ak'omwaaka mulala-mulala, koti esiyaanwa sy'ohukobola alala.

²⁰Omulaamisi aba achia ohuyaanayo emigaati ekyo, alala neende amakoondi amayere amasaacha kabiri ako koti esiyaanwa esikabuhaaneho eyiri Omwaami esy'abalaamisi. Ebiyaanwa bino biti byoolerefu nibyo.

²¹Hu ludaalo olwo, mutaholeraangaho emirimo kyeeng'we kya buli ludaalo, nae mwehung'anienge alala ohwiinamiraanga Nasaae. Abeechuhulu beeng'we bosi, bahoyere ohuloondakanaanga neende esilagiro sino endaalo choosi echiicha, yi balibechaanga nibamenyere yoosi.

²²Nimukesa emikuunda kyeeng'we, mutakesaanga emere yohu lwaaho daawe, haandi mutakobolaanga enyuma ohukesa emere yiba niyadoong'aangayo; muyilehereenge abaandu bamanani neende abateende. Niise Omwaami Nasaae weeng'we.

²³Hu ludaalo lutaangira,

²⁴mu mwoosi kutaangira muhoyere ohuhusaanga oludaalo lw'ohuwuuluuha, mani mwehung'aanienge alala ohwiinamiraanga Nasaae nimuwuliraanga ohuubba hw'eturumbete,

²⁵Yaaneenge esiyaanwa sy'emere eyiri Omwaami, haandi muhayeenge ohuholaho emirimo kyeeng'we kya buli ludaalo kyoosi.

²⁶Haandi Omwaami yaboolera Musa ati,

²⁷“Hu ludaalo lw'ehumi, lw'omwoosi kweene kuno kwa hataanu-na-habiri, nilwo oludaalo lw'ohusaasania; luchia ohubechaanga yi muli esiha sy'ohusiiba, mani muchia ohwesaandyaanga, mani mu mala muyaana esiyaanwa sy'omuliro eyiri Omwaami.”

²⁸Oludaalo olwo, mutaholaangaho omulimo kwoosi, olwohuba oludaalo olwo nilwo oludaalo lw'ohuholeraho omuduunga kw'ohumalao esyonoono.

²⁹Omuundu yeesi olyaaho esiindu syoosi hu ludaalo olwo, haba saaba achia ohuyirwa koti oli mulala hu baandu ba Nasaae.

³⁰Haandi omuundu yeesi naaholaho omulimo kwoosi hu ludaalo olwo, Omwaami mweene niye oba naachia ohumwiita.

³¹Esilagiro sino sidiira hu beechuhulu beeng'we boosi, yi baba nibamenya yoosi.

³²Ohutulira elalira elyuuba nilitula, hu ludaalo lwa hataanu-na-hane, ohwoolera elalira elyuuba nilikwa, hu ludaalo lw'ehumi, huseenge Sabbaato koti oludaalo lukabuhaane lw'ohuwuuluuha, hu lweene olwo, sibulao esiindu syoosi esihoyere ohuliibwaho.

³³Omwaami yaboolera Musa ati,

³⁴“Boolera abaandu ba Yisiraeli oti, hu ludaalo lw'ehumi-na-hataanu, olw'omwoosi kuno okwa hataanu-na-habiri, haandi ohumala endaalo chitaanu-na-chibiri, ludaalo lw'Esidyaalo sy'Ebikaali

³⁵Hu ludaalo lutaangira mu ndaalo chino choosi, mwehung'anienge alala mani mwiinamira Nasaae, haandi muhaye ohuluholeraangaho emirimo kyeeng'we kya buli ludaalo kyoosi.”

³⁶Buli ludaalo, ohumala endaalo chitaanu-na-chibiri, muchia ohuyiraanga esiyaanwa sy'esyohulya. Ludaalo lw'ohwiinamira Nasaae nilwo, mani simuchia huluholeraangaho omulimo kwoosi daawe.

³⁷(Bino nibyo ebidyaalo by'esinadiini bi munyaliraho ohwiisaanga oluyaali mu Omwaami, nimwehung'aania alala hulw'ohwiinamira Nasaae, haandi neende ohuyira ebiyaanwa by'ebyaahulya, ebiyaanwa bisaambwa byaawa, ebiyaanwa by'emere, eby'ohwewaayo, neende ebiyaanwa by'efiini, koti lu biba nibidahibwa buli ludaalo.

³⁸Ebidyaalo bino bimeedwa sa hu Sabbaato bya buli ludaalo, nihaandi ebiyaanwa bino byosi bimeedwa sa hu biyaanwa by'eng'we by'olubeerera, neende ebiyaanwa by'eng'we by'ohwooseresa obweyamo bweeng'we, haandi neende ebiyaanwa by'ohwewaayo sa, bi muberesaanga Omwaami.)

³⁹Nimuba nimumalire ohukesa emikuunda kyeeng'we, huseenge esidyaalo sino endaalo chitaanu-na-chibiri, ohuchaakira hu ludaalo lw'ehumi-na-hataanu lw'omwoosi kwa hataanu-na-habiri. Oludaalo lutaangira luchia ohubechaanga oludaalo lw'enjaulo lw'ohuwuuluuha.

⁴⁰Hu ludaalo lweene olwo, bukuleengeho hu misaala kyeeng'we, ebyaamo bihiramo obulai, haandi bukuleenge amasaga k'emisaasa, haandi neende amasaga k'emisaala kyadidya amasaafu, mani mumala muchaaka esidyaalo sy'esinadiini sino ohwiisa oluyaali mu Omwaami, Nasaae weeng'we.

⁴¹Muluhuseenge endaalo chitaanu-na-chibiri enaamba. Esilagiro sino sihoyere ohuloondwaanga neende abeechuhulu beeng'we endaalo choosi echiicha.

⁴²Abaandu ba Yisiraeli boosi bachia ohumenyaanga mu bikaali endaalo chitaanu-na-chibiri choosi,

⁴³hu beechuhulu beeng'we beemeo banyale ohumanya bati, Omwaami yahola abaandu ba Yisiraeli baamenya mu bikaali-kaali sa bityo, niyabeemirira yaabatusa mu Misiri. Oyo niye Omwaami, Nasaae weeng'we.

⁴⁴Mani mu ngira yino, Musa yeecha yaaberesa abaandu ba Yisiraeli amalako k'ohuloondakiriraanga nibahola ebidyaalo by'esinadiini bino, ohwiisa oluyaali mu Omwaami.