Read saamia Esy'Abaleefi 26 Bible Online

Esy'Abaleefi 26 - saamia bible

Esy'Abaleefi 26

¹Omwaami n'aboola ati, “Mutaholaangaho banasaae baandi, oba ohuloonga ebiloongaloongwe, ohweemeha amakina, oba ohubaacha amakina mani mwaamala mwabiinamira daawe. Ese niise Omwaami Nasaae Weeng'we.”

²Holeenge ebidyaalo by'esinadiini, haandi mwiseenge oluyaali abuundu yi mba ninyinamirwaangamo. Ese niise Omwaami.

³ “Nimumenya nimuloondakana neende amalako kaange, mani mwaawulira ebilagiro byaange,

⁴mba njia ohubaleetera efula mu siha siyihoyeramo, hu bulaanu eloba linyale ohwiibula ebirime, haandi emisaala kyaanyala ohwaama ebyaamo.”

⁵Ebilime byeeng'we bichia ohuba ebiingi muno, mani nimunabechaanga nimusiikesa emere mu siha sy'ohunokeramo emisabbiibbu, haandi munabechaanga nimusiinoka emisabbiibbu, mu siha sihoyere ohutaakirwamo emere. Muchia ohuba neende ebyo byoosi bi munadahaanga ohulya, haandi muchia ohumenya mu muleembe mu loba lyeeng'we.

⁶“Njia ohubaberesa omuleembe mu loba lyeeng'we, mani mukoneenge nimutatiire omuundu yeesi. Njia ohumalao ebisolo byoosi ebiteende mu syaalo esyo, haandi eyo haba siyichia ohubechaangayo ebiita haandi kata nabudiidi.

⁷Muchia ohuyiingiraanga abasuku beeng'we esiha syoosi;

⁸bataanu hu baandu beeng'we boong'ene, nibo abachia ohunyalaanga ohuyiingira abateende emia ndala, nae emia ndala hweeng'we, yichia ohunalaanga ohuyiingira abateende elifu ehumi (10,000).

⁹Njia ohubaberesa ehabi, haandi mbaberese abaana baangi muno; njia ohwooseresa ebidiiraho byoosi ebiri mu ndagaano yi ndahola naang'we.

¹⁰Amakesa keeng'we koosi kachia ohubechaanga mu buungi muno, kanyaleenge ohuyiraanga omwaaka omulaamba, nae haandi kata katyo, bichia ohubayikaanga ohusukunaanga eyale ebinabechaanga nibidoong'ereho ebyeekesa ehale, ohwiikulira obweeyaango ekesa yaaha.

¹¹Njia ohubamenyaangamo ni ndi mu yeema lyaange elafu, haandi siinjia ohubatulaho daawe.

¹²Njia ohubechaanga naang'we; njia ohubechaanga Nasaae weeng'we, nae eng'we muchia ohuba abaandu baange.

¹³Ese Omwaami Nasaae weeng'we, ndabatusa mu Misiri hu munyale obutabaaho abawaambe haandi. Ndahalaka amaani kali nikabafwiinyirira aasi, mani ndaaleha mwanyala ohukeenda nimusiingiise emitwe kyeeng'we aakulu.”

¹⁴Omwaami n'aboola ati, “Nimutawulira ebilagiro byaange, muchia ohusaandisibwa.

¹⁵Nimuhaya ohufunihira amalako kaange, neende ebilagiro byaange, mani mwahalaka endagaano yi ndahola naang'we,

¹⁶njia ohubasaandya. Njia ohubaleetera amasira, endwaae chitalereha neende emisuuja kichia ohubaofusa emoni mani kyaakera obulamu bweeng'we bwaweerera kaala-kaala. Muchia ohutaakaanga emwo yeeng'we, nae siyichia hubaholeraangaho esilai syoosi daawe, olwohuba abasuku beeng'we bachia ohubayiingiraanga mani baliicheenge bi muba nimwalimaanga byoosi.”

¹⁷Njia ohubakaluuhanira, munyale ohuyiingirwa, haandi abo ababasyuula nibo abachia ohubatukaanga; muchia ohukwaamo oluteengo luungi muno, oluchia ohukeraanga nimwiiruha sa abeene kata naabulao omuundu yeesi oba nabeeruhania.

¹⁸“Nikali mbwe kata bino byoosi nibiba nibimalire ohuhola bityo, eng'we muba sa nimutaambulira, mba njia ohwiingiya ohusaanda hweeng'we huno hube amahabi kataanu-na-kabiri.

¹⁹Njia ohunyala ohuhalaka esuunga yeeng'we yahayuha eyo; siyichia hubaao efula yoosi, haandi eloba lyeeng'we lichia ohwooma muno, ohwooma koti esibya.

²⁰Emirimo kyeeng'we ky'amaani ekyio, sikyicha hubaholeraangaho esilai daawe, olwohuba eloba lyeeng'we haba sirichia hunyala ohubeebulira ebirime daawe, haandi emisaala kyoosi haba sikichia ohubaamira ebyaamo daawe.

²¹“Nimuba nimunaba nimusyemeeda ohunyiingania, mani nimuhaya ohuumbulira, haandi ese mba njia ohwiingiya ohusaanda hweeng'we ohwo haandi amahabi kataanu-na-kabiri.

²²Njia ohubaleetera ebisolo bilulu muno bibabeemo, mani biite abaana beeng'we, bisihirise ebituke byeeng'we byoosi, mani bibaleheho hweeng'we abaandu abadiidi muno, emyaanda kyeeng'we kibuleho omuundu yeesi okikeenderaho.”

²³“Nikali mbwe kata esibonereso sino syosi nisiba nisimalire ohuwa, haandi simunyala mwaambulira daawe, nae mwemeeda sa ohundeekeresa,

²⁴njia ohubakaluuhanira mani mbasaandye amahabi kataanu-na-kabiri obwoomu ohuhiraho hale.”

²⁵Njia ohubaniaho ebiita, ohubasaandya olw'ohuhaya endagaano yeefwe, mani nimuba nimwebuusira mu biko byeeng'we ohweekisa, njia ohuleetamo amalwaae katalereha, mani muba muchia ohuyiikwa ohweeyamira abasuku beeng'we.

²⁶Njia ohwaakamia eyitulaanga ebyohulya byeeng'we, ohwoola lu bahasi ehumi nibo ababa bachia ohunyalaanga ohudeehera mu ofuna ndala ohuyaana emigaati ki baba nibanyala ohudeeha. Bachia ohupiimanira sa, mani nimuba nimwahamala ohukirya, muchia ohubechaanga nimusiidoong'ere neende enjala yeene liita.

²⁷“Nae nikali mbwe kata luunyuma lwa bino byoosi ohubaao, eng'we naang'we mwemeeda sa ohuhaya ohuumbulira,

²⁸mani neende etima lyaange lyoosi, ohubakobolaho mani haandi hole esaando yeeng'we eyo ohuba yityo amahabi kataanu-na-kabiri obubi ohuhirahoo koti lu biba nibyali hale.”

²⁹Enjala yeeng'we yichia ohuba ey'amaani muno eyirikera kata mwalichaanga abaana beeng'we.

³⁰Njia ohusihirisa ebituundu byeeng'we by'ohwiinamiraangamo ebiri hu bigulu, ngwiise aasi alutaari chiniooheserwaangaho obubbaani, mani male sukune emilaambo kyeeng'we hu biloongaloongwe byeeng'we byafwa. Mu kusinye kuhiramo,

³¹njia ohukaluuhania ebiko byeeng'we bibe amakuunda koong'ene, male sihirise abandu weeng'we w'ohwiinamiraangamo, mani haandi hae ohusimaanga ebiyaanwa byeeng'we byoosi.

³²Njia ohusihirisira elalira eloba lyeeng'we lino, mani abasuku baba nibalimenyamo bachia ohwesiinduha amasira kano.

³³Njia ohubaleetaho ebiita, mani male mbasaalaanie muchie mu maloba mateende. Eloba lyeeng'we lichia ohujwaang'wa, mani ebiko byeeng'we birehwe koti amakuunda.

³⁴“Mani eloba elyo lichia ohusangaalira Sabbaato chalyo, niliba nilisidoong'ere ehaya, nae eng'we nimuli mu maloba k'abasuku beeng'we; mani eloba nalyo linyale ohuwuluuhaho, mani lyeehoyere mu Sabbaato chalyo.

³⁵Nilyahabe nilisidoong'ere niliri ehaya, liba lichia ohuba niliwuluuha, ohuwuluuha hu liba litanyala ohunyoola mu Sabbaato cheeng'we nimwali nimwalimenyaho.

³⁶“Njia ohuhola eng'we ababa nibali mu bwiiruhiro, muteenge muno, ohwoola lu muliba nimuwuliraho sa ohusakasa hw'esaafu kata lala sa liti omuyaka nikuliwuuchaho nikukera emwiiruha sa abeene. Muchia ohwiiruhaanga koti ba bali ohwoongaho mu biita, haandi muchia abeene ohukwichaanga sa kata omusuku nataali aambi naang'we.

³⁷Muchia abeene ohwegumulanaangaho sa kata naabulao oyo yeesi oba naali ohubeeruhania, haandi muchia ohuhaywa ohulwaanaho neende omusuku yeesi.

³⁸Muchia ohufwiira mu bwiiruhiro, nimwamirwa obukala neende eloba ly'abasuku beeng'we.

³⁹Abadiidi hweeng'we abachia ohunyala ohuwonao mu loba ly'abasuku beeng'we, bosi bachia ohung'aya sa nibachiiririra hulw'ebibi byeeng'we abeene, haandi neende hulw'ebibi bya bakuuka yeeng'we.

⁴⁰“Nae abeechuhulu beeng'we bachia ohweeyama ebyonoono byaabwe, neende ebyonoono bya bakuuka yaabwe, abaanyiinganianga, haandi abahayuhaho,

⁴¹mani nibakera nimbakaluuhanira nimbayira mu bwiiruhiro, mu loba ly'abasuku baabwe. Ohwoola lu beechuhulu beeng'we nibeyoloobye nibamalire ohutuunga ekobi ly'ebibi byaabwe abeene, neende ohuhayuha,

⁴²nilwo lu mba njia ohwiichulisa endagaano yaange neende Yakobbo, haandi neende Yisaka, haandi neende Abburahamu, mani njichulise esisuubise syaange esy'ohuberesa eloba abaandu baange.

⁴³Ohutaangira, kata katyo, eloba lino lihoyere ohutuswamo abaandu beenelyo, hu linyale ohwehoyera ohuwuluuha hwiichufu, haandi nabo banyale ohutuungira elalira ohusaandisibwa ohweema hu huhaya amalako kaange neende ebilagiro byaange.

⁴⁴Nae kata katyo, nibaba nibasisiiri mu loba ly'abasuku baabwe, siinjia hubajwaang'ira elalira, oba ohubasihirisira elalira. Esyo siba sichia ohuba nisita enjakamo hu ndagaano yaange nabo, nae kata katyo ese niise Omwaami Nasaae waabwe.

⁴⁵Njia ohukaluuhania endagaano yi ndahola neende bakuuka yaabwe lu ndeekesera ebyaalo byoosi obunyala bwaange, niindusa abaandu baange mu Misiri, hu bibe mbwe, ese Omwaami, nyale ohuba Nasaae waabwe.”

⁴⁶Kano koosi niko amalako haandi nibyo ebilagiro bi Omwaami yaberesa Musa hu Lugulu lwa Sinai hulw'abaandu ba Yisiraeli.