Read saamia Esy'Abaleefi 7 Bible Online

Esy'Abaleefi 7 - saamia bible

Esy'Abaleefi 7

¹Akaloondaho kano niko amalako kadiira hu biyaanwa by'ohutuunga ekobi, ebyoolerefu muno.

²Esisolo sihoyera esiyaanwa sino sihoyere ohwiitirwa hu lwaande lw'emukulu w'alutaari, yi bisolo by'ebiyaanwa bisaambwa byaawa biitirwaanga, mani amabaanga kasyo kanyulaanyusirwa hu nyaande chine choosi ech'alutaari.

³Amasinya kasyo koosi kahoyeere ohutuswamo, kayaanwayo hu alutaari, omuhira kwasyo munulu okwo, neende amasinya kabwiiha hu bituundu by'omuukati,

⁴efuko choosi, alala neende amasinya kachiriho koosi, haandi neende ebituundu bihiramo obulai eby'esini.

⁵Omulaamisi achia yasaamba amasinya koosi akali hu alutaari, hu kabe esiyaanwa sy'ebyohulya esy'Omwaami. Sino nisyo esiyaanwa sy'ohutuunga ekobi.

⁶Buli muundu w'esisaacha mulwiibulo lulaamisi, niye ohoyere ohusilyaaho, nae kata katyo sihoyere ohuliirwa Abuundu Woolerefu woong'ene, olwohuba siba nisiri esyoolerefu muno.

⁷Kata katyo, aliwo esilagiro silala esinyala ohudiira hu biyaanwa bino byoombi, esiyaanwa sy'esyonoono, haandi neende esiyaanwa sy'ohutuunga ekobi, hu bino byoombi, enyama yabyo byoombi, yiba ey'omulaamisi oba nabeere owiimiriire ohuyaana ebiyaanwa ebyo.

⁸Eseero ly'esisolo siyaanwayo koti esiyaanwa sy'esyohusaambwa, lyosi liba liri ely'omulaamisi owimiriire ohuyaana ohwo.

⁹Buli siyaanwa sy'emere syoosi, esiba nisideheerwe mu ofuna, oba syaaba nisitekeheerwe mu sifulya, oba esihalaangiro syoosi, syosi siba siri esy'omulaamisi owimiriire ohusiyaana eyiri Nasaae.

¹⁰Nae ebiyaanwa bitaadeeherwe byoosi, kata neende nibiba nibisaasaaniiswe neende amafuta koosi oba kata sa nibiba nibiri sa ebyoomu, biba biri eby'abalaamisi b'oluyia lw'Arooni, haandi bahoyere ohukabanamo nibaakana-kana.

¹¹Akaloondaho kano niko amalako[2]

¹²Omusaacha yeesi naaba nayaanireyo esiyaanwa sino koti esiyaanwa sy'ohweebasa Nasaae, aba ahoyere ohusiyaanira alala neende esisolo sihoyere ohuyaanwayo, esiyaanwa sy'omugaati kuubbwa mu busye butaabbaahirwe, oba emigaati mihomefu ekyakaandwa neende amafuta k'emiseituuni oba bbisikuuti ebiba nibibahirweho amafuta k'emiseituuni oba keeki ech'obusye bukaandiirwe neende amafuta k'emiseituuni.

¹³Nae alala neende esiyaanwa sy'omuleembe syae esy'ohweebasa achia ohuyaana emigaati ekihubbirwe mu busye obubbaahe.

¹⁴Achia ohuleetaanga buli situundu sya buli embya y'omugaati achia ohuyaanangayo neende omugaati mulala, koti esiyaanwa eyiri Omwaami. Sichia ohuba esiyaanwa sy'omulaamisi ochia ohunyulaanyusa amabaanga ak'ebiyaanwa by'esyonoono.

¹⁵Nae enyama y'esiyaanwa syae sy'omuleembe sy'ohweebasa, yichia ohuliibwaanga hu ludaalo lw'esiyaanwa syae esyo, omulaamisi haba s'ahoyere ohuyilehaangaho kata nabudiidi yaakona bwaahya.

¹⁶Nae omuundu yeesi n'aleeta esiyaanwa sy'ohukobola alala n'adaha ohwooseresa esyeyamo syoosi oba nisiba nisiri esyae omweene, koti esiyaanwa sy'ohweyaanayo hwae, haba sisiyikwa mbwe sihoyere ohuliibwa syoosi syaawa hu ludaalo lweene lwasiyaanirayo daawe, nae nisibaao esyo syoosi esidoong'aho, siba sihoyera ohuliibwa hu ludaalo luloondaho.

¹⁷Nae enyama yoosi eyikona ohwoola oludaalo lwohudatu yiba yihoyeere ohusaambwa yaawa.

¹⁸Nae naabaao eyo yoosi eyiliibwa niyimalire endaalo chidatu, Nasaae aba haba saachia ohusiima esiyaanwa esyo. Esiyaanwa esyo haba sisiba nisichia ohufukiirirwa ohubalirwa hu muundu oyo daawe, nae siba sichia ohuyirwa koti esy'omusiro, mani buli muundu yeesi oba n'achia ohuyirya aba achia ohukiinga esibwaabo sichiiraho.

¹⁹Nae enyama yiindi niyiichia yegeng'aho hu siindu syoosi esiyirwa koti esy'omusiro, haba siiyiba niyihoyeere ohuliibwa daawe, nae yiba yihoyeere ohusaambwa yaawa. Omuundu yeesi oyirwa koti obulaho omusiro niye ohoyere ohulya enyama yino,

²⁰nae omuundu yeesi ow'omusiro naayilyaaho, oyo haba saaba nisinyaliha ohumubala koti mulala hu baandu ba Nasaae daawe.

²¹Haandi omuundu yeesi n'alyaaho hu nyama y'esiyaanwa sino n'amalire ohudiiraho hu siindu syoosi esiyirwa ohuba esy'omusiro, esitula hu omuundu, oba hu sisolo syoosi, omuundu oyo haba saaba nasiibalwa koti mulala hu baandu ba Nasaae daawe.

²²Omwaami mweene wuno niye owaberesa Musa amalako kaloondaho kano

²³akadiira hu baandu ba Yisiraeli. N'aboola ati, amasinya koosi oba ak'eng'oombe, ekoondi, oba embusi sikahoyere ohuliibwa.

²⁴Amasinya koosi ak'esisolo siba nisifwiire oluumbe lwabuli ludaalo, oba esiba nisiitirwe neende esisolo siindi esiteende, kosi haba sikahoyere ohuliibwa daawe, nae kanyala ohwehoonyerwa mu ngira yiindi yoosi.

²⁵Omuundu yeesi olya amasinya k'esisolo siba nisiyaanirwe eyiri Omwaami koti esiyaanwa sy'esyohulya, haba saaba nasiibalwa koti mulala hu baandu ba Nasaae daawe.

²⁶Ataali ohufwaayo hu sifwo syoosi si Abaisiraeli boosi baba nibamenyamo, haba sibahoyere kata nabudiidi ohwehoonyeraanga amabaanga koosi kata sa, amabaanga ak'amayoni, oba amalika ak'ebisolo koti ebyohulya daawe.

²⁷Omuundu yeesi ofunaka elako lino, haba saaba naachia ohubalibwaanga koti mulala hu abaandu ba Nasaae daawe.

²⁸Haandi Omwaami yaaberesa Musa amalako kano

²⁹akadiira hu baandu ba Yisiraeli. Oyo yeesi oyaana esiyaanwa sy'ohukobola alala, ahoyere ohuleetaanga esituundu syasyo siindi koti esiyaanwa sikabuhaaneho esy'Omwaami,

³⁰omweene n'asileeta neende amahono kae keene koti esiyaanwa sy'ebyohulya. Ahoyere ohuleeta amasinya koosi ak'esisolo esyo, alala neende esigwoogwo syeene, mani amale abileete koti esiyaanwa sikabuhaaneho esy'Omwaami.

³¹Omulaamisi aba achia ohubukula amasinya ako koosi mani akasaambire hu alutaari, nae esigwoogwo siba sichia ohuba esy'abalaamisi.

³²Nae esinama sy'adaho sy'omuhono muluungi, sihoyere ohubereswa koti obuhoonyi bw'enjaulo

³³eyiri omulaamisi oba nayaanireyo amabaanga alala neende amasinya k'esiyaanwa esyo esy'ohukobola alala.

³⁴Nae esigwoogwo sy'esisolo esyo, siba siri esiyaanwa sikabuhaaneho, nae esinama sy'adaho sy'omuhono muluungi, ni obuhoonyi bukabuhaane si Omwaami yabukula hu baandu ba Yisiraeli, mani yaasiberesa abalaamisi. Kuno nikwo omukabo ku baandu ba Yisiraeli bahoyere ohuberesaanga abalaamisi endaalo choosi echiri mu moni.

³⁵Sino nisyo silala hu byohulya ebiba nibibeereeswe Omwaami ebyali nibyabereswa Arooni alala neende abaana bae hu ludaalo lu baba nibawuulirwaho ohuba abalaamisi.

³⁶Hu ludaalo olwo, Omwaami yalagira abaandu ba Yisiraeli bababereseenge omukabo kuno ohutula hu siyaanwa sino. Sino silagiro si baandu ba Yisiraeli bahoyere ohufunihiraanga endaalo chiichayo choosi.

³⁷Nae bino nibyo amalako akadiira hu biyaanwa bisaambwa byoosi, ebiyaanwa by'emere, ebiyaanwa by'esyonoono, ebiyaanwa by'ohutuunga ekobi, ebiyaanwa by'ohwaawula, alala neende ebiyaanwa by'ohukobola alala.

³⁸Eyo, hu Lugulu lwa Sinai mu siparara, Omwaami niyo yi yabeeresera Musa amalako kano, hu ludaalo lu yalagira abaandu ba Yisiraeli ohuyaanaanga ebiyaanwa byaabwe bino.