Read saamia Esy'Abaleefi 9 Bible Online

Esy'Abaleefi 9 - saamia bible

Esy'Abaleefi 9

¹Hu ludaalo luloonda hu humaliirisa emiduunga ky'ohwaawula, Musa yalaanga Arooni alala neende abaana bae, alala neende abeemirisi ba Yisiraeli boosi bebuusa.

²Niyamala atyo, yaboolera Arooni ati, “Chia obukule esurusi enjere ndala alala neende ekoondi emiiku litaaliho obufwoolwa bwoosi lyosi lala, mani wiiche obiyaane eyiri Omwaami. Esurusi eyo yichia ohuba esiyaanwa sy'esyonoono, nae ekoondi libe ely'esiyaanwa sisaambwa syaawa.

³Noomala otyo, chia oboolere abaandu ba Yisiraeli bachie babukule buli muundu yeesi, abukule embusi ehole, ey'esiyaanwa sy'esyonoono, emoosi y'omwaaka mulala, alala neende ekoondi doto ely'omwaaka mulala elitaaliho obufwoolwa bwoosi, libe ely'esiyaanwa sisaambwa syaawa,

⁴haandi neende esurusi ndala, haandi neende ekoondi emiiku lala, ebiba ebiyaanwa by'ohukobola alala ohulai. Bahoyere ohubiyaana eyiri Omwaami alala neende ebiyaanwa eby'emere, eyisaasirwe neende amafuta. Bahoyere ohuhola batyo olwohuba Omwaami achia ohubabonehera enyaanga yino.”

⁵Abaisiraeli abo babukula buli siindu syoosi si Musa yali n'abalagiire mani nibabileeta byoosi mu moni w'Eyeema, mani oluyia olwo lwoosi niluhung'aana alala ao ohwiinamira Omwaami.

⁶Bulaanu Musa niyabona atyo yaboola ati, “Omwaami niye obalagiire ohuhola bino byoosi, hu bulaanu obulafu bwae bumesa-mesana, obw'ohubaao hwae, hu bunyale ohubabonehera eng'we mweesi.”

⁷Mani bulaanu yaboolera Arooni ati, “Ewe chia eyiri alutaari, mani oyaane esiyaanwa sy'esyonoono, alala neende esiyaanwa sy'ohusaamba syaawa, hu binyale ohumalao ebyonoono byao, haandi neende ebyonoono by'abaandu boosi. Yaanayo sino siyaanwa, sinyale ohumalao ebyonoono byoosi eby'abaandu bano, koti sa lu Omwaami alagiire.”

⁸Arooni yeemao yaachia eyiri alutaari eyo mani yeeterayo esurusi njere yibe esiyaanwa sy'ebyonoono byae omweene.

⁹Abaana bae nabo bamuleetera amabaanga, niyeenihamo olwaala lwae lulala, naachia naabaha amabaanga kaandi hu bituundu byooki ebiri hu buli soonda y'alutaari, naachuha akadoong'ereho aasi w'obweemero bw'alutaari.

¹⁰Yasaambira hu alutaari amasinya koosi, efuko choombi, haandi neende ebituundu bihiramo obulai eby'esini, koti sa lu Omwaami yali n'alagiire Musa.

¹¹Nae yabukula enyama yoosi alala neende eseero lyeene mani yaatula yaachia yaabisaambira erwaanyi w'ekaambi.

¹²Yeeta esyaayo syali esy'esiyaanwa syae sy'ohusaamba syaawa. Abaana bae nabo bamuleetera sa amabaanga, yaakanyulaanyusa hu nyaande chine choosi ech'alutaari.

¹³Haandi baamudiisa omutwe, alala neende ebituundu biindi by'esyaayo esyo, mani yaabisaambira hu alutaari.

¹⁴Omweene yeemao yaabukula eby'enda byoosi alala neende ebinama by'adaho byoosi, mani yabyoosa bulai bweene yaabisaambira hu alutaari, humukulu w'esiyaanwa sy'ohusaamba syaawa.

¹⁵Bino byoosi nibyawa, yeemao yachaaka ohuyaanayo ebiyaanwa by'abaandu baandi. Yabukula embusi eyali niyihoyeere ohuyaanwa hulw'ebyonoono by'abaandu boosi, mani yayiita, yaayiyaanayo, koti sa lu yahola n'ayaanayo esiyaanwa sy'esyonoono syae omweene.

¹⁶Haandi yaleeta esyaayo sy'esiyaanwa sy'ohusaamba syaawa, mani yaasiyaanayo naloondakirira amalako kaahwo.

¹⁷Yayaanayo esiyaanwa sy'emere, mani yaabukula obusye oluyu lulala, mani yasaambira hu alutaari. (Sino syali nisimeeda hu siyaanwa sya buli ludaalo esisaambwa syaawa.)

¹⁸Bulaanu yeemao yeeta esurusi, haandi neende ekoondi emiiku lira koti esiyaanwa sy'ohukobola alala hulw'abaandu baandi. Abaana bae babukula amabaanga, baamuleetera, yaakanyulaanyusa hu nyaande chine choosi ech'alutaari.

¹⁹Arooni wuno nae yabukula ebituundu binulu byoosi eby'esurusi eyo, haandi neende ekoondi emiiku elyo

²⁰yaabikereha humukulu w'ebigwoogwo by'ebyaayo ebyo, yaabikiinga yaabiyira eyiri alutaari. Yabukula amasinya koosi mani yaakasaambira hu alutaari

²¹haandi yaayira ebigwoogwo, neende ebinama by'adaho by'enyaande ch'emihono miluungi ohuba esiyaanwa esikabuhaanehooho eyiri Omwaami, esy'abalaamisi, koti lu Musa yali n'alagiire.

²²Arooni niyali n'amalire ohuyaanayo ebiyaanwa ebyo byoosi, yasiingisira hu baandu abo boosi amahono kae, yaabasabira ehabi, mani yaamala yeehala aasi.

²³Musa neende Arooni boombi beemao baachia beengira mu Yeema ly'Ohubaao hw'Omwaami, mani nibatulamo, basabira abaandu boosi ehabi, mani obulafu bumesa-mesana bw'Ohubaao hw'Omwaami bweemao bwaabonehera abaandu boosi.

²⁴Abweene ao, Omwaami yaleeta omuliro, kwamuuheenya kwaamalao esiyaanwa sisaambwa syaawa esyo syoosi, alala neende amasinya koosi akali hu alutaari. Abaandu nibabona batyo, boosi bachaaka ohuubba esiyoka nibaguunamia obweeni bwaabwe nibwegeeng'aanga hu buloba.