Read saamia Yeremia 10 Bible Online

Yeremia 10 - saamia bible

Yeremia 10

¹Abaisiraeli, wulire emboosi chi Omwaami ababoolera. Omwaami aboola ati:

²“Muteekaanga ebiima b'ebyaalo biindi. Mutichaanga obulolero bwomu kulu kata neende ebyaalo biindi nibitya obulolero obwo;

³olwohuba esaambo chomu byaalo ebyo, chibulamo obuhoonyi.” Omuundu atema omusaala mu sichaha mani kwaakwa aasi, omubaachi yaakubaacha bulai muno.

⁴Abaandu nibakunyirisa neende efeesa neende esaabbu. Mani nibakuhoma neende emisumaari ohukwomiisa kwaahaya ohudeengaana.

⁵Ebiloongaloongwe bwaabwe ebyo biri koti ebyo bi bata mu ndalo y'omucheere ohwiirusa amayoni. Ebifwaanani ebyo haba sibinyala ohulomaloma. Babikiinga-bukiinga, olwohuba haba sibinyala hukeenda. Mutabitya daawe, olwohuba sibulao esyonoono si binyala ohuhola, oba ohubaholera esilai.

⁶Ewe Omwaami, abulao oli koti ewe. Oli omuhunuufu, haandi eliita lyao ly'obunyala bw'amaani.

⁷Wiina mweene otahoyera ohuhwiisamo oluyaali, Ewe Omutuki w'ebyaalo? Ohoyera ohwiiswamo oluyaali, olwohuba mu bakesi boosi abali mu byaalo neende mu butuki bwaabwe bwoosi abulao oli koti ewe.

⁸Boosi-boosi basiru haandi babulamo amakesi; abeekesa eby'obusiru ebidiira hu ebiloongaloongwe byaabwe by'emisaala.

⁹Ebifwaanani byaabwe babibwiihaho efeesa nyuhuule ohutula Tarisiisi neende esaabbu yitula Yufasi. Abetaanyi nibo ababihola. Babifwaasa engubo cha papo neende enjahanyu. Ebyo byoosi biholwa neende abanabi b'engubo bamanyirifu.

¹⁰Nae Omwaami, niye Nasaae waadyeeri. Niye Nasaae mulamu haandi Omutuki w'endaalo choosi.

¹¹Mubaboolere muti: “banasaae abo abataloonga ekulu neende esyaalo, bachia ohusihiirira ohutula hu syaalo, bahasihirire elalira.”

¹²Omwaami niye owaloonga esyaalo neende obunyala bwae Amakesi kae niko akatao esyaalo, haandi ohumanya hwae nihwo ohwabaamba ekulu.

¹³Naalagira amaachi kali aakulu, nikawoola, haandi niye osiingisa enaang'oong'o ohutula mu soonda ch'esyaalo. Niye oleeta olumesu mu fula, haandi yaaleeta omuyaka ohutula yi kwamenya.

¹⁴Obusiru budiirire buli muundu haandi baweeremo amakesi. Buli mwiitaanyi w'esifwaanani sy'esaabbu, esoni chimudiirire; olwohuba ebiloongaloongwe byaabwe by'obubacha, bibulamo obulamu.

¹⁵Bibula neende obuhoonyi, by'obubacha buhaya. Mu biha by'ohusaandisibwa, byahasihiriswe.

¹⁶Nasaae wa Yakobbo haba saali koti ebiloongaloongwe ebyo, olwohuba niye owaloonga ebiindu byoosi; haandi yadoolamo Yisiraeli ohuba esyaalo syae syeene. Omwaami w'Obunyala nilyo eliita lyae.

¹⁷Eng'we abomu Yerusalemu, abasuku babeebodohaanie, mani mubuuse alala emigugu kyeeng'we!

¹⁸Olwohuba Omwaami aboola ati: “Bone, bulaanu, njia ohusukuna erwaanyi abaandu bomu syaalo sino. Njia ohubakwiisamo amasira, buli muundu asaande.”

¹⁹Chitwaakaanire, olwohuba hunyayaalirwe! Ebikoonjo byeefwe haba sibyohuwona daawe. Nae nimboola endi, “Mubwadyeeri kano masira niko, mani huhoyere hweesimiirise.”

²⁰Amayeema keefwe kasihiriiswe, emikoye kikaboya kihalaakwe. Abaana beefwe batutulireho, boosi babulao. Abulao omuundu onatuleegera amayeema haandi, haandi abulao omuundu onaanihe engubo chamwo.

²¹Olwohuba abeemirisi basiru nibo, haandi haba sibeeteeba hu Omwaami. Mani sakira batahulaahulana, haandi abaandu babeemirira basalaanire.

²²Tekeerese, mbulira olubweeru! Bone, mbao lwiicha! aluwo ohwesasaakula hw'amaani ohutula mu syaalo sy'emukulu, ahanaakere ebiko byomu Buyudaaya byeehola ekuunda, yi mabbwe kamenya.

²³Ewe Omwaami, ese manyire endi obulamu bw'omuundu haba sibuli mu bunyala bwae omweene, haandi endi abulao onyala ohweliinda omweene.

²⁴Ewe Omwaami, tukolole mu saambo ndai; mani otatwaalabira muno, ataali ao, huchia ohusihirira.

²⁵Etima lyao liyire eyiri ebyaalo bitaahumanyire, neende eyiri abaandu bahweetusaho, olwohuba nibo abaandu beeta abaandu bao. Abo nibo ababeeta mani babasihirisira elalira, mani baaleha esyaalo syeefwe nisidoong'ere ekuunda.