Read saamia Yeremia 14 Bible Online

Yeremia 14 - saamia bible

Yeremia 14

¹Emboosi yi Omwaami yaboolera Yeremia eyidiira hu siminyu:

²“Buyudaaya sirira haandi ebiko byasyo biteng'engaale. Abaandu bamwo beehaale hu loba nibali mu ngisa, mani amaliro ka Yerusalemu kaniina akula.

³Abahunuufu bamwo batuma abahalaabani baabwe hu mwaalo; bachia hu sulo chaabwe, nae baahaya ohunyoolayo amaachi, mani baakobola esyoongo nichibulamo amaachi. Esoni chibadiira bawaamo amaani mani nibebwiiha mu moni.

⁴Olwohuba efula yibulao, eloba lyoomereere mani biheheere abalimi, mani nibebwiiha hu mitwe kyaabwe.

⁵Kata emboongo yileha mu siino omwaana kwao ku yibuule olwohuba obunyaasi bubulao.

⁶Esuhiri ndeende cheema hu bigulu bibulaho obunyaasi, mani nichiyeera nichaasamiriire koti amabbwe; haba sichibona bulai olwohuba chibula esyohulya.

⁷“Kata ebyonoono byeefwe bituheengera omusaango, Ewe Omwaami, tuhoonye koti lu watusuubisa. Olwohuba huhutulireho amahabi maangi muno, hwahola ebyonoono yooli.

⁸Ewe niiwe esuubi ly'abaandu bao Abaisiraeli, niiwe obawonia mu biha by'obudinyu. Lwasiina oli koti omuteende mu syaalo, koti walukeenda okona oludaalo lulala lwoong'ene?

⁹Lwasiina oli koti omuundu wadangaala, koti omusikaari w'amaani otanyala ohuwonia? Mubwadyeeri bweene, Ewe Omwaami, oli akatikaati weefwe, mani efwe huli abaandu bao; otatujwaang'a daawe.”

¹⁰Omwaami aboola ebidiira hu baandu bano ati: “Abaandu bano baheera ohuundulaho bati, haandi haba sibeetuka daawe. Mani sakira Omwaami haba saabafukiirira daawe bulaanu achia ohwiichulisa ebyonoono byaabwe mani abasaandye hulw'ebyonoono byaabwe.”

¹¹Omwaami yamboolera ati: “Haba siwekongooyera abaandu bano ohuba bulai.

¹²Kata basiibe batye, haba siinjia ohuwulira amaliro kaabwe, neende abahayaana ebiyaanwa bisaambwa neende ebiyaanwa by'emwo, haba siinjia ohubifukiirira daawe; nae njia sa ohubasihirisa neende ebiita, haandi mbeete enjala haandi neende amalwaae.”

¹³Mani nimboola endi: “Aaa, Omwaami Nasaae, bona, abanabbi bababooleraanga bati, ‘Haba sibahabone ebiita, oba enjala yaabaluma, nae bomisaanga bati, omuleembe kuchia ohuba mu syaalo muno.’ ”

¹⁴Mani Omwaami niyamboolera ati: “Abanabbi bali ohulaangaanga eby'obubacha nibehoonyera eliita lyaange. Haba siimbatumaangaho, oba mbalagira, oba nomanomaho nabo daawe. Ebiindu bi balaanga yi muli, huboneherwa hw'obubacha hwoong'ene, ohutaalimo obuhoonyi, haandi bubacha buli mu bibaaso byaabwe byeene.

¹⁵Mani sakira Omwaami aboola ebidiira hu banabbi balaanga mu liita lyaange, kata ndahaba nitabatuma, haandi ababoola bati, ‘Olugaanga neende enjala haba sibyahakwe mu syaalo sino’: Olugaanga neende enjala nibyo ebyaheete abanabbi abo.

¹⁶Mani baandu babalaangira bosi bahafwe ebiita neende enjala, mani emilaambo kyaabwe kisukunwe hu ngira chomu Yerusalemu, abuleo omuundu owukisiiha daawe. Emilaambo kyaabwe, alala neende eky'abahasi baabwe, alala neende eky'abaana baabwe basyaani neende abaana baabwe bahaana. Olwohuba njia ohubetuunga omweene hulw'ebibi byaabwe.

¹⁷Omwaami mani naalagira ohuboolera abaandu ebidiira hu ngisa yaange haandi ohuboola endi: ‘Lehe emoni chaange chihulukuse amasika esiro neende esideete, mani haye ohwaakama ohulira, olwohuba abaandu baange bafumiitwe amahaande, haandi banyayaalirwe bubi muno.

¹⁸Ningeendaho ndaachia mu siino, bone, nyoolayo sa emilaambo ky'abaandu beeterwe neende olugaanga. Nae niinyingira mu siko, bone, nyoolayo sa abafwa enjala. Olwohuba abanabbi alala neende abalaamisi bahweeserwe baayirwa mu syaalo sibataamanyireho kata nabudiidi.’ ”

¹⁹Ewe Omwaami, osukuniire elalira abaandu bomu Buyudaaya? Osyuliire elalira abaandu bomu Siyooni? Lwasiina otufumiite otyo mani hwaahaya ohuwona daawe? Hwasuubira omuleembe, nae abulao esilai si hwanyoola. Hwasuubira ohuwoniswa, nae bone, hwanyoola amatiichasi koong'ene.

²⁰Ewe Omwaami, hufukiirira ebyonoono byeefwe, neende ebyonoono bya bakuuka yeefwe, olwohuba hwahola ebyonoono yooli.

²¹Otatuhaya daawe, hulw'oluyaali lw'eliita lyao; haba otayaambya Yerusalemu esoni, abuundu w'obwiihalo bwao bw'oluyaali. Yichulisa mani ohaye ohuhalaka Endagaano yao naafwe.

²²Baluwo mu banasaae bataali abadyeeri abomu byaalo biindi abanyala ohukwiisa efula? Oba ekulu hu bwalyo lyoong'ene lyakwiisa olufuuchakirisi? Ewe Omwaami, niiwe Nasaae weefwe. Niiwe yi hweesika weeng'ene, olwohuba niiwe ohola ebiindu bino byoosi.