Read saamia Yeremia 16 Bible Online

Yeremia 16 - saamia bible

Yeremia 16

¹Omwaami haandi yalomaloma naange n'aboola ati:

²“Ewe Yeremia, otadeehya omuhasi, oba weebula abaana basyaani oba abaana bahaana abuundu ano.”

³Olwohuba Omwaami aboola bino ebidiira hu baana basyaani neende abaana bahaana abeebulwa mu bweyaango buno, haandi ebidiira hu beebusi baabwe bahasi neende abeebusi baabwe basaacha, abo ababeebulirwa ano.

⁴Bahafwe oluumbe lubi muno. Haba sibahabalire, haandi emilaambo kyaabwe haba sikyahasiihwe; emilaambo kyaabwe kyaheebuungihe kyaaba koti ebituuli by'embolera. Baheetwe neende olugaanga haandi neende enjala. Emilaambo kyaabwe kyaheehole ebyohulya by'amayoni neende ebisolo byomu siino.

⁵Olwohuba Omwaami aboola ati: “Oteengira mu nyuumba yi baliriramo. Otalira omuundu kata mulala, haandi engisa yitahudiiraho hulwaabwe. Olwohuba mbatusireho omuleembe ku ndali nimbereese abaandu bano, haandi mbatusireho obuheeri bwaange hutaakama neende esisa syaange.”

⁶Abahunuufu alala neende ababula oluyaali boombi bachia ohufwiira mu syaalo sino. Haba sibachia hubasiiha, haandi abulao ochia ohubalira. Abulao ochia ohweheenga omweene oba yeemudulaho efwiiri omweene.

⁷Abulao owaliireho ebyohulya alala neende omulisi yeesi, ohumulemia omwooyo nafwiiriirwe. Abulao owahamubeeho amaachi kohung'wa n'afwiiriirwe laatang'ene oba ng'ina.

⁸Oteengiraanga mu nyuumba yibaholeramo esidyaalo mani wehala ohulya oba ohung'wa alala nabo.

⁹Olwohuba Omwaami w'Obunyala, Nasaae wa Yisiraeli aboola ati: Bone, eng'we nimusisiiri abalamu, haandi nimusiibona, njia ohwaakamya mu abuundu ano amakono k'esidyaalo, neende ohweehoya hw'esangaalo, amakono k'ohudeehisania.

¹⁰Nae noboolera abaandu bano emboosi chino choosi, bachia ohuhuteeba bati, Lwasiina Omwaami alaangire ati amasira k'amaani kachia ohutukwaaho? Huholere musaango siina? Sibi siina si huholeere Omwaami Nasaae weefwe?

¹¹Mani ewe ochia ohubaboolera oti: “Olwohuba bakuuka yeeng'we baandulaho mani bachaaka ohuhalaabanira neende ohwiinamira banasaae baandi. Bandeebwaaba haandi baahaya ohuliinda amalako kaange Omwaami niye oboola.

¹²Nae eng'we muholere ebyonoono bihiraho ebya bakuuka yeeng'we. Olwohuba bone, buli muundu hweeng'we, w'esyeejo, haandi aloondakana neende ebibaaso byae bibi, mani yaahaya ohuumbulira.

¹³Mani sakira njia ohubeerusa mutule mu syaalo sino, mbasukune mu syaalo si mutaamanyireho daawe, kata si bakuuka yeeng'we bali nibatasimanyaho daawe. Mani eyo niyo yimunahalaabanireenge banasaae baandi esiro neende esideete, haandi haba siinjia hubakwiira esisa daawe.”

¹⁴Omwaami aboola ati: “Mani sakira, bone, ebiha bichia ohwoola, abaandu bahaye ohweechuba nibaboola bati: ‘Koti lu Omwaami ali omulamu, oyo owatusa abaandu ba Yisiraeli mu syaalo sya Misiri,’

¹⁵nae bachia ohweechuba nibaboola bati: ‘Koti lu Omwaami ali omulamu, oyo owatusa abaandu ba Yisiraeli ohutula mu syaalo sy'emukulu neende mu byaalo byoosi bi bali nibayirirwemo.’ Olwohuba njia ohubakobosa mu syaalo syaabwe syeene, si ndaberesa bakuuka yaabwe.”

¹⁶Omwaami aboola ati: “Bone, njia ohutuma abanaabi baangi beeche banaabe abaandu bano. Haandi luunyuma, njia ohutuma abayiimi baangi, abachia ohuyiima abaandu hu buli lugulu neende hu buli sigulu, neende mu ng'uungu chomu makina.

¹⁷Olwohuba mbona buli siindu sibahola. Sibulao esyeekisa si taamanyire daawe. Haandi ebyonoono byaabwe sibinyala ohukiswa ni taabibweene daawe.

¹⁸Njia ohubatuungya amahabi kabiri olw'ebibi byaabwe neende omusaango kaabwe. Olwohuba banyaasire esyaalo syaange nibasiichusamo ebiloongaloongwe byaabwe ebiri koti emilaambo, haandi beechuuse obumenyo bwaange neende eby'omisiro byaabwe.”

¹⁹Ewe Omwaami, niiwe amaani kaange haandi omuliindi waange, niiwe obwiiruhiro bwaange mu biha by'obudinyu. Niiwe yi baandu bomu byaalo byoosi beecha yooli nibatula mu soonda ch'esyaalo, nibaboola bati: “Bakuuka yeefwe, banyoola eby'obubacha byoong'ene ebitaalimo obuhoonyi haandi ebitaalimo engaanga daawe.

²⁰Omuundu anyala ohweloongera nasaae? Oyo haba saabanasaae kata nabudiidi.”

²¹“Mani sakira, bone, njia ohubeekesa bamanye, luno njia ohubeekesa bamanye amaani kaange neende obunyala bwaange. Ao niwo yibahamanyire bati eliita lyaange nilyo Omwaami.”