Read saamia Yeremia 17 Bible Online

Yeremia 17 - saamia bible

Yeremia 17

¹Omwaami aboola ati: “Eng'we abaandu bomu Buyudaaya, esyonoono syeeng'we syaandiikwa neende ekalaamu y'esyuuma. Sibaachirwe hu myooyo kyeeng'we neende ekina ly'engaanga lya daimoondi, neende hu soonda chohu alutaari cheeng'we.

²Abaana beeng'we beenamira hu alutaari chaabwe, haandi beenamira Aserimu, nasaae muhasi, neende ebilolero byae ebiri hu buli musaala muhoongo neende buli bigulu bileeyi,

³neende hu buli ngulu chiri alafu mu syaalo. Obuyiinda bweeng'we neende eby'engaanga byeeng'we byoosi, njia ohubiberesa abasuku beeng'we babipeeye; ohubatuunga olw'ebibi bi mwahola mu syaalo syeeng'we si ndababeresa syoosi.

⁴Muchia ohuleha esyaalo si ndababeresa, muhalaabanire abasuku beeng'we mu syaalo si mutaamanyire, olwohuba mwaaduuse omuliro hu tima lyaange, omuliro kuchia ohwaaduha endaalo choosi.”

⁵Omwaami aboola ati: “Mubwaabe, oyo oweesika omuundu waasye, oweesika amaani k'omuundu sa, yi mwooyo kwae kutulire hu Omwaami.

⁶Ali koti omusaala kuli mu siparara, haandi haba saabona esilai syoosi. Achia ohumenya mu bituundu byomu sichiimi, mu siroongo sitaalimo abaandu.”

⁷W'ehabi oyo oweesika Omwaami, ota esuubi lyae mu Omwaami.

⁸Ali koti omusaala kwataakwa aambi neende omwaalo, ku misi kyakwo kilaanda nikichiira eyiri amaachi. Haba sikutya omubasu nikwiicha, olwohuba amasaafu kakwo haba sikahooha daawe. Haba sikudeeba endaalo ch'esiminyu, olwohuba haba sikwaakama ohwaama ebyaamo.

⁹Omwooyo n'omubacha nikwo ohuhira ebiindu byoosi, haandi muliichaki nikwo. Wiina onyala ohumanya omwooyo kw'omuundu?

¹⁰ “Ese Omwaami, ngoonyeresa ebibaaso by'omuundu haandi ndaateema omwooyo kwae. Mberesa buli muundu omukabo ohweema hu biima byae, neende hu biholwa byae.”

¹¹Koti lu ngoho yikonera mani yaalula amaki k'ehaanga, nilwo lu muundu onyoola obuyiinda mu ngira mbi ali. Obuyiinda bwahamuweeho n'asisiiri ohukofula, mani Munjakamo yadoong'a naali omusiru n'abulaho esiindu syoosi.

¹²Enyuumba ya Nasaae yeefwe yiri koti esisaala sy'obutuki sy'oluyaali, esyateebwa aakulu ohutulira elalira muhuchaaka.

¹³Ewe Omwaami, niiwe esuubi lya Yisiraeli, abo boosi abahutulaho, esoni chahabadiire. Abo abahutulaho, ameeta kaabwe kahaandiikwe mu lufu, olwohuba batulire hu Omwaami, esulo y'amaachi malamu.

¹⁴Ewe Omwaami, monie, mani njia ohuba bulai; njabine, mani njia ohuwona elalira. Olwohuba niiwe yi fumia.

¹⁵Bona, baateeba bati: “Emboosi chi Omwaami alomaloma chiri yeena? Meni Lehe choolerere!”

¹⁶Nae ewe Omwaami, haba sindahuyiikaho ohubakwiisaho ebidinyu daawe, oba ndekoombaho endi amasira kabooleho. Omwaami sino osimanyire. Emboosi chitula mu munwa kwaange ochimanyire bulai muno.

¹⁷Ewe Omwaami, otaandiisa daawe; olwohuba niiwe obwiiruhiro bwaange mu biha by'obudinyu.

¹⁸Leha abo abadaha ohuunjita, esoni chibadiire, nae otaleha esoni chandiira daawe. Leha beeyendeherere; nae otaleha ese ndeeyendeherera. Leha amasira kabakweeho; basaandye amahabi kabiri mani obasihirise.

¹⁹Omwaami yaamboolera ati: Yeremia, chia mani olaangirire emboosi chaange mu siruwa silaangwa siti, Esiruwa sya Bbenjamini, esiruwa si batuki ba Buyudaaya babitamo nibeengira haandi nibatula mu siko sya Yerusalemu,

²⁰mani oboole oti: Wulire Emboosi y'Omwaami, eng'we abatuki bomu Buyudaaya, neende abomu Buyudaaya mweesi, neende abaandu bamenya mu Yerusalemu, eng'we abeengirira mu biruwa bino.

²¹Omwaami aboola ati: Nimuheera obulamu bweeng'we, mani mweliinde, muhaye ohukiingaho omugugu kwoosi-kwoosi hu ludaalo lwa Sabbaato oba ohwiingisaho esiindu syoosi mu biruwa bya Yerusalemu.

²²Mutakiingaho esiindu syoosi-syoosi hu ludaalo lwa Sabbaato, oba ohuhola omulimo kwoosi, nae muliinde oludaalo lwa Sabbaato, lube olwoolerefu, koti lu ndalagira bakuuka yeeng'we.

²³Nae haba sibawulira oba baatekeeresa, nae boomya emyooyo kyaabwe, mani baahaya ohuwulira neende ohudiira bi mbeekesa.

²⁴Omwaami aboola ati: “Nae nimutekeeresa bi mboola, mani mwaahaya ohuleeta emigugu mu siko sino hu ludaalo lwa sabbato, mani mwaaliinda oludaalo lwa Sabbaato koti olwoolerefu mwaahaya ohuholaho emirimo hu ludaalo olwo kata nabudiidi.

²⁵Abatuki baba bachia ohwiingiraanga nibabitira mu biruwa by'esiko sino.” Abo abeehala hu sisaala sy'obutuki sya Daudi, nibeeruhira hu bigaari neende hu faraasi. Eng'we, neende abahunuufu beeng'we neende abaandu bamenya mu Yerusalemu; mani mu siko sino, abaandu banaamenyeengemo buli ludaalo.

²⁶Mani abaandu banecheenge nibatula mu biko byomu Buyudaaya neende mu bituundu byebodohaanie Yerusalemu, ohutula mu syaalo sya Bbenjamini, neende ohutula Sefela, ohutula mu syaalo sy'ebigulu, neende ohutula Negebbu, baheeche nibaleeta ebiyaanwa bisaambwa, neende ebiyaanwa biindi, ebiyaanwa by'emwo neende obubbaani, haandi nibaleeta ebiyaanwa by'ohweebasa mu nyuumba y'Omwaami.

²⁷Nae nimutaambulira, mani mwaahaya ohuliinda oludaalo lwa Sabbaato koti olwoolerefu, neende mwaalukiingiraho emigugu nimwiingira nimubitira mu biruwa bya Yerusalemu hu ludaalo lwa Sabbaato, mba njia ohuwaambya omuliro hu biruwa byasyo, omuliro kuchia ohusaamba amadooho komu Yerusalemu mani abuleo omuundu onyala ohusimya omuliro okwo.