Read saamia Yeremia 19 Bible Online

Yeremia 19 - saamia bible

Yeremia 19

¹Omwaami yamboolera ati: “Yeremia, chia okule esyoongo y'eloba, oyireho abaandi hu beemirisi b'abaandu, neende abaandi hu balaamisi bahunuufu,

²mani otule ochie hu Siruwa Sy'olukyo, esiri mu hooho lya Hinoomu, obayaalire emboosi chi njia ohuhuboolera.”

³Ochia ohuboola oti, Eng'we abatuki bomu Buyudaaya, neende eng'we abaandu bamenya mu Yerusalemu, wulire Emboosi y'Omwaami. Omwaami w'Obunyala, Nasaae wa Yisiraeli aboola ati, Bone, njia ohukwiisa esibi abuundu ano, mani syahawukise buli muundu olisiwuliraho.

⁴Olwohuba abaandu baange baandulireho, mani baanyaasa abuundu ano nibaniooheserao obubbaani eyiri banasaae baandi ba bataamanyire, noomba bakuuka yaabwe, oba abatuki ba Buyudaaya bali nibataamanyire; haandi olwohuba beechuuse abuundu ano neende amabaanga kabulaho omusaango, njia ohuhola esiindu esyo.

⁵Haandi boombaahe ebituundu bihunuufu by'ohusaambiramo abaana baabwe basyaani koti ebiyaanwa bisaambwa eyiri Bbaali. Ese haba simbalagiraangaho, haandi sisibechaangaho mu bibaaso byaange ohuhola esiindu siri sityo.

⁶Mani sakira bone, Omwaami aboola ati, ebiha bichia ohwoola, abuundu ano ahaye ohulaangwa ati Tofeti, oba ati ehooho lya Hinoomu, nae silaangwe siti, Ehooho ly'ohufwa.

⁷Mani abuundu ano niwo yi njia ohunyaasira endekeha ch'abaandu bomu Buyudaaya neende abomu Yerusalemu. Njia ohukera abasuku baabwe babayiingire haandi babeetere mu biita. Emilaambo kyaabwe njia ohukiberesa amayoni neende ebisolo byomu siino bichilye.

⁸Njia ohusihirisa esiko sino bubi muno, esiindu si baandu bachia ohuwukaho sa; mani buli muundu onaasibiteengeho yahaticheenge mani awukaho sa hulw'amasira kasikwiireho koosi.

⁹Abasuku baabwe bachia ohwebodoohania baseete esiko esyo mani beete abaandu bamwo. Mani abaandu bomu siko esyo bahalye abaana baabwe basyaani neende abaana baabwe bahaana, buli muundu yahalye owaasye.

¹⁰“Mani ao niwo yi wahaatire esyoongo eyo, buli muundu ali naawe n'abona,

¹¹mani obaboolere oti, Omwaami w'Obunyala aboola ati: ‘Njia ohwaata abaandu bano neende esiko sino, koti omuundu yahaata esyoongo y'omuloongi w'endamu, eyitahanyala ohweyonga ehabi liindi. Abaandu bahasiihe kata mu Tofeti, olwohuba yahabuleo abuundu w'ohusiihamo kata.

¹²Mani luno nilwo lu ndahahole abuundu ano, neende abamenyaane, b'esiko sino sibe koti Tofeti.

¹³Enyuumba chomu Yerusalemu neende enyuumba ch'abatuki bomu Buyudaaya, neende enyuumba choosi chibaniooheseramo obubbaani eyiri eng'ining'ini chomu kulu, neende echo chi bachuhiramo ebiyaanwa by'ohung'wa eyiri banasaae baandi, chahabe nichitaali enjoolerefu koti esituundu sya Tofeti.’ ”

¹⁴Yeremia yeemao yaatula Tofeti, yi Omwaami yali n'amutumire ohuyaala emboosi yae. Mani Yeremia naachia niyeema mu lwaanyi lw'enyuumba y'Omwaami, yaaboolera abaandu boosi ati:

¹⁵“Omwaami w'Obunyala, Nasaae wa Yisiraeli aboola ati: ‘Bone, njia ohuleeta amasira hu siko sino neende hu biko byoosi ebiri aambi nasyo amasira ka mbolere endi njia ohusikwiisaho, olwohuba abaandu boomeranu nibo mu myooyo, bahayire ohuwulira emboosi chaange.’”