Read saamia Yeremia 2 Bible Online

Yeremia 2 - saamia bible

Yeremia 2

¹Emboosi y'Omwaami yaanjichira niyiboola yiti,

²Chia oyaalire abaandu bomu Yerusalemu n'obaboolera oti: Omwaami aboola ati, Njichulisa koti lu wali omweesikwa mu buraaga bwao, koti lu wandahaanga n'osisiiri omweeya, koti lu wanondaangaho mu siparara, mu syaalo sitataakwaangamwo daawe.

³Yisiraeli wali omwoolerefu eyiri Omwaami, niiwe yi ndataangira ohwenyoolera. Mani buli muundu wahuchuuniaho, ndamusaandya haandi ndaamukwiisaho esibi. Ese Omwaami, Niise olomaloome.

⁴Wulire Emboosi y'Omwaami, eng'we abeechuhulu ba Yakobbo, eng'we mweesi enono ch'enyuumba ya Yisiraeli.

⁵Omwaami ateeba ati: “Sibi siina si bakuuka yeeng'we bafwaambya? Siina syeene esyakera baandulaho? Lwasiina baloonda ebyo ebitaalimo obuhoonyi, mani bosi nibeehola abataalimo obuhoonyi?”

⁶Haba sibetebanaho abeene-na-beene bati, Omwaami ali yeena? Oyo owatutusa mu syaalo sya Misiri, n'atwimiriramo mu sichiimi, mu syaalo sy'ebiparara neende ameena, mu syaalo sy'esiminyu neende esiirima sya titititi, mu syaalo si muundu atabitamo, esyaalo sitaalimo omuundu?

⁷Mani Ese nimbaleeta mu syaalo silai ohulichaanga ebyaamo byasyo. Nae eng'we nimweechamo, mwanyaasa esyaalo syaange, mani nimuhola esy'omusiro mu syaalo si ndababeresa ohuba esyeeng'we.

⁸Abalaamisi haba sibeteebaho bati: Omwaami ali yeena? Ab'amalako abo haba sibamanya daawe; mani abeemirisi nibajeemera; abanabbi nibalaangirira mu liita lya Bbaali, mani nibaloonderera ebiindu bibulamo obuhoonyi.

⁹Mani sakira, Ese Omwaami njia ohuyaala naang'we omusaango, Omwaami Niye oboola, haandi njia ohuyaala neende abaana beeng'we neende abeechuhulu beeng'we.

¹⁰Mwaambuhe muchie hu sisiinga sya Saipurasi mani mubone, oba mutume omuundu mu Kedari mani mwehaliirise bulai; mubone niyibechaanga hoo esiindu sifwaanana koti sino.

¹¹Siri hoo esyaalo syakaluuniaho banasaae basyo, kata abyahaba mbwe banasaae haba sibaluwo? Nae abaandu baange, mu bweyaango bwaange, Ese Nasaae obaberesaanga oluyaali, bateereo banasaae babulamo obuhoonyi.

¹²Mani ndagira ekulu liteengereheho olw'obuti, liwukeho haandi liteng'eng'ale, Omwaami niye oboola.

¹³Olwohuba abaandu baange baholere ebyonoono bibiri: baandulireho Ese, esulo y'amaachi k'obulamu, mani abeene nibeyabira ebidiba, ebidiba byaadiha, ebitanyala ohubaamo amaachi kata nabudiidi.

¹⁴Abaisiraeli haba si bawaambe nibo; haba sibebulwa mu buwaambe daawe. Mani lwasiina bakiiywa neende abasuku baabwe?

¹⁵Abasuku baabwe bababuluuliraho koti edalang'i, babuluuliire mu kono ly'aakulu. Esyaalo syaabwe syeeholere esiparara; ebiko byasyo bisihiriire, yibulao ababimenyamo.

¹⁶Eee, abaandu ba Mefisi neende aba Tapaneesi bamalire ohwaata ebyaanga byeeng'we.

¹⁷Niing'we abeene abeleteere sino olwohuba muundulireho Ese Omwaami Nasaae weeng'we, nae Niise obeere nimbeekesa engira.

¹⁸Nae bulaanu, ngaanga siina yi munyoola ohudiira engira yichia Misiri, ohung'wa amaachi k'omwaalo kwa Naili? Oba ngaanga siina yi munyoola ohudiira engira yichia Asiria, ohung'wa amaachi k'omwaalo kwa Ewufuraate?

¹⁹Esibi syeeng'we syeene nisyo esyahabasaandye, haandi ohuundulaho hweeng'we nihwo ohwahabaheengere omusaango ohubahira. Manye haandi bone muti sibi nisyo haandi sichuuna olwohuba mutulire hu Omwaami Nasaae weeng'we; haandi haba simusiimutya daawe, Omwaami Nasaae w'Obunyala niye oboola.

²⁰Omwaami aboola ati: “Olwohuba ohutula hale-na-haandi, mwekaana obunyala bwaange mani mwanjeemera;” nimuboola muti, Sihuchia ohuhalaabanira. Eee, mani nimwiinamira banasaae baandi hu buli sigulu sileeyi neende aasi wa buli musaala mubisi.

²¹Nae Niise owali nindabataaka koti omusabbiibbu okwadoolwamo mu chiindi, okw'emwo yihiramo obulai. Nae bulaanu munyasiihe mutye mani mweehola omusabbiibbu kwomu siino?

²²Nae kata mwaheeyokera ekohe neende esabbuuni nyiingi, mwahadoong'e nimubona amaboondo k'ebyonoono byeeng'we, Omwaami Nasaae weeng'we niye oboola.

²³Munyala mutye ohuboola muti, Haba sihunyasiihe, haba sihwiinamiraanga ba Bbaali? Bone koti lu mubitire mu hooho; manye bi muholere Muli koti engamia ndaaga eyidaha esaacha, eyiiruha niyijeemere ohudiirwa.

²⁴Muli koti esuhiri eyanala mu siparara, eyiwunyirisa mu mboo niyidaha esurusi. Wiina mweene onyala ohuyikayira obwekoombi bwayo? Esurusi chiyikoonya chiri neende ohweteemaho muno; chiyinyoole niyiri mu biha byao.

²⁵Abaisiraeli, mulehe ohudidiihanira buhaya neende ohwoomya amamiro keeng'we. Nae muboola muti: Haba sisihoonya, olwohuba hudahire banasaae bateende, haandi nibo bahuchia ohuloonda.

²⁶Omwaami aboola ati: Koti omwiibi adiirwa esoni nibamudiirire, eng'we Abaisiraeli mwesi nilwo lu muchia ohudiirwa esoni; eng'we, alala neende abatuki beeng'we, neende abahoongo beeng'we, neende abalaamisi beeng'we, alala neende abanabbi beeng'we.

²⁷Eng'we ababoolera omusaala muti, Niiwe laata yeefwe, haandi mwaboolera ekina muti, Niiwe owatwiibula. Olwohuba mumalire ohuufudatira, mani haba simutingaalaho daawe. Nae, mu biha by'ebidinyu, mumbooleraanga muti, “Siingira, wiiche otuwonie.”

²⁸Nae banasaae beeng'we ba beene mweloongeere bali yeena? Lehe abeene abo basiingire, nibanyala ohubawonia, mu biha by'ebidinyu byeeng'we; olwohuba muli neende banasaae baangi abaakana neende obuungi bw'ebiko byeeng'we.

²⁹Lwasiina mundekanyiirisa? Eng'we mwesi-mweesi muunjeemeere, Omwaami niye oboola.

³⁰Ndasaandya abaana beeng'we, nae sibulao sindanyoolamo daawe, olwohuba simufukiirira ohukololwa daawe. Olugaanga lweeng'we lweene nilwo olwatemula abanabbi beeng'we nimuli koti edalang'i yisihirisa abaandu.

³¹Mani eng'we, Abaisiraeli b'endaalo chino, wulire emboosi chi Ese Omwaami mboola. Ndeehola esiparara yi muli, oba esyaalo sy'esiirima sidiiraane? Eng'we abaandu baange, lwasiina muboola muti, Huli abalehuule ohuhola buli siindu si hudaha, haba sihuchia hukobola yooli?

³²Mani omuhaana muraaga anyala ohwiibirira ebiindu byae by'amang'eniesi, oba odehiisye yeebirira engubo chae? Nae abaandu baange baanjibiriire endaalo enyiingi echitabalihana.

³³“Nga mumanyire muno ohukoonya ohudaha abaandi! Kata abahasi b'esaambo mbi banyala ohwekera hu eng'we.

³⁴Haandi hu ngubo cheeng'we huliho amabboondo k'amabaanga k'abamanani batali neende omusaango; haandi nibo bamutadiira nibeeba. Nae kata ebyo byoosi biri bityo,

³⁵muboola muti: Haba sihuliho omusaango; mubwadyeeri bweene, Omwaami sasitunyoolerera. Bone, Ese Omwaami njia ohubasaandya olwohuboola muti, Haba sihuholaangaho esyonoono.

³⁶Lwasiina mukaluuhana-kaluuhana, mani nimuloonda banasaae baandi! Misiri sichia ohubaleha ao mudiirwe esoni koti lu Asiria yabaleha mwadiirwa esoni.

³⁷Kata Misiri yoosi muchia ohutulayo nimweedwiihire amahono keeng'we hu mitwe. Olwohuba Ese Omwaami ndekaanire abo bamweesika, haandi haba simwahabanyoolemo ehabi daawe.”