Read saamia Yeremia 25 Bible Online

Yeremia 25 - saamia bible

Yeremia 25

¹Mu mwaaka kwohune, kw'obutuki bwa Yehoyakimu, omwaana wa Yosia, omutuki wa Buyudaaya, ese Yeremia ndanyoola emboosi y'Omwaami, eyidiira hu baandu bomu Buyudaaya. (Okwo nikwo okwali omwaaka kwaamberi okw'obutuki bwa Nebukadineesa, omutuki wa Bbabbilooni.)

²Mani nimboolera abaandu bomu Buyudaaya boosi, neende abomu Yerusalemu boosi endi:

³“Ohutula hu mwaaka kw'ehumi-na-hadatu, okw'obutuki bwa Yosia omwaana wa Amoni, omutuki wa Buyudaaya, ohwoola buti, Omwaami abeere n'alomalomaanga naange, mani syesi nitaakama ohubeekesaanga bi aboola, nae eng'we nimuhaya ohuwulira.

⁴Mwahaya ohuwulira, kata sa ohutaahooho omwooyo daawe, nae Omwaami yemeeda ohubatumiraanga abahalaabani bae boosi, koti abanabbi.”

⁵Bababooleraanga bati, Bulaanu kaluuhane, buli muundu alehe ebiima byae bibi, neende ebiholwa byae bibi, mani munyale ohumenya hu syaalo si Omwaami yababeresa ohuba esyeeng'we, neende bakuuka yeeng'we, ohutula hale-na-haandi.

⁶Bababooleraanga bati, mutahalaabaniraanga banasaae baandi, haandi mwabeenamiraanga, oba ohunyoolesa Omwaami nimwiinamira ebyo bi mwahola neende amahono keeng'we. Mani Omwaami haba saachia hubaholaho esibi.

⁷Nae Omwaami mweene aboola ati, mwahaya ohumuwulira. Mani nimumudiisa etima hulw'ebiindu bi mwahola, abeene mani nimweleetera ohusaanda.

⁸Mani sakira Omwaami w'Obunyala aboola ati, Olwohuba mwahaya ohuwulira bi mboola,

⁹bone, njia ohutuma abaandu boosi abatula emukulu, neende omuhalaabani waange, Nebukadineesa, omutuki wa Bbabbilooni, mani mbaleete balwaanie Buyudaaya neende ebyaalo bino byoosi ebisyebodohaanie, Omwaami niye oboola. Njia ohusihirisira elalira esyaalo sino, neende ebyaalo bisyebodohaanie, mani mbahole esitiisa, esirekereswa, haandi ekuunda endaalo choosi.

¹⁰ “Njia ohunyisa amakono kaabwe k'ohwehoya, ak'esangaalo neende ak'esidyaalo syohudeehisania, alala neende amakono k'ohusya hu lukina, haandi haba sibahabe neende amafuta mu taara.

¹¹ Esyaalo sino syoosi syaheehole ekuunda haandi esitiisa, mani ebyaalo bino byahahalaabanire omutuki wa Bbabbilooni ohumala embaka y'emyaaka amahumi kataanu-na-kabiri.

¹²Nae emyaaka amahumi kataanu-na-kabiri nikyahawe, njia ohusaandya omutuki wa Bbabbilooni neende esyaalo esyo, esyaalo sy'Abakalidaaya, hulw'ebibi byaabwe. Njia ohusihirisa esyaalo esyo mani sihole ekuunda endaalo choosi.

¹³Njia ohukwiisa hu syaalo esyo ebyo byoosi bi ndasiboolaho, buli siindu syoosi esyandiikwa mu sitabo, bi omunabbi Yeremia yalaangirira mu liita lyaange.

¹⁴Ndahetuungire hu Babbabbilooni ohweema hu biindu bi bahola. Mani ebyaalo biingi neende abatuki bahunuufu, bahabahole baaba abawaambe baabwe.”

¹⁵Ao mani Omwaami, Nasaae wa Yisiraeli, yamboolera ati: “Bukula esikoombe siri mu muhono kwaange sino, esikoombe sirimo efiini yihaliihe, esichuule obwaalaba bwaange, mani osing'weese ebyaalo byoosi bi Omwaami ahutumamo.

¹⁶Bachia ohusing'waaho badaandaamire, mani balaluhane hulw'ebiita bi ndi ohubasiindihamo.”

¹⁷Ndambukula esikoombe ohutula mu mahono k'Omwaami, mani ning'weesa abaandu bomu byaalo byoosi bi Omwaami yali n'atumire.

¹⁸Abomu Yerusalemu neende abomu biko byomu Buyudaaya, abatuki baabwe neende abachweenufu baabwe, mani ebiko ebyo binyale ohuba amakuunda katiisa haandi ebilekeereswa, abaandu beehoonyereenge ameeta kabyo nibabwaaba, nilwo lu basiihola ohwoola buti.

¹⁹Abaandi abahang'we hu sikoombe sino nibo bano: omutuki wa Misiri, neende abahalaabani bae, neende abachweenufu bae, neende abaandu bae boosi,

²⁰neende bawalukeenda boosi abali mu Misiri. Neende abatuki boosi abali mu syaalo sya Wuusi, neende abatuki boosi abomu biko by'Abafilisiti (Asukelooni, Gasa, Ekironi, neende abadoong'ao mu Asudooti);

²¹abaandu boosi abomu Edomu, Moabbu, neende abaana ba Abaamooni.

²²Abatuki boosi aba Tiiro, Sidoni, neende abatuki boosi ab'ebyaalo by'engereha biri hu ndulo w'enyaanja.

²³Abaandu bomu biko bya Dedani neende Tema, neende Bbusi, neende abaandu boosi abaheheta obweeni bwaabwe.

²⁴Abatuki boosi abomu Araabbia, neende abatuki boosi ab'enjia chikabuhaane echiri mu siparara.

²⁵Abatuki boosi aba Simuri, Elamu, neende Media.

²⁶Abatuki boosi abomu byaalo by'emukulu, ab'eyale neende ab'aambi, buli mulala otulayo, neende obutuki bwohu syaalo bwoosi. Mani abatuki bano boosi nibahamale ohusing'waaho, omutuki wa Bbabbilooni niye owahamaliiriheyo ohusing'waaho.

²⁷Omwaami w'Obunyala, Nasaae wa Yisiraeli yamboolera ati: Baboolere oti Omwaami aboola ati, “Mung'we, mumeere, musale, mukwe aasi mani muhaye ohusiingiraho haandi, hulw'ebiita bi ndi ohubasiindihamo.”

²⁸Nae nibahaya ohubukula esikoombe siri mu muhono kwao mani baasing'waaho, oba ochia ohubaboolera oti, Omwaami w'Obunyala aboola ati: muli neende ohusing'waaho!

²⁹Olwohuba bone, njia ohuhola esibi hu siko syaange syeene, mani abulao omuundu otahasaande. Abulao owahawone ohusaanda, olwohuba njia ohusiindiha ebiita mu baandu bohu syaalo syoosi. Omwaami w'Obunyala niye oboola.

³⁰Mani sakira, ewe Yeremia, olibalaangirira emboosi chino choosi, oliboolera abaandu bano oti: “Omwaami alihuumula naali Muukulu, yahaduluhane naali mu bwiihalo bwae bwoolerefu. Yahahuumule neende amaani n'alwaania abaandu bae, mani yaayula koti abo abanyuha emisabbiibbu, mani buli muundu oli hu syaalo awulire.

³¹Mani ekono lyae lyahoole yi syaalo syaakama, olwohuba yiluwo omusaango ku Omwaami afwaambya ebyaalo. Omwaami ali ohuyaala omusaango neende abaandu boosi. Ababi, baheetwe neende olugaanga, Omwaami niye oboolere.”

³²Omwaami w'Obunyala aboola ati: “Bona, amasira kali ohulaandaala ohutula hu syaalo silala ohwoola hu siindi, haandi omuyaka kw'amaani kuchia ohuwuucha nikutulira mu soonda ch'ebyaalo by'eyale.”

³³Hu ludaalo olwo, emilaambo ky'abaandu ba Omwaami aliita kyahasalaanire buli abuundu, ohutilira elalira yi syaalo sichaakira ohwoola yi syaakamira. Haba sibahewunamireho daawe, oba abulao owakibuuse alala, oba yaakisiiha. Kyahadoong'e humukulu kyaaba koti embolera.

³⁴“Hubbe embuungu, eng'we abeemirisi, haandi mulire, eng'we abeemirisi, mwefuufule mu kohe. Olwohuba endaalo choolere mwiitwe, haandi musalaaniswe, mani mwahabe koti amakoondi kahiramo obulai.

³⁵Eng'we abeemirisi, haba simwahabeeho neende owohwiiruhira, noomba owohweeyibira mwawona.

³⁶Wulire, amaliro k'abeemirisi neende embuungu ch'abaami! Olwohuba Omwaami anyaasire esyaalo syaabwe.

³⁷Mani esyaalo syaabwe esyabechaangamo omuleembe, Omwaami mu tima lyae asisihiriise.

³⁸Omwaami alehere abaandu bae, koti lu dalang'i yahaleha eng'uungu yaayo. Esyaalo syaabwe syeeholere ekuunda hulw'ebiita bitiisa, neende obwaalaba bw'etima ly'Omwaami.”