Read saamia Yeremia 26 Bible Online

Yeremia 26 - saamia bible

Yeremia 26

¹Muhuchaaka hw'obutuki bwa Yehoyakimu, omwaana wa Yosia, omutuki wa Buyudaaya,

²Omwaami yamboolera ati: “Yema mu lwaanyi lw'Enyuumba ya Nasaae, mani oboolere abaandu bomu biko byoosi ebyomu Buyudaaya, abeechaachanga ohwiinamiraanga Nasaae omwo. Baboolere buli mboosi yoosi yi hulagira ohubaboolera. Otalehaho esiindu kata silala.

³Naluundi banyala ohuwulira, mani buli muundu yaaleha engeri chae mbi. Mba njia ohweyolobya haye ohuhola esibi simbeere niheengereo ohuhola, hulw'ebiholwa byaabwe bibi.

⁴Baboolere oti; Omwaami aboola ati: Nae nimuhaya ohuwulira, mani mwaahaya ohukeendera mu malako kaange ka mbabereese,

⁵neende ohuwulira emboosi ch'abahalaabani baange abanabbi, ba mbatumira buli siha, kata mwaahaba nimutawulira bi bababoolera.

⁶Nimwemeeda ohujeema, njia ohuhola enyuumba yino, esiindu si ndahola hu Siilo, mani ebyaalo byohu syaalo byoosi binehoonyeraanga eliita ly'esiko sino nibibwaaba.”

⁷Ao abalaamisi, neende abanabbi, neende abaandu boosi nibawulira ninomanomera emboosi chino choosi mu nyuumba y'Omwaami.

⁸Nae nindamala ohulomaloma endi sa, ebyo bi Omwaami yali niyandagiire ohuboolera abaandu boosi, abalaamisi neende abanabbi, neende abaandu boosi baandiira, nibaboola bati: “Ohoyere ohwiitwa!

⁹Lwasiina olaangirira mu liita ly'Omwaami noboola oti, Enyuumba y'Omwaami yino yichia ohuba koti Siilo, haandi oti, esiko sino sichia ohusihiriswa, mani abuleo omuundu omenyamo?” Abaandu boosi beemao beebuusira yi ndi mu nyuumba y'Omwaami.

¹⁰Nae abeemirisi bomu Buyudaaya nibawulira ebikwiireo, baalaala baatula mu dooho ly'omutuki, beecha mu nyuumba y'Omwaami, mani beehala hu bisaala byaabwe, hu mulyaango kulaangwa kuti, Esiruwa Siyaaha sy'Enyuumba ya Nasaae.

¹¹Abalaamisi abo neende abanabbi abo baboolera abeemirisi neende abaandu boosi bati: “Omusaacha wuno ahoyera ohuheengerwa omusaango kw'ohufwa, olwohuba alomaloome bubi hu siko sino koti lu mwesi abeene muwulira.”

¹²Yeremia yalomaloma neende abeemirisi abo n'aboola ati: “Omwaami niye owundumire ohulaangirira emboosi chino choosi, echidiira hu nyuumba ya Nasaae yino neende hu siko sino koti lu muwuliire.

¹³Mani sakira, mutereese ebiima byeeng'we neende ebiholwa byeeng'we, mani muwulire ekono ly'Omwaami Nasaae weeng'we. Omwaami aba achia ohweyolobya, ahaye ohubakwiisaho esibi si yabeere n'aboolere ohuboosaho.

¹⁴Nae ese, bone, mbano ndi mu bunyala bweeng'we. Muuholeho esyo syoosi si mubaasa muti silai haandi siluungifu.

¹⁵Ohutusaho mumanye muti, ni muunjita, eng'we abeene, neende abaandu bomu siko sino, muba mweleetaho amabaanga k'omuundu obulaho omusaango. Olwohuba, mubwadyeeri bweene, Omwaami niye owaanduma ohubaboolera emboosi chino choosi nimuwulira.”

¹⁶Ao mani abeemirisi neende abaandu boosi, baboolera abalaamisi neende abanabbi bati: “Omusaacha wuno haba saahoyera ohwiitwa, olwohuba alomaloome naafwe mu liita ly'Omwaami Nasaae weefwe.”

¹⁷Mani abahuluundu bomu syaalo omwo baandi nibasiingira, nibaboolera abaandu bali nibebuusire ao bati:

¹⁸Mu ndaalo chi Hesekia yali naali omutuki wa Buyudaaya, Miika omwaana wa Moreseti, yalaangirira naaboolera abaandu bomu Buyudaaya boosi ati Omwaami w'Obunyala aboola ati, “Siyooni lwahalimwe koti endalo; neende esiko sya Yerusalemu syahabe esituuli sy'ebikoha, neende olugulu lw'Enyuumba ya Nasaae, lwahamereho esichaha.

¹⁹Hesekia neende abaandu bomu Buyudaaya, haba sibeeta Miika daawe. Nae Hesekia yeesa oluyaali mu Omwaami, mani yaamweekweeda abakwiire esisa. Mani omwaami yeyolobya, yaahaya ohuleeta esibi si yali n'aboolere ati achia ohubakwiisaho. Nae bulaanu efwe mbano hudaha ohweleetera abeene amasira k'amaani.”

²⁰Yaluwo omusaacha wuundi olaangwa ati, Wuria omwaana wa Semaya owa Kiriati Yearimu, owalaangiriraanga mu liita ly'Omwaami ebidiira hu siko sino neende hu syaalo sino, niyeehoonyera emboosi chiri koti echa Yeremia.

²¹Nae omutuki Yehoyakimu, alala neende abasikaari bae b'amaani, neende abeemirisi boosi, nibawulira emboosi chi Wuria yali naalomalome, omutuki yamukiiya naadaha ohumwiita. Nae Wuria niyamanya atyo, yatya muno mani yeeyiba yeeruhira Misiri.

²²Omutuki Yehoyakimu yeemao yaatuma Elinatani omwaana wa Akubboori, neende abasaacha baandi ohuchia nae Misiri,

²³mani batuseyo Wuria bamuleete eyiri yaali. Omutuki Yehoyakimu yatusa omunwa ati bamwiite neende olugaanga mani basukune omulaambo kwae abuundu yi basiihaanga abaandu ba buli ludaalo.

²⁴Nae Ahikamu omwaana wa Safani, n'ahoonya Yeremia, mani nibahaya ohudiisa Yeremia mu mahono k'abaandu ohumwiita.