Read saamia Yeremia 27 Bible Online

Yeremia 27 - saamia bible

Yeremia 27

¹Sedekia omwaana wa Yosia, niyali hu yachaaka sa ati ohuba omutuki wa Buyudaaya, Omwaami yaboolera Yeremia ati:

²“Yeremia, omweene hola ekoombo, mani olyefwaale mu kosi wao.

³Haandi yamboolera ati, tuma emboosi eyiri omutuki w'Edomu, omutuki wa Moabbu, omutuki wa basyaani ba Abaamooni, omutuki wa Tiiro, neende omutuki wa Sidoni, niwehoonyera bawamwaanda baabwe abeechere Yerusalemu eyiri Sedekia omutuki wa Buyudaaya.”

⁴Leha bachie baboolere abaami baabwe bati: Omwaami w'Obunyala, Nasaae wa Yisiraeli aboola ati: Munaaboolere abaami beeng'we muti:

⁵“Hulw'obunyala bwaange buungi, neende amaani kaange, Niise owaloonga esyaalo, abaandu neende ebisolo biri hu syaalo; mani ndaasiberesa buli muundu yi ndaha.

⁶Bulaanu ebyaalo bino byoosi mbibereese omuhalaabani waange, Nebukadineesa omutuki wa Bbabbilooni ohubituka, haandi mubereese ebisolo byomu siino byosi ohumuhalaabaniraanga.

⁷Ebyaalo byoosi bichia ohumuhalaabaniraanga, omweene, omwaana wae, neende omwiichulu wae, ohwoola lu siha si ndatekehera esyaalo syae ohwaakama syahoole. Mani esyaalo syae syahahalaabanire ebyaalo biingi neende abatuki bahunuufu.

⁸“Nae esyaalo syoosi oba obwaami bwoosi ebyahahaye ohuhalaabanira Nebukadineesa omutuki wa Bbabbilooni wuno, mani baaba mu bunyala bw'omutuki wa Bbabbilooni, njia ohusaandya esyaalo esyo neende ebiita, enjala neende oluumbe, ohwoola lu Nebukadineesa yahabasihirisire elalira.

⁹Mani sakira mutatekeeresaanga abanabbi beeng'we, abalakusi beeng'we, abakaluli b'ebilooto beeng'we, oba abeteeba hu misaambwa beeng'we, oba abo boosi abali ohubabooleraanga bati, ‘Haba simuchia huhalaabanira omutuki wa Bbabbilooni.’

¹⁰Olwohuba bali ohulaangiriraanga eby'obubacha bichia ohubaleetera mutuswe mu syaalo syeeng'we muyirwe mu syaalo sy'eyale, yi mumuchia ohusihirira.

¹¹Nae abomu syaalo esyahafukiirire obunyala bw'omutuki wa Bbabbilooni mani baamuhalaabanira, njia ohubaleha badoong'e mu syaalo syae syeene esyo, ohusirima neende ohusimenyamo. Ese Omwaami, Niise oboolere.”

¹²Ebiindu nasilala ebyo nibyo bi ndaboolera Sedekia, omutuki wa Buyudaaya endi: “Fukiirire ohutukwa neende omutuki wa Bbabbilooni. Mumuhalaabanire, haandi halaabanire abaandu bae, mube abalamu.

¹³Lwasiina ewe, neende abaandu bao mudaha ohufwa ebiita, enjala neende oluumbe, koti lu Omwaami aboolere ati ebyo nibyo ebyahakwe hu syaalo syahahaye ohuhalaabanira omutuki wa Bbabbilooni?

¹⁴Mutawulira emboosi chi banabbi baboola bati, ‘Mutahalaabanira omutuki wa Bbabbilooni,’ babalaangirira sa eby'obubacha.

¹⁵Omwaami mweene aboola ati, Ese simbatumaangaho daawe, nae bali ohulaangiriraanga sa eby'obubacha nibehoonyera eliita lyaange. Mani njia ohubeerusa mutule mu syaalo syaange, musihirisirwe alala neende abanabbi abo abali ohubalaangiraanga.”

¹⁶Sakira ndalomaloma neende abalaamisi neende abaandu boosi endi, Omwaami aboola ati: “Mutatekeeresa emboosi ch'abanabbi beeng'we abo abali ohulaangiriraanga nibaboola bati, ‘Bone, eby'obuyiinda byomu nyuumba y'Omwaami bichia ohukaluswa ohutula Bbabbilooni,’ olwohuba bali ohulaangiraanga eby'obubacha.

¹⁷Mutawuliraho ebyaabwe ebyo; halaabanire omutuki wa Bbabbilooni mube abalamu. Lwasiina mukera esiko sino nisyehola ekuunda?

¹⁸Nikali mbwe bano ni banabbi nibo, haandi nibali neende Emboosi y'Omwaami, mani lehe bekoongooye Omwaami w'Obunyala, ebiindu by'engaanga ebyadoong'a mu nyuumba y'Omwaami, neende mu dooho ly'omutuki wa Buyudaaya, neende mu Yerusalemu, buhaye ohuyirwa Bbabbilooni.

¹⁹Olwohuba Omwaami w'Obunyala aboola atyo ebidiira hu misiiro, enyaanja, ebiteeni, neende ebiindu by'engaanga byadoong'a mu siko sino,

²⁰bi Nebukadineesa omutuki wa Bbabbilooni atayira, ebiha bi yayiriramo Yehoyakimu omutuki wa Buyudaaya alala neende abahunuufu bomu Buyudaaya neende abomu Yerusalemu mu Bbabbilooni mu buwaambe.

²¹Omwaami w'Obunyala, Nasaae wa Yisiraeli aboola ebidiira hu biindu by'engaanga byadoong'a mu nyuumba y'Omwaami, mu dooho ly'omutuki wa Buyudaaya, neende mu Yerusalemu ati:

²²Bichia ohukiingwa biyirwe Bbabbilooni mani bidoong'e eyo ohwoola hu ludaalo lu ndahabibaasireho, ohubikobosa abuundu ano. Ese Omwaami, niise oboolere.”