Read saamia Yeremia 28 Bible Online

Yeremia 28 - saamia bible

Yeremia 28

¹Mu mwaaka kweene okwo, mu mwoosi kwohutaanu okw'omwaaka kwohune, Sedekia niyahachaaka ohutuka Buyudaaya, Anania omwaana wa Asuuri, omunabbi wa Gibbeoni, yalomloma naange ni ndi mu nyuumba y'Omwaami, abalaamisi neende abaandu boosi nibawulira n'aboola ati:

²Omwaami w'Obunyala, Nasaae wa Yisiraeli aboola ati: “Funaake-funaakemo obunyala bw'omutuki wa Bbabbilooni.

³Mu mbaka y'emyaaka kibiri, njia ohukobosa abuundu ano ebiindu byomu nyuumba y'Omwaami byoosi, bi Nebukadineesa omutuki wa Bbabbilooni yanyaka yaayira Bbabbilooni.

⁴Haandi njia ohukobosao Yekonia omwaana wa Yehoyakimu, omutuki wa Buyudaaya, alala neende abaandu bomu Buyudaaya boosi abayirwa mu buwaambe Bbabbilooni. Njia ohufunaka obunyala bw'omutuki wa Bbabbilooni. Ese Omwaami, Niise oboolere.”

⁵Omunabbi Yeremia yeemao yaalomaloma neende omunabbi Hanania abalaamisi neende abaandu bali nibeemere mu nyuumba y'Omwaami boosi nibawulira;

⁶omunabbi Yeremia n'aboola ati: “Amiina! Lehe husuubire huti Omwaami achia ohwooseresa abweene emboosi chi olaangiriire, mani akobose abuundu ano ohutula Bbabbilooni ebiindu byomu nyuumba y'Omwaami, neende abaandu boosi abayirwayo mu buwaambe.

⁷Nae ewe Anania, bulaanu wulira emboosi chi huboolera, haandi chi mboolera abaandu boosi.

⁸Abanabbi batutaangirira ohubaao, ohutula hale, balaangiriraanga ebiita, enjala, neende oluumbe ohwichira ebyaalo biingi neende obutuki bw'amaani.

⁹Nae omunabbi olaangirira omuleembe, yomiiswa ati niye omunabbi wadyeeri owatumwa neende Omwaami, emboosi chi alaangiriire nichoolerera abweene.”

¹⁰Bulaanu munabbi Hanania yeemao yaatusa ekoombo lyali mu kosi wa Yeremia, yalifunaka-funakamo.

¹¹Hanania yalomaloma abaandu boosi nibawulira n'aboola ati: “Omwaami aboola ati, achia ohufunaka-funaka atyo ekoombo li Nebukadineesa omutuki wa Bbabbilooni yateereenge mu kosi w'ebyaalo byoosi mu mbaka y'emyaaka kibiri.” Mani omunabbi Yeremia niyeetulirayo n'awaao.

¹²Nae ebiha nibyabitao, omunabbi Hanania naamalire ohufunaka-funakamo ekoombo lyali mu kosi w'omunabbi Yeremia, Omwaami yaboolera Yeremia ati:

¹³“Chia mani oboolere Hanania oti Omwaami aboola ati: Ofunaake-funaakemo ekoombo ly'omusaala, nae njia ohukobosao ekoombo ly'esichuma abuundu walyo.

¹⁴Olwohuba Omwaami w'Obunyala, Nasaae wa Yisiraeli aboola ati: ‘Njia ohuta mu kosi w'ebyaalo ebyo byoosi ekoombo ly'esichuma, mani bihalaabanireenge Nebukadineesa omutuki wa Bbabbilooni. Bichia ohumuhalaabanira, olwohuba mubereese kata ebisolo byomu siino.’ ”

¹⁵Nae omunabbi Yeremia yaboolera omunabbi Hanania ati: “Ewe Hanania, wulira, Omwaami haba saahutumaangaho daawe, mani okerere abaandu bano beesika eby'obubacha.

¹⁶Mani sakira, Omwaami aboola ati: ‘Bona, njia ohuhutusa hu syaalo. Ochia ohufwa omwaaka kweene kuno, olwohuba oboleere abaandu ohujeemera Omwaami.’ ”

¹⁷Hanania yafwa mu mwoosi kwa hataanu-na-habiri okw'omwaaka kweene okwo.