Read saamia Yeremia 3 Bible Online

Yeremia 3 - saamia bible

Yeremia 3

¹Omwaami aboola ati: “Omusaacha naalehanira elalira neende omuhasi wae mani omuhasi wae oyo yaadeehera omusaacha wuundi, omusaacha oyo haba siyahamweekobosaho haandi.” Esyaalo esyo haba sisinyala ohukwaamo ebidinyu? Nae eng'we Abaisiraeli mweeholere abacheke, muli neende abasaacha baangi; nae haandi mudaha ohuungobolera.

²Tingaale aakulu w'ebigulu, mani mubone. Ali hoo abuundu y'oyaholeraho obucheke? Waliindiriraanga abadya bao hu ndulo w'engira koti lu Muaraabbu aliindirira abaandu mu siparara. Wanyaasa esyaalo neende obucheke bwao bubitiirifu; nootaaliho neende esoni kata nabudiidi.

³Sakira efula yihayire ohukwa, haandi efula y'etoocho yihayire ohwiicha. Nae ewe ohayiire mubucheke, haandi ohayire ohudiirwa esoni kata nabudiidi.

⁴“Ewe haba sotula ohunaanga sa buti oti, ‘Laata, niiwe owaaheera ohutula mubuyere bwaange

⁵Onanyoolereenge buli ludaalo? Onadiire etima endaalo choosi?’ Bona, omalire ohulomaloma, nae odoong'ere n'ohola ebyonoono byoosi by'onyala.”

⁶Omwaami yamboolera mu ndaalo ch'Omutuki Yosia ati: “Obweene Yisiraeli omuhasi otali omweesikwa aholere? Yaandulireho yaaholera obucheke hu buli sigulu sileeyi neende aasi wa buli musaala mubisi.

⁷Mani nimbaasa endi, ‘Niyahamale ohuhola ebyo byoosi, yahaangobolere’; nae yaahaya ohukobola. Kata Buyudaaya, mwanaang'ina otaali omweesikwa, yasibona.

⁸Buyudaaya yabona ati ndali nimbereese Yisiraeli ebbarwa yohulehanira elalira. Nae Buyudaaya mwanaang'ina Yisiraeli otaali omweesikwa oyo, yahaya ohutya, mani yesi yeehola omucheke.

⁹Olwohuba yali naadaha obucheke muno, yanyaasa esyaalo, niyeenamira amakina neende emisaala.

¹⁰Mani ebyo byoosi nibimalire ohukwaao, Buyudaaya otaali omweesikwa, mwanaang'ina Yisiraeli, haba siyakobola yi ndi neende omwooyo kwae kwoosi, ohumalaho yeebachirisa sa. Ese Omwaami, Niise olomaloome.”

¹¹Omwaami yamuboolera ati: Kata syahaba mbwe Yisiraeli yandebwaaba, yekeese ati mulai hooho ohuhira Buyudaaya otaali omweesikwa.

¹²Chia olaangirire emboosi chino eyiri Yisiraeli nooboola oti: Yisiraeli otaali omweesikwa, kobola yiindi, Omwaami niye oboola. Haba siinjia hunyoolera naawe, olwohuba ndi ow'esisa, Omwaami niye oboola; haba siinjia huhunyoolerera endaalo choosi.

¹³Fukiirira sa omusaango kwao, oti wajeemera Omwaami Nasaae wao waasalaanisira obuheeri bwao mu banasaae bateende aasi wa buli musaala mubisi, haandi oti haba si siwawuliraho ekono lyaange, Omwaami niye oboola.

¹⁴Mukobole, eng'we abaandu bataali abeesikwa, Omwaami niye oboola; Njia ohutusa mulala hu eng'we mu buli siko, neende babiri mu buli daala, mani mbaleete hu Lugulu Siyooni.

¹⁵Njia ohubaberesa abeemeresi balai bahola bi ndaha, abachia ohubaliindaanga nibali neende amakesi neende ohumanya.

¹⁶Nimwahabe nimwiingiiye haandi nimwemeedere mu syaalo, mu ndaalo echo, abaandu haba sibahabooleenge bati, “Esanduuku ly'Endagaano y'Omwaami.” Haba sibahalibaaseengeho daawe, kata sa ohuliichulisa daawe, haba sibahalidaheenge daawe; haandi sibahaliholeenge ehabi liindi daawe.

¹⁷Mu biha ebyo, Yerusalemu syahalaangwe siti, Obwiihalo bw'Omwaami, mani ebyaalo byoosi byahebuusire eyo, ohwiinamira Ese Omwaami. Bahabe nibaakaame ohuhola ebiindu bi myooyo kyaabwe myoomeranu haandi emibi kibaboolera ohuhola.

¹⁸Mu ndaalo echo, abomu Yisiraeli baheeyambaanie neende abomu Buyudaaya, mani alala bahatule mu syaalo sy'obuwaambe sy'emukulu, mani bachie mu syaalo si ndaberesa bakuuka yaabwe ohuba esyaabwe endaalo choosi.

¹⁹Omwaami aboola ati: “Eng'we Abaisiraeli, ndabaasa muno ohubabalira mu baana baange basyaani, mani mbaberese esyaalo silai, esihiriramo elalira obulai mu byaalo byoosi. Mani ndabaasa endi muchia ohunaanga muti, ‘Laata yaange’, mani mwaakame ohuundulaho.

²⁰Nae koti omuhasi otaali omweesikwa lu aleha wamwe, nilwo lu eng'we ab'enyuumba ya Yisiraeli mutabeere abeesikwa yindi, Ese Omwaami, Niise oboola.”

²¹Ekono ly'Abaisiraeli libulirihaane aakulu w'ebigulu, ni lirira haandi nilyekweeda, olwohuba beeyira bubi muno, mani nibeebirira Omwaami nasaae waabwe.

²²Omwaami aboola ati: “Mukobole, eng'we mweesi abatabeere abeesikwa, njia ohubawonia, mani mbahole mube abeesikwa.” Naang'we mani nimuboola muti: Bona, mbao hwiicha yooli; olwohuba niiwe Omwaami Nasaae weefwe.

²³Mubwadyeeri bweene, abulao omusaango kusuubirwa ohutula hu bigulu, neende ohuyokera ohutula hu ngulu. Mubwadyeeri bweene, obuwonia bwa Yisiraeli buli mu Omwaami Nasaae weefwe.

²⁴“Nae ohutulira elalira hale, mu buraaga bweefwe, ohwiinamira nasaae muteende odiisa esoni, niye omalireo ebiindu byoosi bi bakuuka yeefwe badidiihanira, ebyaayo byaabwe neende eng'oombe chaabwe, abaana baabwe basyaani neende abaana baabwe bahaana.

²⁵Lehe hweeyalise aasi mu soni cheefwe, haandi lehe hwebwiihe engisa yeefwe; olwohuba hwonoona eyiri Omwaami Nasaae weefwe, efwe neende balaata yeefwe, ohutulira elalira mubuyere bweefwe, ohwoola buti. Mani haba sihwawuliraho ekono ly'Omwaami Nasaae weefwe.”