Read saamia Yeremia 30 Bible Online

Yeremia 30 - saamia bible

Yeremia 30

¹Omwaami Nasaae wa Yisiraeli yamboolera ati:

²“Omwaami, Nasaae wa Yisiraeli aboola ati: Yandiika mu sitabo emboosi choosi chi hubooleere.

³Olwohuba bona, ebiha bichia ohwoola, ngobosere abaandu baange Abaisiraeli neende Abayudaaya ehabi, Omwaami aboola. Njia ohubakobosa mu syaalo si ndaberesa bakuuka yaabwe, mani haandi sichia ohuba esyaabwe.”

⁴Chino nicho emboosi chi Omwaami yalomaloma echidiira hu Yisiraeli neende Buyudaaya:

⁵Omwaami aboola ati: Mbuliire ekono ly'ohuteengereha, ely'ohutya, haandi elitaali ely'omuleembe.

⁶Bulaanu teebe, mani mubone, omusaacha syesi anyala ohulumwa mani yeebula omwaana? Nae lwasiina ndi ohubona buli musaacha niyediirire hu nda naali koti omuhasi olumwa? Lwasiina buli muundu asamuuhire mu moni?

⁷Woowe! Oludaalo olwo luhuluundu muno lubulao oludaalo luundi oluli koti olwo. Lwahabe olw'amasira eyiri abaandu ba Yakobbo. Nae bahaluwone.

⁸Omwaami w'Obunyala aboola ati: Oludaalo olwo nilwahoole, ndahafunake ekoombo liri mu kosi waabwe; haandi ndahahalake eminyororo kyababoya. Mani haba sibahabe abawaambe b'abateende daawe.

⁹Nae bahahalaabanire Omwaami Nasaae waabwe neende omwiichuhulu wa Daudi yindahabatereo hu bwaami.

¹⁰Mani eng'we abaandu baange, mutatya daawe. Eng'we Abaisiraeli, muteyendeherera daawe. Olwohuba bone, njia ohubawonia mani mbatuse mu syaalo sy'eyale, neende abaana beeng'we ohutula mu syaalo sibaboyerwamo. Abaandu baange bahakobole mani baaba mu bulamu bulai haande obw'omuleembe, mani abulao owahabatiise haandi.

¹¹Olwohuba ndi alala naang'we ohubawonia. Ndahasihirise ebyaalo byoosi bi ndabasalaaniamo. Nae eng'we haba sindahabasihirise daawe. Nae siinjia ohubaleha muhaye ohusaandaho daawe, mwahasaandeho engeri yimuhoyeramo. Ese Omwaami, Niise olomaloome.

¹²Olwohuba Omwaami aboola ati: “Ekoonjo lyeeng'we haba siryohuwona daawe, haandi obunyaalifu bweeng'we buungi nibwo.

¹³Abulao omuundu onaabiwonie, kabulao amalesi kanaabihoonye, libulao esuubi ly'ohuwona.

¹⁴Abeecha beeng'we boosi babeebiriire; haba sibabadeebaho daawe; olwohuba mbaseetere koti omusuku, mbasaandya abula ohubadiirira esisa, olwohuba omusaango kweeng'we muhoongo nikwo, olwohuba ebyonoono byeeng'we biingi nibyo.

¹⁵Lwasiina mweekanyiirisa olw'ohunyaaliha hweeng'we? Obuchuuni bweeng'we haba sibwohuwona daawe. Olwohuba omusaango kweeng'we muhoongo nikwo, olwohuba ebyonoono byeeng'we biingi nibyo, sakira mbasaandya endyo.

¹⁶Mani sakira abo boosi ababasihirisa bosi bahasihirire. Abasuku beeng'we boosi, buli otulayo, bahayirwe mu jeela. Abo boosi ababafwiinyirira, bosi bahafwiinyirirwe, neende abo boosi ababanyaka, bosi bahanyakwe.

¹⁷Olwohuba njia ohubameedamo obulamu, haandi njia ohuwonia ebikoonjo beeng'we. Olwohuba abasuku beeng'we babalaanga bati mwasukunwa: ‘Siyooni syasukunwa, abulao osideebaho!’ Ese Omwaami, Niise oboolere.”

¹⁸Omwaami aboola ati: “Bone, njia ohukobosa abaandu baange mu syaalo syaabwe, haandi njia ohubakwiira esisa. Esiko sya Yerusalemu sichia ohwoombahwa buyaaha, mani edooho lyasyo lichia ohwoombahwa libe koti lyali hale.

¹⁹Abaandu bamenyamo baheembe enyembo ch'ohukinia, haandi bahabe neende amakono k'esangaalo. Njia ohubaba ehabi beengiye, haandi haba sibahaduuduye daawe. Bahanyoole oluyaali bahae ohulekeereswa daawe.

²⁰Njia ohukobosao obunyala bw'esyaalo syaabwe, bwoomiisirwe elalira koti lu bwali hale; haandi njia ohusaandya abo boosi ababafwiinyiriraanga.

²¹Omutuki waabwe yahatule mu syaalo syaabwe syeene. Omutuki waabwe yahabe ow'olwiibulo lwaabwe lweene. Ndahamulaange mani asude aambi naange, olwohuba wiina mweene onyala ohusuda aambi naange nitamulaangire? Ese Omwaami, Niise oboola.

²²Mani mwahabe abaandu baange, syesi ndaaba Nasaae weeng'we.”

²³Bone, etima ly'Omwaami liri koti esiifuusye sy'amaani siwuuchira hu mitwe ky'abahola-mbi.

²⁴Etima lyaalaba ly'Omwaami haba silyahaakame ohwoola lu lyahooserese esyo siridaha ohuhola esichiiririrwa sy'ebibaaso byae. Ebiha byahoole lu baandu bahamanyireho sino bulai.