Read saamia Yeremia 31 Bible Online

Yeremia 31 - saamia bible

Yeremia 31

¹Omwaami aboola ati: “Esiha syahoole, mbe Nasaae w'enja choosi ech'Abaisiraeli, mani bosi babe abaandu baange.”

²Omwaami aboola ati: “Abaandu bahaoneo ohwiitwa bahakwiirwe esisa mu siparara. Yi Abaisiraeli bekoomba ohuwuluuhira,

³ndababonehera ni ndi eyale. Eng'we Abaisiraeli, ndabaheera neende obuheeri butaakama daawe; sakira ndemeeda ohubakwiira esisa.

⁴Mani njia ohuboombaha haandi, mani mwoombahwe buyaaha, ewe Yisiraeli muyere! Haandi abeene mwaheembwe neende embayire, mani muhine nimusangaalire.

⁵Haandi mwahalime endalo ch'emisabbiibbu hu ngulu cha Samaria, haandi abo abahataake, nibo abahalye ebyaamo byamwo.

⁶Olwohuba oludaalo lwahoole, abaliindi bahahuumulire hu syaalo sy'olugulu lwa Efuraimu nibaboola bati: ‘Siingire, mani lehe huniine huchie Siyooni, eyiri Omwaami, Nasaae weefwe.’ ”

⁷Olwohuba Omwaami aboola ati: “Mweembere Yisiraeli neende esangaalo, haandi mukalaakasire omutuki w'ebyaalo byoosi. Mweembe, mufumie, mani muboole muti, ‘Omwaami awoniisye abaandu bae, Abaisiraeli bawonereo.’

⁸Bone, njia ohubatusa mu syaalo sy'emukulu, mani mbabuuse ohutula mu bituundu by'eyale muno ebyomu syaalo. Mwaabo, mwahecheremo abawofu neende abalema, abahasi bali aasito, alala neende abo abali aambi ohweetusaho. Ndahakobose ano esidiiyiha sy'abaandu sihoongo.

⁹Abaandu baange bahakobole nibalira amasika, haandi ndaabakobose nibekongooya. Ndahababise hu ndulo w'emyaalo kirimo amaachi, mu mihoosi mikololofu ki batanyala ohwegumula daawe. Olwohuba niise laatang'ene Yisiraeli, haandi Efuraimu niye omwaana waange waamberi.

¹⁰“Eng'we ebyaalo, wulire Emboosi y'Omwaami, mani muyilaangirire mu bisiinga by'eyale muno; muboole muti, ‘Oyo owasalaania Abaisiraeli, niye ochia ohubabuusa alala, mani abaliinde koti omwaayi oliindaanga ebyaayo byae.’

¹¹Olwohuba Omwaami owoniisye Abaisiraeli, naabanunula ohutula mu mahono k'abaandu babahira amaani.

¹²Baheeche mani beemba hulw'esangaalo hu lugulu lwa Siyooni. Bahasangaale olw'obulai bw'Omwaami, hulw'ebiyaanwa by'engaano, amalwa, neende amafuta, neende olw'ebiyaanwa by'ebyaayo neende eng'oombe. Bahabe koti endalo yichuhirirwa amaachi, haandi sibahabe mu budahano kata nabudiidi.

¹³Mani abahaana bahasangaale mani baahina, haandi abasaacha baraaga neende abakofu bahasangaale. Mu siha syohulira, bahasangaale, njia ohubalemia emyooyo, mbasaangaase balehe ohweyendeherera.

¹⁴Njia ohuberesa abalaamisi ebyohulya biingi muno, mani abaandu baange ndahababerese obulai bwaange. Omwaami niye oboola.”

¹⁵Omwaami aboola ati: “Mu Rama, bawulira ekono, ekono ly'esibeera neende ohulira hw'amaani. Rakeeli alira abaana bae; mani naahaya ohulemeswa omwooyo hulw'abaana bae, olwohuba boosi bali nibafwiire nibaweere.”

¹⁶Omwaami aboola ati: “Lehera ao ohulira, mani weeyeyeho amasika, olwohuba wahanyoole omukabo hulw'ebyo byoosi by'oholeere abaana bao, mani bahakobole nibatula mu syaalo sy'abasuku.” Ese Omwaami, Niise oboolere.

¹⁷Liruwo esuubi mu biha biicha, haandi abaana beeng'we bacha ohukobola mu syaalo syaabwe syeene. Omwaami niye oboola.

¹⁸Mbuliire Abaisiraeli bali mu ngisa nibaboola bati, Omwaami otuloongoyaase, mani hwaaloongoyala, efwe hwali koti esolo njeemu. Mani huli abeetekefu ohukobola yooli, olwohuba niiwe Omwaami Nasaae weefwe.

¹⁹Olwohuba nihwahufudatira, hweeyolobya mani hwaakaluha yooli bwaangu. Niwatusaandya, engisa yatudiira. Hwadiirwa esoni mani hwawumumala, olwohuba hwonoona nihusisiiri abayere.

²⁰“Yisiraeli, niiwe omwaana waange omuheerwa, niiwe omwaana waange owuusaangaasa. Olwohuba buli lu hwoolobya, mba hwiichulisa sa. Mani sakira huchuunirwa omwooyo; mubwadyeeri bweene, njia ohuhukwiira esisa. Omwaami niye oboola.

²¹“Abeene mweteereo obulolero, abeene mwetereeo ebipaande, mwehaliirise bulai engira hoongo, engira yi mwabitaho nimuchia. Eng'we Abaisiraeli, mukobole, mukobole mu biko byeeng'we.

²²Hwahoole yeena neende ohung'alaalaanga, Eng'we abaandu babula obweesikwa? Olwohuba Omwaami aloongere esiindu siyaaha hu syaalo: esy'omuhasi ohuliinda omusaacha.”

²³Omwaami w'Obunyala, Nasaae wa Yisiraeli aboola ati: Nindahakoboseyo Abaisiraeli mu syaalo syaabwe sya Buyudaaya neende mu biko byaabwe, nindahababerese haandi ehabi, bahaboole bati: Omwaami ahube ehabi, Ewe abuundu woolerefu, ewe esigulu syoolerefu.

²⁴Mani abaandu bahamenye mu Buyudaaya neende mu biko byamwo byoosi. Mwahabeemo abalimi neende abaayi bali neende ebyaayo byaabwe.

²⁵Olwohuba ndaheekuse abo abaweeremo amaani hulw'enjala, haandi abo boosi abajoong'ere, ndahabakobosemo omwooyo.

²⁶Mani bahaboole bati, ndeeyalisa mani ndaasimuha amaani nikaangoboolemo.

²⁷Omwaami aboola ati; “Bone, ebiha byahoole njichuse abaandu neende ebisolo mu syaalo sya Yisiraeli neende mu syaalo sya Buyudaaya.

²⁸Mani koti lu ndabeeya haandi ndaabafunaka-funaka, ohubasukuna neende ohubasihirisa, neende ohubasaandya, nilwo lu njia ohuboombaha neende ohubataaka haandi.”

²⁹Ebiha ebyo nibyahoole, haba sibahabooleenge bati: Balaata yeefwe balya emisabbiibbu kiita ameeno, mani ameeno k'abaana baabwe kaafwa.

³⁰Nae buli muundu yahafwe ohweema hu syonoono syae syeene; Buli muundu olya emisabbiibbu kiita ameeno, niye yi meeno kae kahafwe.

³¹ Omwaami aboola ati: “Bone, ebiha byahoole, mani hole Endagaano Enjaaha neende abaandu ba Yisiraeli neende aba Buyudaaya.

³²Endagaano yino haba siyahabe koti endagaano yi ndahola neende bakuuka yaabwe, lu ndabadiirira emihono, niimbatusa mu syaalo sya Misiri. Kata andahaba nindali koti omusaacha waabwe, haba sibaliindaho Endagaano eyo.

³³ Nae yino niyo Endagaano yi ndahahole neende Abaisiraeli ebiha ebyo nibyahoole: ndahabateemo amalako kaange, haandi ndahakaandiike mu myooyo kyaabwe. Ndahabe Nasaae waabwe, mani bosi baaba abaandu baange.

³⁴ Mani abulao owaheekeseenge owaasye ohumanya Omwaami n'aboola ati, ‘Manya Omwaami,’ olwohuba boosi bahaamanyeenge, ohutulira elalira hu muundu wuhiramo obudiidi ohwoolera elalira hu muundu wuhiramo obuhunuufu. Olwohuba ndahabaleheremo ebyonoono byaabwe, mani haba sindahechuliseenge ebiholwa byaabwe bibi. Ese Omwaami, Niise oboolere.”

³⁵Omwaami wukera elyuuba lyaaduha esideete, haandi owulagira omwoosi neende eng'ining'ini byaaduha esiro. Niye owuyiyisaanga enyaanja mani amafwiinda kaahubba. Eliita lyae nilyo, Omwaami w'Obunyala.

³⁶Omwaami aboola ati: “Endekeha yino niyisisiiri yityo mu moni waange, olwo nilwo lu lwiibulo lwa Yisiraeli lwahabe esyaalo mu moni waange endaalo choosi.”

³⁷Omwaami aboola ati: “Nisyahanyalihane ohupiima ekulu ly'aakulu neende ohumanya obwooloberefu bw'omusiingi kw'esyaalo, nilwo lu Omwaami yesi yahamanyire Abaisiraeli boosi hulw'ebiindu bi bahola.”

³⁸Omwaami aboola ati: “Bone, ebiha byahoole, lu siko sya Yerusalemu syahoombahirwe Omwaami ehabi liindi, ohutula hu munara kwa Hananeeli ohwoola hu Siruuwa sy'Esoonda.

³⁹Mani olwaaho lwasyo lwahatule ao lwaachia tiiri lwoola hu sigulu sya Garebbu, mani nilukaluha ohuchia Gowa.

⁴⁰Ehooho lyoosi yi bafu basiihwa neende yi bachuha ebikoha, neende endalo choosi ohwoolera elalira hu haalo ha Kidironi, ohwoola hu soonda y'esiruuwa sy'Efaraasi, olwaande lw'ebukwe, byahabe ebyoolerefu eyiri Omwaami. Esiko esyo haba sisyaheeywe haandi oba kata ohusihiriswa ehabi liindi endaalo choosi.”