Read saamia Yeremia 32 Bible Online

Yeremia 32 - saamia bible

Yeremia 32

¹Omwaami yalomaloma neende Yeremia mu mwaaka kw'ehumi okw'obutuki bwa Sedekia omutuki wa Buyudaaya, haandi nikwo okwali omwaaka kw'ehumi-na-chitaanu-nachidatu okw'obutuki bwa Nebukadineesa, omutuki wa Bbabbilooni.

²Mu biha ebyo, eye ly'omutuki wa Bbabbilooni lyali niliseeta Yerusalemu, haandi Yeremia yali naboyeerwe mu lwaanyi lw'omuliindi olwali mu dooho ly'omutuki wa Buyudaaya.

³Olwohuba Sedekia yali n'aboyere Yeremia, n'aboola ati, “Lwasiina olaanga mani waboola oti, Omwaami aboola ati: Bone, njia ohuleha omutuki wa Bbabbilooni awaambe esiko sino, mani asiyire.

⁴Haandi Sedekia, omutuki wa Buyudaaya haba siyaheebolole ohutula mu bunyala bw'Abbabbilooni. Nae yahawaambwe mani adiiswe mu bunyala bw'omutuki wa Bbabbilooni, mani omweene alomalome nae haandi omweene amubonere elalira.

⁵Haandi Sedekia achia ohuyirwa mu Bbabbilooni, mani abe eyo ohwoola lu ndahamwiichulisire. Kata amwahalwaania Abakalidaaya, haba simuchia ohuyiingira daawe. Ese Omwaami, Niise olomaloome.”

⁶Yeremia mani n'aboola ati, Omwaami yalomaloma naange n'aboola ati:

⁷“Bone, Hanameli omwaana wa hoochaao Saluumu, achia ohwiicha yooli mani aboole ati, ‘Kula omukuunda okuli Anatooti, olwohuba niye omwiiho wao oli aambi, mani niiwe ohoyera ohukukula.’

⁸Mani Hanameli niyeecha mu lwaanyi lw'omuliindi yi ndali ni ndi, koti lu Omwaami yali n'aboolere, niyamboolera ati, ‘Kula omukuunda kwaange okuli Anatooti mu syaalo sya Bbenjamini, olwohuba niiwe ohoyeere ohukukula; kukule mani kube okwao.’ Mani nimanya endi yino yali Emboosi y'Omwaami.”

⁹Mani niingula hu Hanameli omukuunda kwa Anatooti, niimutuunga eseende choola ebituundu by'efeesa ehumi-na-bitaanu-na-bibiri.

¹⁰Ndeemao ndaaya omuhomo hu ndagaano eyo, mani ndaayifuundiha, ndaalaanga abaloli baabaao, mani ndaamukerera eseende chae hu latiri.

¹¹Ndabukula epaasa yirimo endagaano fuundihe eyo, neende enyanule yayo eyitaali efuundihe, koti lu lako liboola;

¹²mani ndaabidiisa Bbaruku omwaana wa Neria omwiichuhulu wa Mahiseya, Hanameli omuloli wata omuhono hu ndagaano eyo naabona, haandi Abayudaaya bali nibehaale mu lwaanyi lw'omuliindi nibabona.

¹³Mani nindagira Bbaruku mu moni waabwe, nimboola endi,

¹⁴Omwaami w'Obunyala, Nasaae wa Yisiraeli aboola ati: Bukula endagaano chino, efuundihe neende eyitaali efuundihe, mani ochite mu syoongo y'eloba loonge, mani chinyale ohubiihwa emyaaka emiingi.

¹⁵Olwohuba Omwaami w'Obunyala, Nasaae wa Yisiraeli aboola ati: Enyuumba neende emikuunda neende endalo ch'emisabbiibbu, haandi byahakulwe mu syaalo sino.

¹⁶Mani nindali nimalire ohuberesa Bbaruku omwaana wa Neria endagaano y'ohukula eyo, ndasaba Omwaami nimboola endi:

¹⁷“Ewe Omwaami Nasaae, Niiwe owaloonga ekulu neende esyaalo niwehoonyera obunyala bwao buungi neende amaani kao. Sibulao esiindu syootanyala daawe.

¹⁸Weekesa obuheeri bwao butaakama eyiri abaandu elifu neende elifu, nae osaandya abaana hulw'ebyonoono bya balaata yaabwe, Ewe nasaae w'obunyala neende ow'amaani, eliita lyao nilyo, Omwaami w'Obunyala.

¹⁹By'oteesa bihunuufu nibyo haandi bi ohola by'amaani nibyo. Obona buli siindu si baandu bahola, haandi oberesa buli muundu omukabo ohweema hu biholwa byaabwe.

²⁰Niiwe owahola eby'amayia neende ebiwuukisa mu syaalo sya Misiri, mani ohwoola buti, mu Yisiraeli neende mu byaalo biindi byoosi. Mani bulaanu n'omanyihana buli abuundu.

²¹Olw'amaya neende ebiwukisa, neende obunyala bwao bw'amaani neende ebitiisa by'amaani, watusa abaandu bao mu syaalo sya Misiri.

²²Mani noobaberesa esyaalo sino, si weechuba ohuberesa bakuuka yaabwe, esyaalo silai sihulukusa amabeere neende obuuhi.

²³Mani nibasiingiramo nisiba esyaabwe. Nae nibeengiramo bahaya ohudiira amalako kao oba ohuhola bi odaha; nibahaya ohuhola bi wabalagira ohuhola. Mani sakira, obakwiisireho amasira kano koosi.

²⁴Bone, Abakalidaaya boombaahe olukubo ohwebodoohania esiko nibadaha ohuseeta basiwaambe. Mani hulw'ebiita, enjala neende oluumbe, esiko sino sichia ohuba mu bunyala bw'Abbabbilooni abali ohusilwaania. Mani obone oti ebyo bi walaanga byoolereere abweene.

²⁵Nae Ewe Omwaami Nasaae, niiwe owamboolere oti, ‘Kula omukuunda neende eseende mani onyoole Abaloli’ kata esiko sino siri aambi ohuwaambwa neende Abakalidaaya.”

²⁶Mani Omwaami niyamboolera ati:

²⁷“Bona, Niise Omwaami, Nasaae w'abaandu boosi. Sibulao esiindu kata silala esiihaya.

²⁸Sakira Omwaami aboola ati: Bona, ndi ohudiisa esiko sino mu mahono k'Abakalidaaya neende mu bunyala bwa Nebukadineesa omutuki wa Bbabbilooni, mani bachia ohusiwaamba.

²⁹Abakalidaaya abali ohulwaania esiko sino bachia ohwiichia basiyaambieho omuliro, basisaambe. Bahasaambe neende enyuumba chi baandu baniooheseraangamo obubbaani eyiri Bbaali neende ebiyaanwa by'ohung'wa ebyaanirwa banasaae baandi, mani byaasiingisa etima lyaange.

³⁰Olwohuba abaandu bomu Yisiraeli neende abaandu bomu Buyudaaya, ohuchaakira elalira mubuyere bwaabwe, baandiisa etima haandi baanyoolesa hulw'ebiindu bi bahola.

³¹Esiko sino syasiingisa etima lyaange neende obwaalaba bwaange ohutulira elalira hu ludaalo lu basyoombahiraho ohwoola buti, mani njia ohusisihirisa situle mu moni waange,

³²hulw'ebyonoono byoosi bi baandu bomu Yisiraeli neende abaandu bomu Buyudaaya bahola ohusiingisa etima lyaange alala neende abatuki baabwe neende abahunuufu baabwe, abalaamisi baabwe neende abanabbi baabwe, abasaacha bomu Buyudaaya neende abo abamenya mu Yerusalemu.

³³Baafudatiire mani baahaya ohuuningaala; kata neende nindabeekesaanga buli siha, haba sibatekeeresaanga mani badiira bi mbeekesa.

³⁴Bata eby'omusiro mu nyuumba, yoombahwa ohwiisa oluyaali mu liita lyaange, mani nibayinyaasa.

³⁵Boombahira Bbaali alutaari mu hooho ly'omwaana wa Hinoomu, ohumuyaanira abaana basyaani baabwe neende ohuyaana abaana baabwe bahaana eyiri Moleki. Haba simbalagiraangaho ohuhola esiindu esyo, haandi haba si sibaasangaho daawe endi banyala ohuhola esy'omusiro sino, ohukera abaandu bomu Buyudaaya bonoone.”

³⁶Bulaanu sakira Omwaami Nasaae wa Yisiraeli yaboola ebidiira hu siko sino ati, Yeremia, abaandu baboola bati ebiita, enjala neende oluumbe nibyo ebichia ohukera esiko sino sikwe mu bunyala by'omutuki wa Bbabbilooni.

³⁷Bona, njia ohubuusa abaandu baange alala mbatuse mu byaalo byoosi bi ndabasalaanisiramo ninyooleere. Njia ohukobosa abaandu baange abuundu ano, mani mbalehe bamenyeo mu muleembe.

³⁸Bachia ohubeechaanga abaandu baange, mani Syesi mba Nasaae waabwe.

³⁹Njia ohubaberesa omwooyo mulala neende esichiiririrwa silala, hu banyale ohuunjisamo oluyaali endaalo choosi, haandi hu banyale ohuba bulai, abeene neende abaana baabwe baheebulwe.

⁴⁰Njia ohuhola nabo Endagaano y'endaalo choosi, mani haba sindahahaye ohubaholera obulai. Njia ohubaberesa omwooyo kw'ohunjisamo oluyaali, mani bahayeenge ohuundulaho.

⁴¹Njia ohusangaalaanga nimbaholera ebilai, haandi njia ohubaleha mu syaalo sino mubwadyeeri, neende omwooyo kwaange kwoosi neende obulamu bwaange bwoosi.

⁴²Olwohuba Omwaami aboola ati: “Koti sa lu ngwiisire amasira hu baandu bano, nilwo lu njia ohubaberesa ebilai byoosi bi ndabasuubisa.

⁴³Abaandu bachia ohukula emikuunda mu syaalo sino si muli ohuboola muti, syeeholere esiparara, esitaalimo abaandu oba ebisolo, haandi esyabereswa Abakalidaaya.

⁴⁴Abaandu bachia ohukula emikuunda neende eseende, haandi endagaano yichia ohuteechwaangaho omuhono mani yifuundihwa abaloli nibaluwo, mu syaalo sya Bbenjamini, mu bituundu byebodoohaanie Yerusalemu, neende mu biko byomu Buyudaaya, mu biko byomu syaalo sy'ebigulu, mu biko bya Sefwela, neende mu biko bya Negebbu; olwohuba njia ohukobosao ehabi yaabwe. Ese Omwaami, Niise oboolere.”