Read saamia Yeremia 33 Bible Online

Yeremia 33 - saamia bible

Yeremia 33

¹Omwaami yalomaloma neende Yeremia ehabi lyoohubiri, n'asisiiri mu jeela yomu lwaanyi lw'omuliindi n'aboola ati:

²Omwaami owaloonga esyaalo mani yasibuumba yaasita yi sihoyera, eliita lyae nilyo Omwaami aboola ati:

³Naange mani njia ohukaluhamo, njia ohuhuboolera ebiindu bihuluundu haandi ebyakiswa by'otaamanyireho daawe.

⁴Olwohuba Omwaami Nasaae wa Yisiraeli aboola ebidiira hu nyuumba chomu siko sino neende enyuumba ch'abatuki bomu Buyudaaya chi balikula-likula nibetekehera ebiita ati:

⁵“Abakalidaaya bali ohwiicha ohulwaana, mani bachia ohwiichusa mu siko sino emilaambo ky'abaandu ba njia ohwiita mu tima neende obwaalaba bwaange. Olwohuba malire ohufudatira esiko sino hulw'ebibi byoosi bi baandu bamwo bahola.

⁶Bona, njia ohusikobosamo obulamu haandi njia ohusiwonia. Njia ohweekesa abaandu bamwo omuleembe muungi mani babe bulai.

⁷Njia ohukobosa ehabi mu Buyudaaya neende mu Yisiraeli, mani boombahe buyaha babe koti lu bali hale.

⁸Njia ohubalabya mbatuseho ebyonoono byaabwe byoosi bi bahola mu moni waange, haandi njia ohubaleheramo ebyonoono byaabwe neende obujeemu bwaabwe.

⁹Mani esiko sino sichia ohusaangaasa mani siinjisemo oluyaali neende efuma. Abaandu bomu byaalo boosi bahatye haandi bateengereha nibahawulire ebiindu bilai bi ndahaholere abaandu bomu Buyudaaya.”

¹⁰Omwaami aboola ati: Abuundu ano yi baandu baboola bati, yeeholere esiparara sibulamo abaandu oba ebisolo, mu biko byomu Buyudaaya neende hu ngira chomu Yerusalemu haba sibisiirimo abaandu oba ebisolo. Nae abuundu ano yahawulirwemo haandi

¹¹amakono k'esangaalo neende omweehoyo, ekono lyooyo odehiisye neende ekono lyooyo odeehere, amakono k'abo abeemba nibaleeta ebiyaanwa by'ohweebasa mu nyuumba y'Omwaami nibaboola bati: “Mweebase Omwaami w'Obunyala, olwohuba Omwaami mulai, haandi obuheeri bwae butaakama bw'endaalo choosi. Olwohuba njia ohukobosa ehabi mu syaalo sino, koti lu byali hale. Ese Omwaami, Niise oboolere.”

¹²Omwaami w'Obunyala aboola ati: “Esyaalo sino esiri koti esiparara, esibulamo abaandu oba ebisolo, mani mu biko byasyo byoosi, mwahabeemo haandi abaayi bahaayiremo ebyaayo byaabwe.

¹³Mu biko byomu syaalo sy'engulu, neende mu biko bya Sefela, neende mu biko bya Negebbu, mu syaalo sya Bbenjamini, neende ebyaalo byebodoohanie Yerusalemu, neende mu biko byomu Buyudaaya, abaayi haandi bahabalire ebyaayo byaabwe. Ese Omwaami, Niise oboolere.”

¹⁴Omwaami aboola ati: “Bone, ebiha byahoole, lu ndahooseresere ebiindu bi ndasuubisa abaandu bomu Yisiraeli neende abomu Buyudaaya.

¹⁵Mu ndaalo echo haandi mu biha ebyo, njia ohudoola omutuki muluungifu ohutula mulwiibulo lwa Daudi; mani niye owahaleete obwadyeeri neende obuluungifu mu syaalo sino.

¹⁶Mu biha ebyo, Buyudaaya syahawonisibwe haandi Yerusalemu syahabe mu muleembe. Mani esiko esyo syahakulihwe eliita siti: Omwaami niye obuluungifu bweefwe.”

¹⁷Olwohuba Omwaami aboola ati: “Mulwiibulo lwa Daudi, endaalo choosi, mwahabecheengemo omutuki wa Yisiraeli.

¹⁸Haandi mu Yisiraeli mwahabecheengemo abalaamisi ohutula mu nono ya Leefi ohuhalaabaanira mu moni waange nibayaana ebiyaanwa bisaambwa, neende ebiyaanwa by'emwo bisaambwa, neende ohunyaaniraanga endaalo choosi.”

¹⁹Omwaami yamboolera ati:

²⁰“Nimunyala ohufunaka Endagaano yaange neende esideete, neende Endagaano yaange neende esiro, mani esideete neende esiro byaahaya ohubaao mu biha byabyo.

²¹Endagaano yaange neende Daudi yosi yichia ohufunakwa, mani abuleo omwiichuhulu wae ochia ohwiihalaho hu sisaala syae sy'obutuki atuka, neende Endagaano yaange neende abalaamisi b'enono ya Leefi ohuba abahalaabani baange.

²²Koti eye lyo muukulu litanyala ohubalwa, neende omusenye kwohu nyaanja kutanyala ohupiimwa, nilwo lu njia ohumeeda olwiibulo lwa Daudi omuhalaabani waange, neende abalaamisi b'enono ya Leefi abahalaabanira.”

²³Omwaami yamboolera ati:

²⁴“Yeremia, osisiiri ohuwulira abaandu nibaboola bati, ‘Omwaami yeebwaaba Yisiraeli neende Buyudaaya, amadaala koombi kayedoolera’? Mani mu ngeri yino, nibalekeeresa abaandu baange nitababonaho daawe koti esyaalo mu moni waabwe.”

²⁵Omwaami aboola ati: “Nitataao Endagaano yaange neende esideete neende esiro ohubechaangao mu biha byabyo, neende amalako kaliinda esyaalo neende ekulu,

²⁶ao mani njia ohwebwaaba olwiibulo lwa Yakobbo neende Daudi omuhalaabani waange, haandi siinjia ohudoola mulala hu beechuhulu bae ohutuka endaalo choosi abeechuhulu ba Abburahamu, Yisaka, neende Yakobbo. Olwohuba njia ohukalusao ehabi chaabwe, haandi njia ohubakwiira esisa.”