Read saamia Yeremia 34 Bible Online

Yeremia 34 - saamia bible

Yeremia 34

¹Omwaami yalomaloma naange, Nebukadineesa omutuki wa Bbabbilooni naali neende eye lyae alala neende amaye k'obwaami bwohu syaalo bwoosi obuli mu bunyala bwae neende abaandu boosi abali nibalwaania Yerusalemu neende ebiko bisyebodohaanie byoosi.

²Omwaami Nasaae wa Yisiraeli aboola ati: Chia olomalome neende Sedekia omutuki wa Buyudaaya mani omuboolere oti, Omwaami aboola ati: Bona, njia ohuta esiko sino mu bunyala bw'omutuki wa Bbabbilooni, mani achia ohusisaamba omuliro.

³Ewe wesi haba soochia huwona; nae ochia ohuwaambwa obe mu bunyala bwae. Ochia ohubona omutuki wa Bbabbilooni emoni-hu-moni haandi olomalome nae ewe omweene, mani wahachie Bbabbilooni.

⁴Ewe Sedekia omutuki wa Buyudaaya, wulira Emboosi y'Omwaami eyihudiiraho. Omwaami aboola ati: Haba soochia ohwiitirwa mu biita.

⁵Wahafwiire mu muleembe. Haandi koti abaandu banioohesera obubbaani nibasiiha bakuukaao, abatuki bahutaangira ohubao, mani wesi bachia ohuhunioohesera obubbaani. Bahahulire nibaboola bati, “Omutuki weefwe afwiire!” Olwohuba Ese Omwaami, Niise oboolere.

⁶Omunabbi Yeremia yaboolera Sedekia omutuki wa Buyudaaya emboosi chino choosi naali mu Yerusalemu.

⁷Eye ly'omutuki wa Bbabbilooni lyali niliseetere Yerusalemu neende ebiko byomu Buyudaaya ebyali nibidoong'ere sa ebiko bya Lakisi neende Aseka. Olwohuba ebiko bino byoong'ene nibyo ebyali nibisisiiri ebisite.

⁸Omwaami mani naalomaloma neende Yeremia, omutuki Sedekia naamalire ohuhola Endagaano neende abaandu bomu Yerusalemu boosi ohulehuula abawaambe.

⁹Buli muundu yaali owohulehuula abawaambe bae Baibburania boosi, abasaacha neende abahasi, mani abuleo omuundu wuwaamba Omuibburania waasye.

¹⁰Abaandu boosi bafukiirira, abachweenufu boosi neende abaandu boosi abali nibaholere Endagaano bati buli muundu alehuule omuwaambe wae, omusaacha oba omuhasi, mani bahaye ohuboywa haandi; nibafukiirira ohubalehuula.

¹¹Nae luunyuma mani nibakaluuhania ebibaaso byaabwe, nibakobosa abawaambe ba bali nibalehuulire, abasaacha neende abahasi, mani haandi nibachaaka ohubatuka koti ababoye.

¹²Omwaami Nasaae wa Yisiraeli yaboolera Yeremia ati:

¹³“Boolera abaandu oti, Omwaami Nasaae wa Yisiraeli aboola ati: Ndahola Endagaano neende bakuuka yeeng'we, lu ndabatusa mu syaalo sya Misiri, yi bali mu buwaambe, nimboola endi,

¹⁴ ‘Buli myaaka kitaanu-na-kibiri nikiwa, bahoyere ohulehuulaanga buli muwaambe Muibburania waasyaabwe yi bakula oba naabahalaabaniireenge emyaaka kisaasaba.’ Nae bakuuka yeeng'we haba sibaambulira daawe oba baatekeeresa bi mboola.

¹⁵Eng'we mwesi ndiidi chibitireo mweyolobya mani mwahola ebisaangaasa, buli muundu hweeng'we n'alaanga koti lu alehuulire Omuibburania waasye owali omuboye, mani nimuhola endagaano mu moni waange mu nyuumba yaange yohwiinamiramo.

¹⁶Nae haandi nimukaluuhania ebibaaso byeeng'we, mwaanyaasa eliita lyaange, buli muundu niyekobosera abawaambe bae, abasaacha neende abahasi, ba mwali nimulehuulire, babe mu muleembe koti lu bali nibekoomba, nimubayiika bachaake ohubahalaabaniraanga koti ababoye beeng'we.

¹⁷Mani sakira Omwaami aboola ati; munjeemeere, mani mwaahaya ohuberesa abaandu baasyeeng'we omuleembe kyaabwe. Mani bone, njia ohuberesa eng'we endaalo ky'ohwiitirwa mu biita, oba ohufwa endwaae, oba ohufwa enjala. Njia ohukera abaandu bomu bwaami bwohu syaalo bwoosi butye esiindu siinjia ohubahola.

¹⁸Abaandu bahalaka Endagaano yaange, haandi baahaya ohudiira amalako k'endagaano yi ndahola nabo, nibabita akatikaati w'ebituundu bibiri byaakanirira by'esurusi.

¹⁹Ababalabalanu bomu Buyudaaya neende abomu Yerusalemu, abalooye, abalaamisi, neende abaandu bomu syaalo boosi nibo ababita akatikaati w'esurusi eyo.

²⁰Mani ndahabate mu mahono k'abasuku baabwe neende mu mahono k'abo abakiiya ohubeeta. Amayoni neende ebisolo biteende byahalye emilaambo kyaabwe.

²¹Sedekia omutuki wa Buyudaaya yeesi neende abachweenufu bae, ndahabate mu mahono k'abasuku baabwe neende mu mahono k'abo abakiiya ohubeeta. Njia ohubabata mu mahono k'amaye b'omutuki wa Bbabbilooni, ababeere nibaakaame ohubaseeta.

²²Bone, njia ohubalagira, bakobole baseete esiko sino, basilwaanie mani basiwaambe, haandi basisaambe omuliro. Njia ohuhola ebiko byomu Buyudaaya bibe amakuunda, abuleo omuundu yeesi owubimenyamo daawe. Ese Omwaami, Niise oboolere.”