Read saamia Yeremia 35 Bible Online

Yeremia 35 - saamia bible

Yeremia 35

¹Mu ndaalo chi Yehoyakimu omwaana wa Yosia, yali omutuki wa Buyudaaya, Omwaami yaboolera Yeremia ati:

²“Yeremia, chia eyiri Abarekabbu, olomalome nabo, mani obeengise mu sisenge silala esyomu nyuumba y'Omwaami; obaberese amalwa bang'we.”

³Mani nimbukula Yaasaniya omwaana wa Yeremia, omwiichuhulu wa Habbasinia, neende bamwaanang'ina, neende abaana bae boosi, neende Abarekabbi boosi.

⁴Mani nimbaleeta mu nyuumba y'Omwaami, nimbeengisa mu siseenge sy'abaana ba Anani, omwaana wa Yigidaliya, omuundu wa Nasaae. Esiseenge sino syali aakulu w'esiseenge sya Maseya omwaana wa Saluumu, omuliindi w'olwaanyi, aambi neende esiseenge sy'abachweenufu.

⁵Ndahate ebikoombe neende echupa chiichuule amalwa mu moni w'Abarekabbi; mani nimbaboolera endi, “Mung'we amalwa,”

⁶Nae nibakobolamo bati: “Efwe haba sihuchia ohung'wa amalwa, hulw'abakuuka yeefwe Yonadabbu, omwaana wa Rekabbu, yatulagira ati, ‘Mutang'wechaangaho amalwa, eng'we oba abasyaani beeng'we.

⁷Haandi mutoombahaangaho enyuumba; mutataakaangaho emwo; mutalimaangaho endalo y'emisabbiibbu. Nae mumenyeenge sa mu mayeema endaalo choosi, hu munyale ohuyiindira mu syaalo simulimo koti bawalukeenda.’

⁸Mani hwadiira ebyo byoosi bi kuuka yeefwe Yonadabbu omwaana wa Rekabbu yatulagira, obutang'wa amalwa mu bulamu bweefwe bwoosi, efwe beene, abahasi beefwe, abasyaani beefwe, oba abahaana beefwe.

⁹Yatulagira obutoombahaho amayuumba k'ohumenyamo neende ohutabechaangaho neende endalo ch'emisabbiibbu oba emikuunda oba emwo.

¹⁰Nae humenyeenge sa mu mayeema. Hwawulira mani nihuhola ebyo byoosi bi Yonadabbu kuuka yeefwe bi yatulagira.

¹¹Nae Nebukadineesa omutuki wa Bbabbilooni niyaseeta esyaalo sino, hwaboola huti, ‘Yiche, mani lehe huchie Yerusalemu hulw'ohutya eye ly'Abakalidaaya neende eye lya Abasiria.’ Mani sakira huli mu Yerusalemu.”

¹²Omwaami yalomaloma neende Yeremia n'aboola ati:

¹³“Omwaami w'Obunyala, Nasaae wa Yisiraeli aboola ati: Chia oboolere abaandu bomu Buyudaaya neende abomu Yerusalemu oti: Omwaami ateeba ati, Haba simwaheeke haandi mwawulira bi mboola?

¹⁴Abeechuhulu ba Yonadabbu omwaana wa Rekabbu baawulira bi yabalagira obutang'wa amalwa, mani haba sibang'wechaanga amalwa ohwoola buti, olwohuba baawulira bi kuuka yaabwe yabalagira. Nae Ese nomanoome naang'we amahabi maangi muno, nae nimuhaya ohuumbulira daawe.

¹⁵Ndabatumira abahalaabani baange, abanabbi, ataali ohusinyiha nimboola endi, ‘Buli muundu hweeng'we alehe ebiima byae bibi, mani ahole ebiindu bilai. Haandi mulehe ohuloondaanga banasaae baandi neende ohubahalaabaniraanga, hu munyale ohumenya mu syaalo si ndababeresa, eng'we neende bakuuka yeeng'we.’ Nae eng'we haba simumbuliraanga oba mwaamanya bulai bi mboola daawe.

¹⁶Abeechuhulu ba Yonadabbu omwaana wa Rekabbu badiira amalako ka kuuka yaabwe yababeresa, nae abaandu bano haba sibaambulira daawe.

¹⁷Mani sakira Omwaami, Nasaae w'Amaye, Nasaae wa Yisiraeli aboola ati: Bone, njia ohukwiisa hu baandu bomu Buyudaaya neende abo boosi abali mu Yerusalemu esibi syoosi sindaboola ohubakwiisaho. Olwohuba ndalomaloma nabo mani nibahaya ohuwulira, ndabalaanga, nibahaya ohuungobolamo.”

¹⁸Nae nimboolera Abarekabbu endi: “Omwaami w'Obunyala, Nasaae wa Yisiraeli aboola ati, Olwohuba mwawulira amalako ka Yonadabbu kuuka yeeng'we, mani mwaadiira amalako kae koosi, mwaahola bi yabalagira,

¹⁹sakira Omwaami w'Obunyala, Nasaae wa Yisiraeli aboola ati: ‘Yonadabbu omwaana wa Rekabbu, anaabecheenge neende omwiichuhulu musyaani onabahalaabaniraanga endaalo choosi.’ ”