Read saamia Yeremia 36 Bible Online

Yeremia 36 - saamia bible

Yeremia 36

¹Mu mwaaka kwohune kw'obutuki bwa Yehoyakimu omwaana wa Yosia Omutuki wa Buyudaaya, Omwaami yamboolera ati:

²“Yeremia, bukula olupapula lusiriingise mani waandiikeho emboosi choosi chi hubooleere echidiira hu Yisiraeli neende hu Buyudaaya neende hu byaalo byoosi, ohutula hu ludaalo lu ndachaakiraho ohulomaloma naawe, ohutula mu ndaalo cha Yosia ohwoola buti.

³Awuundi abaandu bomu Buyudaaya bachia ohuwulira esibi syoosi si ndekeehe ohubakwiisaho, mani buli muundu akaluuhane atule hu biima byae bibi, mani nyale ohubaleheramo ebyonoono byaabwe neende omusaango kwaabwe.”

⁴Ndalaanga Bbaruku omwaana wa Neria, ndaamuboolera emboosi choosi chi Omwaami yali niyamboleere, mani Bbaruku yachandiika hu lupapula lusiriingise.

⁵Mani nindagira Bbaruku nimboola endi: “Haba sisiifukiirirwa ohwiingira mu nyuumba y'Omwaami.

⁶Sakira ewe chiaayo, hu ludaalo lu baandu basiibiraho enjala, mani osomere alafu abaandu boosi nibawulira, emboosi ch'Omwaami chi hubooleere ohwandiika echiri hu lupapula lusiriingise. Haandi ochia ohuchisoma eyiri abaandu batulire mu biko byomu Buyudaaya biindi bosi nibawulira.

⁷Awuundi bahasabe Omwaami, mani buli muundu yaaleha ebiima byae bibi, olwohuba bi Omwaami aboolere ohuhola mu tima lyae neende mu bwaalaba bwae bihoongo nibyo.

⁸Mani Bbaruku omwaana wa Neria naahola koti lu ndamulagira. Mani n'asoma hu lupapula lusiriingise emboosi ch'Omwaami naali mu nyuumba y'Omwaami.”

⁹Mu mwaaka kwohutaanu kw'obutuki bwa Yehoyakimu omwaana wa Yosia, omutuki wa Buyudaaya, mu mwoosi kwohataanu-na-hane, balaangirira esisiibo mu moni w'Omwaami. Mani abaandu boosi abomu Yerusalemu neende abaandu boosi abomu biko byomu Buyudaaya nibasiiba.

¹⁰Bbaruku yeemao yaasoma emboosi choosi echiri mu lupapula lusiriingise, emboosi choosi chi ndamuboolera abaandu boosi nibawulira. Yachisomera mu nyuumba y'Omwaami naali mu sisenge sya Gemaria omwaana wa Safani omwaandiiki, esiseenge mu lwaanyi lw'aakulu, hu mulyaango kw'Esiruwa silaangwa Siyaha esy'enyuumba y'Omwaami.

¹¹Mikaaya, omwaana wa Gemaria haandi omwiichuhulu wa Safani niyawulira Bbaruku n'asoma hu lupapula lusiriingise emboosi choosi chi Omwaami yaboola.

¹²Yeehirira yaachia mu dooho ly'omutuki, niyeengira mu sisenge syomwaandiiki; yi bachweenufu boosi bali nibehaale. Elisama omuwandiiki, Delaya omwaana wa Semaya, Elinatani omwaana wa Akubboori, Gemaria omwaana wa Safani, Sedekia omwaana wa Hanania, neende abachweenufu boosi.

¹³Mikaaya yababoolera emboosi choosi chi yawulira Bbaruku n'asomera abaandu.

¹⁴Mani abachweenufu nibatuma Yehudi omwaana wa Netania, omwiichuhulu wa Selemia, omwiichuhulu wa Etiopia, ohuboolera Bbaruku ati, “Bukula olupapula lusiriingise lu osomeere abaandu, mani wiichie.” Mani Bbaruku omwaana wa Neria yakiinga olupapula lusiriingise yaaluleeta.

¹⁵Bamuboolera bati, “Yihala aasi osome nihuwulira.” Mani Bbaruku n'abasomera.

¹⁶Nae nibawulira emboosi choosi, batingaalanaho abeene-na-beene, nibatiire. Mani nibaboolera Bbaruku bati, “Huli neende ohuboolera omutuki emboosi chino choosi.”

¹⁷Bateeba Bbaruku bati, “Tuboolereho, wanyala otye ohwandiika emboosi chino chosi? Yeremia niye owalomalomaanga naawe wandiika kose?”

¹⁸Bbaruku yakobolamo ati, “Yeremia mweene niye owalomaloma emboosi chino, naange ndaachiandiika neende obuwiino hu lupapula lusiriingise luno.”

¹⁹Mani abahoongo nibaboolera Bbaruku bati, Ewe neende Yeremia, muchie mweekise, abuleo omuundu onyala ohumanya yi muli.

²⁰Abahoongo abo beemao baabiiha olupapula lusiriingise olwo mu siseenge sy'Elisama omwaandiiki, mani baachia eyiri omutuki mu lwaanyi, baamuboolera emboosi echo choosi.

²¹Omutuki yatuma Yehudi ohuleeta olupapula lusiriingise. Yehudi yatusa olupapula lusiriingise olwo mu siseenge sy'Elisama omwaandiiki, naasisomera omutuki neende abahoongo boosi abali nibeemere nibebodoohaanie omutuki.

²²Kwali omwoosi kwa hataanu-na-hane. Omutuki yali niyehaale mu nyuumba yae y'etoocho niyootaanga omuliro.

²³Yehudi niyamalaanga ohusoma ebituundu bidatu oba bine, omutuki yaheengaangaho esituundu neende ehaande ly'omwaandiiki naasisukuna mu muliro, ohwoola lu lupapula lusiriingise lwoosi lwaweera mu muliro mani lwaaya lwoosi.

²⁴Nae omutuki noomba mulala hu bahalaabani bae abawulira emboosi chino choosi, haba sibatya oba beeyendeherera daawe.

²⁵Kata Elinatani neende Delaya neende Gemaria nibekweeda omutuki ahaye ohusaamba olupapula lusiriingise olwo, omutuki yahaya ohubawulira.

²⁶Mani omutuki yalagira Yerameli omwaana w'omutuki neende Selemia omwaana wa Asirieli neende Selemia omwaana wa Abudeeli ohudiira Bbaruku omwaandiiki neende Yeremia omunabbi. Nae Omwaami naabakisa.

²⁷Bulaanu, omutuki niyamala ohusaamba olupapula lusiriingise, omwali emboosi chi Yeremia yaboolera Bbaruku mani yachandiika, Omwaami yaboolera Yeremia ati:

²⁸“Bukula olupapula lusiriingise luundi mani wandiikeho emboosi choosi echali hu lula, lu Yehoyakimu omutuki wa Buyudaaya yasaamba.”

²⁹Mani ebidiira hu Yehoyakimu omutuki wa Buyudaaya oyo, muboolere oti, Omwaami aboola ati, Osaambire olupapula lusiriingise luno noboola oti, “Lwasiina wandiikamo oti omutuki wa Bbabbilooni yaheechie mani asihirise esyaalo sino, haandi yaheete mani amalemo abaandu neende ebisolo?”

³⁰Mani sakira Omwaami aboola ebidiira hu Yehoyakimu omutuki wa Buyudaaya ati abulao omwaana wae owaheehale hu sisaala sy'obutuki sya Daudi. Haandi omulaambo kwao kwahasukunwe erwaanyi omubasu kukuubbe esideete haandi emboo yikudiire mu siro.

³¹Njia ohumusaandya alala neende olwiibulo lwae neende abahalaabani bae hulw'ebibi byaabwe. Njia ohubakwiisaho, alala neende abomu Yerusalemu, neende hu baandu bomu Buyudaaya esibi syoosi. Olwohuba ndabalabula mani baahaya ohudeebayo daawe.

³²Yeremia yabukula olupapula lusiriingise luundi mani yaluberesa Bbaruku omwaana wa Neria, omwaandiiki wae. Bbaruku mani niyaandiika emboosi choosi chi Yeremia yamuboolera echali hu lupapula lusiriingise lu Yehoyakimu omutuki wa Buyudaaya lu yali nasaambire mu muliro, haandi nameedereho emboosi nyiingi echali nasilala chityo.