Read saamia Yeremia 37 Bible Online

Yeremia 37 - saamia bible

Yeremia 37

¹Sedekia omwaana wa Yosia, yi Nebukadineesa omutuki wa Bbabbilooni yahola ohuba omutuki wa Buyudaaya, mu bweyaango bwa Koniya omwaana wa Yehoyakimu.

²Nae Sedekia neende abahoongo bae oba abaandu bomu syaalo nabo nibahaya ohuwulira emboosi ch'Omwaami chi omunabbi Yeremia yalomloma.

³Omutuki Sedekia yatuma Yehukaali omwaana wa Selemia, neende omulaamisi Sefaniya, omwaana wa Maseya, eyiri omunabbi Yeremia n'aboola ati: “Tusabire eyiri Omwaami Nasaae weefwe.”

⁴Bulaanu Yeremia yali n'asisiiri ohuboywa, mani yali nasiikeendaanga mu baandu koti lu adaha.

⁵Ebiha bino eye lya Hofura, omutuki wa Misiri lyoolere emwaalo hu lwaaho lwa Buyudaaya. Nae eye ly'Abakalidaaya nilyawulira lityo, lyamala lyaatula mu Yerusalemu.

⁶Mani Omwaami yaboolera omunabbi Yeremia ati:

⁷“Omwaami Nasaae wa Yisiraeli aboola ati, Chia oboolere omutuki wa Buyudaaya, oyo ohutumire yiindi ohundeteebaho oti, ‘Bona, eye lya omutuki wa Misiri eliichire ohuhuhoonya mbao liri aambi ohukobola mu syaalo syaalyo sya Misiri.’

⁸Mani Abakalidaaya bachia ohukobola balwaanie esiko sino. Bachia ohusiwaamba mani basisaambe omuliro.”

⁹Omwaami aboola ati, Mutebacha abeene nimuboola muti, “Abakalidaaya haba sibachia hukobola daawe, olwohuba mubwadyeeri bachia ohukobola.

¹⁰Kata mwahayiingira eye ly'Abakalidaaya elibalwaania lyoosi, mani badoong'ao abasikaari banyaalihe boong'ene nibeyaliise mu yeema, abo bachia ohusiingira sa basaambe esiko sino omuliro.”

¹¹Bulaanu eye ly'Abakalidaaya nilyali nilitulire mu Yerusalemu olwohuba eye lya omutuki wa Misiri lyali nilisudire aambi,

¹²Yeremia yatula mu Yerusalemu yaachia mu syaalo sya Bbenjamini eyiri abeeho bae anyoole omukabo kwae.

¹³Nae niyoola hu Siruwa sya Bbenjamini, omuhuluundu w'abaliindi owali ao, eliita lyae nilyo Yiriya omwaana wa Selemia, omwiichuhulu wa Hanania, namwemesa, n'aboola ati, “Ewe oli ohweyiba ochie hu Bbabbilooni.”

¹⁴Nae Yeremia naakobolamo ati, “Haba siindi hweeyiba ohuchia hu Bbabbilooni.” Nae Yiriya naatawulira daawe, nae yandiira yaanjira eyiri abahoongo.

¹⁵Mani abachweenufu nibaanjalabira muno, haandi nibaahuya mani nibaamboyera mu nyuumba ya Yonatani omwaandiiki eyali niyeeholere ejeela.

¹⁶Baanda mu jeela y'aasi mu liina, niimalamo endaalo yiingi.

¹⁷Ebiha nibyabitao, omutuki Sedekia yatuma baanaange. Nindali mu dooho lyae, omutuki wandeeba mu bweekisi n'aboola ati, “Yiluwo emboosi yooli nayo ohutula eyiri Omwaami?” Mani ningobolamo endi, “Yiriwo.” Nimuboolera endi, “Ochia ohudiiswa mu mahono k'omutuki wa Bbabbilooni.”

¹⁸Haandi ndateeba omutuki Sedekia endi, “Sibi siina siiholere eyiri ewe, oba eyiri abahalaabani bao oba eyiri abaandu esikera nimuumboya?

¹⁹Abanabbi beeng'we bali yeena abo ababalaamiraanga nibaboola bati, ‘Omutuki wa Bbabbilooni haba saachia ohubaseeta oba yaseeta esyaalo sino’?

²⁰Bulaanu ewe omutuki, omwaami waange, hwekweeda owulire mani ofukiirire si husaba: otangobosa mu nyuumba ya Yonatani omwaandiiki, nyale ohufwiira eyo.”

²¹Ao mani omutuki Sedekia n'alagira mani nibamboyere mu lwaanyi lw'omuliindi w'edooho. Mani nindoong'a omwo, mani nibambechaanga buli ludaalo omugaati mulala, ohutula eyiri omuubbi w'emigaati, ohwoola lu migaati kyoosi kyawa mu siko.