Read saamia Yeremia 38 Bible Online

Yeremia 38 - saamia bible

Yeremia 38

¹Bulaanu Sefatiya omwaana wa Matani, neende Gedalia omwaana wa Pasuhuri, neende Yukali omwaana wa Selemia, neende Pasuhuri omwaana wa Malukiya nibawulira bati Yeremia yali n'aboolera abaandu boosi ati,

²“Omwaami aboola ati, oyo yeesi odoong'a mu siko muno achia ohufwiirwa mu biita, oba ohufwa enjala, oba ohufwa endwaae. Nae buli muundu onaatule mani yeyaanayo eyiri Abakalidaaya, achia ohuwona, haba saachia hwiitwa. Oyo niye onaawonienge obulamu bwae, mani abe omulamu.”

³Omwaami aboola ati, “Esiko sino sichia ohudiiswa mu mahono k'eye ly'omutuki wa Bbabbilooni mani siwaambwe.”

⁴Ao mani abachweenufu abo nibaboolera omutuki bati: “Leha omusaacha wuno yeetwe, olwohuba amala amaani mu basikaari neende abaandu badoong'ere mu siko sino, neende mu baandu boosi, n'aboolera emboosi chiri chityo. Olwohuba omusaacha wuno haba saadahisa abaandu bano omuleembe, nae abadahisa ebidinyu byoong'ene.”

⁵Mani omutuki Sedekia n'abakobolamo ati, “Bone, nguyo ali mu mahono keeng'we. Olwohuba ese koti omutuki, sibulao siinyala ohubakayira.”

⁶Mani nibadiira mani nibaasukuna mu sidiba sya Malukiya, omwaana w'omutuki, esyali mu lwaanyi lw'omuliindi, mani nibaanjira aasi neende emikoye. Esidiba esyo syali nisyahamamo amaachi, ohutusaho amadosi niko akalimo, mani nibaanyiniha omwo.

⁷Nae Ebbedimeleki Omuitiopia mulade, owalichiingi mu dooho ly'omutuki, yawulira ati basukuune Yeremia mu sidiba. Esiha esyo omutuki yali niyehaale mu Siruwa sya Bbenjamini.

⁸Ebbedimeleki naachiayo mani n'aboolera omutuki ati:

⁹“Omwaami waange, ewe omutuki, abasaacha bano baholere bubi muno. Yeremia omunabbi bamusukuune mu sibida, mani achia ohufwiira omwo enjala, olwohuba emigaati kiweere mu siko.”

¹⁰Mani omutuki n'alagira Ebbedimeleki Omuitiopia ati, “Bukula abasaacha badatu ochie nabo mani mwiinulule Yeremia omunabbi mu sidiba n'asisiiri ohufwa.”

¹¹Mani Ebbedimeleki naachia neende abasaacha abomu dooho ly'omutuki, n'atusamo engubo ngofu echataanduha, nachiboya hu mikoye, mani n'achiisa aasi mu sidiba eyiri Yeremia.

¹²Ebbedimeleki Omuitiopia n'aboolera yeremiya ati: “Engubo ngofu echo, chite muuhwaaya mwao, emikoye kihaye ohuhuheenga.” Yeremia yahola atyo,

¹³mani nibeenulula Yeremia ohutula mu sidiba. Mani Yeremia n'adoong'a mu lwaanyi lw'omuliindi.

¹⁴Ao mani omutuki Sedekia naatuma balaange Yeremia omunabbi, mani n'amwaakaanira hu mulyaango kwohudatu okwomu nyuumba y'Omwaami. Omutuko n'aboolera Yeremia ati: “Siriyo esiindu siindaha ohuhuteeba; otaangisa esiindu syoosi daawe.”

¹⁵Yeremia n'amukobolamo ati, “Nihuboolera nitahukisire esiindu syoosi, ochia ohuunjita. Haandi nihukerakira, haba soochia huwulira emboosi chaange.”

¹⁶Mani omutuki Sedekia nandechubira mu bweekisi n'aboola ati: “Ndeechuba eyiri Omwaami mulamu, oyo owatuba obulamu, endi haba siinjia huhwiita daawe oba ndaahuyaanayo eyiri abo abakiiya ohuhwiita.”

¹⁷Mani Yeremia yaboolera Sedekia ati: Omwaami, Nasaae w'Amaye, Nasaae wa Yisiraeli aboola ati: “Niweyaanayo eyiri abachweenufu b'omutuki wa Bbabbilooni, ochia ohuwonia obulamu bwao, haandi esiko sino haba sisichia husaambwa omuliro. Ewe neende abomu nyuumba yao muchia ohuwonia obulamu bweeng'we.

¹⁸Nae noohaya ohweyaanayo eyiri abachweenufu b'omutuki wa Bbabbilooni, manya oti esiko sino sichia ohukwa mu mahono k'Abakalidaaya, mani bachia ohusisaamba omuliro, mani wesi haba soochia hubeyibaho daawe.”

¹⁹Mani omutuki Sedekia naakobolamo ati, “Tya Abayudaaya abeyaanayo eyiri Abakalidaaya. Nyala ohweyaanayo mu mahono kaabwe mani baasaandya.”

²⁰Yeremia n'amukobolamo ati, Haba soochia hweyaanayo eyiri abo daawe. Hwekweeda bulaanu owulire ekono ly'Omwaami mu ebyo bi huboolera, mani ochia ohuba bulai, haandi owonie obulamu bwao.

²¹Nae noohaya ohweyaanayo, huno nihwo ohubonehera hu Omwaami yaanjekeese;

²²Bona, abahasi boosi abadoong'a mu dooho ly'omutuki wa Buyudaaya, bachia ohuyirwa eyiri abachweenufu b'omutuki wa Bbabbilooni, haandi bachia ohuchia nibaboola bati, Abeecha bao baweesikaanga bahubacha mani nibahuyiingira. Bulaanu babweene bati oyaandire mu madosi nabo nibeeyiruhira.

²³“Haandi abahasi bao boosi neende abaana bao bachia ohubayaanayo eyiri Abakalidaaya, mani ewe mweene haba soochia ohubeyiibaho daawe, nae ochia ohuwaambwa neende omutuki wa Bbabbilooni; mani esiko sino sichia ohusaambwa omuliro.”

²⁴Mani omutuki Sedekia n'aboolera Yeremia ati, “Leha omuundu yeesi atamanyaho emboosi chino, mani sibulao esibi syahahukweeho daawe.

²⁵Nae abachweenufu nibawulira bati nomanoome naawe mani bahuteeba bati, ‘Tuboolere, siina syeene sy'oboolere omutuki, haandi omutuki ahuboolere siina; otatukisa esiindu syoosi, ataali ao huchia ohuhwiita,’

²⁶obakobolamo oti, Mbeera saba omutuki endi bataangobosa mu nyuumba Yonatani ohufwiira omwo.”

²⁷Abahunuufu boosi nibeecha eyiri Yeremia mani nibamuteeba, mani n'abakobolamo koti lu omutuki yamulagira. Mani nibawaao, olwohuba abulao owaali nawuliire ebyalomwalomwa.

²⁸Yeremia yadoong'a sa mu lwaanyi lw'omuliindi ohwoola hu ludaalo lu Yerusalemu syawaambirwaho.