Read saamia Yeremia 40 Bible Online

Yeremia 40 - saamia bible

Yeremia 40

¹Omwaami yalomaloma naange, Nebbusaradaani omuhoongo w'eye naamalire ohundehuula ohutula Rama, yi bali nibaanjirire nibaamboyere eminyororo alala neende abaandu boosi abatula Yerusalemu neende mu Buyudaaya mani nibabayira Bbabbilooni mu buwaambe.

²Omuhoongo w'eye yanaanga yamboolera ati, “Omwaami Nasaae wao yalaangirira esibi hu syaalo sino;

³Omwaami asyoosereese, aholere koti lu yaboola. Bino byoosi bikwiireo, olwohuba mwonoona mu moni w'Omwaami, haandi mwaamujeemera.

⁴Bulaanu, bona, mbano ndi ohuhuboololaho eminyororo enyaanga yino. Noobona oti silai ohuchia naange Bbabbilooni, yiicha huchie, mani njia ohuhuliinda bulai; nae noobona oti haba sisilai ohuchia naange Bbabbilooni, haba oteecha daawe. Bona, esyaalo syoosi siri mu moni wao; woosi-woosi y'obaasa oti alai, haandi yoodaha ohuchia, niyo yooba ochia.

⁵Nooheengao ohudoong'a, mani kobola eyiri Gedalia omwaana wa Ahikamu, omwiichuhulu wa Safani, yi mutuki wa Bbabbilooni adoolere ohuba gafana w'ebiko byomu Buyudaaya, mani omenye alala neende abaandu bao, oba onyala ohuchia abuundu waandi y'odaha.” Mani omuhoongo w'eye niyamberesa ebyohulya neende esiyaanwa, yandeha ndaawaao.

⁶Ndachia eyiri Gedalia omwaana wa Ahikamu, Misipa, ndaamenya mu baandu ba baleha mu syaalo.

⁷Abahoongo b'amaye bali mu byaalo neende abasikaari baabwe bawulira bati omutuki wa Bbabbilooni adoolere Gedalia omwaana wa Ahikamu ohuba gafana mu syaalo, haandi neende ohuliinda abaandu bahiramo obumanani mu syaalo, abatayirwa Bbabbilooni.

⁸Yisimaeli omwaana wa Netania, neende Yohanani omwaana wa Kareya, neende Seraya omwaana wa Tanuhumeti, neende abaana ba Efai Omunetofaati, Yesaniya omusyaani owa Maka, nibachia neende abasikaari baabwe Misipa eyiri Gedalia.

⁹Gedalia omwaana wa Ahikamu, yaabeechubira alala neende abasikaari baabwe n'aboola ati: “Mutatya ohuhalaabanira Abakalidaaya daawe. Menye sa mu syaalo muno, muhalaabanireenge omutuki wa Bbabbilooni, muba muchia ohuba bulai.

¹⁰Ese njia ohuba Misipa, ohubawoseraanga eyiri Abakalidaaya abali ohwiichia yi huli. Nae eng'we, mubuuse mani mubiihe amalwa k'emisabbiibbu neende ebyaamo by'esiminyu neende amafuta, mani mumenye mu biko byeeng'we bi muwaambire bino.”

¹¹Mu ngeri nasilala eyo, Abayudaaya boosi abali nibamenya mu Moabbu neende mu b'Abaamooni neende mu Edomu neende mu byaalo biindi nibawulira bati omutuki wa Bbabbilooni yali naalehere Abayudaaya baandi ohudoong'a mu Buyudaaya, haandi n'adoolere Gedalia omwaana wa Ahikamu ohuba gafana waabwe.

¹²Abayudaaya boosi beemao baakaluha ohutula mu bituundu byoosi bi bali basalaaniiremo ohwiicha mu syaalo sya Buyudaaya. Mani nibeecha eyiri Gedalia Misipa; nibabuusa efiini y'emisabbiibbu neende ebyaamo byomu siminyu biindi ebiingi muno.

¹³Bulaanu, Yohanani omwaana wa Kareya neende abeemirisi b'amaye boosi abali nibeweereyo beecha eyiri Gedalia e Misipa

¹⁴baamuteeba bati: “Osimanyire oti Balisi omutuki wa Abaamooni atumire Yisimaeli omwaana wa Netania ohuhwiita?” Nae Gedalia naatafukiirira emboosi chaabwe daawe.

¹⁵Yohanani omwaana wa Kareya yachia Misipa yaalomaloma neende Gedalia mu bweekisi n'aboola ati: “Leha njie mani njite Yisimaeli omwaana wa Netania, mani abulao bula omuundu yeesi onasimanye. Lwasiina alehwa ahwiite, mani Abayudaaya boosi abahwebuusireho baasalaana, mani basihirisa Abayudaaya badoong'ereo?”

¹⁶Gedalia omwaana wa Ahikamu yaboolera Yohanani omwaana wa Kareya ati: “Otahola esiindu esyo. Olwohuba by'oli ohulomaloma hu Yisimaeli haba si byadyeeri.”