Read saamia Yeremia 41 Bible Online

Yeremia 41 - saamia bible

Yeremia 41

¹Mu mwoosi kwa hataanu-na-habiri, Yisimaeli omwaana wa Netania, omwiichuhulu wa Elisama, ow'olwiibulo lutuki haandi mulala hu bahunuufu b'omutuki, yeecha Misipa neende abasaacha ehumi ohubona Gedalia omwaana wa Ahikamu. Nibali ohuliira alala ebyohulya,

²Yisimaeli omwaana wa Netania neende abasaacha ehumi bali nae basobolayo engaanga chaabwe beeta Gedalia omwaana wa Ahikamu yi mutuki wa Bbabbilooni yali n'adoolere ohuba gafana mu syaalo esyo.

³Yisimaeli haandi niyeeta Abayudaaya boosi abali neende Gedalia, neende abasikaari Bakalidaaya abali nibadoong'ereo.

⁴Hu ludaalo luloonda olwo lu beeteraho Gedalia, omuundu yeesi n'asisiiri ohusimanya,

⁵abasaacha amahumi kataanu-na-kadatu boola nibatula Sekemu neende Siilo neende Samaria. Bali nibeebekereho ebirefu byaabwe, nibatanduule engubo chaabwe, haandi nibesaandake-saandake emibiri kyaabwe, nibaleeta ebiyaanwa by'emwo neende obubbaani bw'ohunioohesa ohuyaana mu nyuumba y'Omwaami.

⁶Yisimaeli omwaana wa Natania yeecha ohutula Misipa ohubabukaanira, naalira amasika. Niyababukaana, yababoolera ati: “Mwiiche mubone Gedalia omwaana wa Ahikamu.”

⁷Nae niboola mu siko, Yisimaeli omwaana wa Netania neende abasaacha bae babeeta mani baasukuna emilaambo kyaabwe mu sidiba.

⁸Nae mwalimo abasaacha ehumi mwaabo ababoolera Yisimaeli bati: “Otatwiita daawe, olwohuba huli neende engaano, amabere masuungu, amafuta, neende obuuhi ebyakiswa mu mikuunda kyeefwe.” Mani nibabaleha nibatabeeta daawe alala neende abaasye.

⁹Bulaanu esidiba si Yisimaeli yali nasukuunemo emilaambo ky'abasaacha ba yali niyeetere syali esihoongo muno, si omutuki Asa yali naayabire, ohweekaya Bbaasa omutuki wa Yisiraeli owali naamuseetere. Mani Yisimaeli naasiichusamo emilaambo ky'abaandu ba yali niyeetere.

¹⁰Yisimaeli yayira mu jeela abaandu boosi abali nibali mu Misipa, yaaboya abahaana b'omutuki neende abaandu boosi abali nibadoong'ere mu Misipa, ba Nebbusaradaani, omuhoongo w'eye, ba yaali naaleheere Gedalia omwaana wa Ahikamu. Yisimaeli omwaana wa Netalia yabayira mu jeela mani yaambuha yaachia mu syaalo sy'Abaamooni.

¹¹Nae Yohanani omwaana wa Kareya neende abeemirisi b'amaye abali nae nibawulira obwiiti bu Yisimaeli omwaana wa Netania yali naaholere,

¹²babukula abasaacha baabwe baachia ohulwaania Yisimaeli omwaana wa Netania. Bamunyoola naali hu sidiba sihoongo esiri mu Gibbeoni.

¹³Mani abaandu boosi abali neende Yisimaeli nibabona Yohanani omwaana wa Kareya neende abeemirisi b'amaye abali nae, basangaala muno.

¹⁴Abaandu boosi ba Yisimaeli yali nayirire mu jeela ohutula Misipa mani bakaluuhana beeruha nibakobolayo, baachia eyiri Yohanani omwaana wa Kareya.

¹⁵Nae Yisimaeli omwaana wa Netania neende abasaacha ba yali nabo bataanu-na-badatu beeyiba hu Yohanani, baachia mu syaalo sy'Abaamooni.

¹⁶Yohanani neende abeemirisi b'amaye abali nae boosi babukula abaandu boosi ba Yisimaeli omwaana wa Netania ba yali naayirire mu jeela ohutula Misipa naamalire ohwiita Gedalia omwaana wa Ahikamu. Omwo nimwo omwali: abasikaari, abahasi, abaana, neende abalooye, ba Yohanani yakobosa ohutula Gibbeoni.

¹⁷Bachia baaba Geruti-Kimihamu aambi neende Bbetilehemu, nibadaha ohuchia Misiri,

¹⁸olwohuba bali nibatiire Abakalidaaya. Babatya olwohuba Yisimaeli omwaana wa Netania yali niyeetere Gedalia omwaana wa Ahikamu, yi mutuki wa Bbabbilooni yali naaholere ohuba gafana w'esyaalo esyo.