Read saamia Yeremia 42 Bible Online

Yeremia 42 - saamia bible

Yeremia 42

¹Abeemeresi b'amaye boosi alala neende Yohanani omwaana wa Kareya neende Asaria omwaana wa Hosaya, neende abaandu boosi ohutulira elalira hu muyere ohiramo, ohwoolera elalira hu muhuluundu ohiramo, basuda aambi

²baaboolera Yeremia omunabbi bati: “Leha amaliro keefwe koole yooli, mani osabe Omwaami, Nasaae wao. Sabira abaandu bano boosi abadoong'ao (olwohuba efwe abalichiingi abaangi, hudoong'ereo abadiidi muno, koti lu mweene obona).

³Saba Omwaami, Nasaae wao anyale ohutweekesa engira yi huhoyere ohudiira, haandi atweekese si huhoyere ohuhola.”

⁴Yeremia omunabbi yabakobolamo ati: “Mbuliire amahuwa keeng'we; mani bone, njia ohusaba Omwaami Nasaae weeng'we koti lu mwekweedere, mani buli siindu si Omwaami anaakobolemo, nisyo siinjia ohubaboolera; sibulao esiindu si ndaabakise daawe.”

⁵Nabo baboolera Yeremia bati: “Leha Omwaami abe omuloli weefwe wadyeeri haandi omweesikwa, atudiise omusaango nihutahola ebyo byoosi bi Omwaami Nasaae wao ahutumire yi huli.

⁶Oba sinaabe esilai oba esibi, huchia ohuwulira ekono ly'Omwaami Nasaae weefwe yi huli ohuhutumaho huti otusabire, hunyale ohuba bulai nihuwulira ekono ly'Omwaami Nasaae weefwe oyo.”

⁷Endaalo ehumi nichabitao, Omwaami yalomaloma naange.

⁸Ndeemao ndaalaanga Yohanani omwaana wa Kareya neende abeemeresi b'amaye boosi abali nibali nae, neende abaandu baandi boosi.

⁹Ndababoolera endi, “Omwaami, Nasaae wa Yisiraeli, oyo yi mwaandumaho ohubasabira aboola ati:

¹⁰Nimudoong'a mu syaalo sino, mba njia ohuboombaha, mani haya ohubalikula; njia ohubataaka, mani haye ohubeeya; olwohuba njia ohweyolobya haye ohubakwiisaho esibi syoosi.

¹¹Mulehere ao ohutiichaanga omutuki wa Bbabbilooni, yi mwatya oyo. Omwaami aboola ati, mutamutya daawe, olwohuba ndi naang'we, ohubawonia neende ohubanunula ohutula mu mahono kae.

¹²Njia ohubakwiira esisa, mani yeesi abakwiire esisa abalehe mube mu syaalo syeeng'we syeene sino.

¹³Nae nimuboola muti, ‘Haba sihuchia ohudoong'a mu syaalo sino’ nimujeemera Omwaami Nasaae weeng'we

¹⁴nimuboola muti, ‘Haba, huchia ohuchia mu syaalo sya Misiri, hube eyo yihutachia ohunyoola ebiita, oba ohuwuliraho ekono ly'eturumbete, oba enjala ohutulumaho.’

¹⁵Sakira, eng'we abadoong'ere mu Buyudaaya, muwulire Emboosi y'Omwaami. Omwaami w'Obunyala, Nasaae wa Yisiraeli aboola ati: ‘Nimuheengereo ohuchia Misiri ohumenyayo,

¹⁶ebiita bi mutya bicha ohubanyoola eyo, haandi enjala yi mutya eyo yicha ohubaloondaho mu syaalo sya Misiri; mani eyo niyo yi muba muchia ohufwiira.

¹⁷Abaandu boosi abamaliriire ohuchia Misiri ohumenya eyo bachia ohufwa ebiita, enjala neende oluumbe bi njia ohubaleetaho.

¹⁸“Olwohuba Omwaami w'Obunyala, Nasaae wa Yisiraeli aboola ati: ‘Koti lu tima neende obwaalaba bwaange byaaka hu baandu bomu Yerusalemu, nilwo lu bwaalaba bwaange buchia ohukwaaho, niwiichuhana mwaachia mu Misiri. Muchia ohubeechaanga esitiisa eyiri abaandu, abaandu bahabalekeereseenge, mani beehoonyeraanga eliita lyeeng'we nibabwaaba. Haandi haba simwahaboneho esyaalo sino ehabi liindi.’

¹⁹Eng'we abadoong'ereo mu Buyudaaya, Omwaami ababoolera ati, ‘Mutachia mu Misiri.’ Mumanyire elalira muti malire ohubalabula enyaanga yino,

²⁰endi abeene muli ohukosya obulamu bweeng'we. Olwohuba niing'we abaanduma eyiri Omwaami nimuboola muti, ‘Tusabireho eyiri Omwaami Nasaae weefwe, mani buli siindu si Omwaami Nasaae weefwe anaahulagire, otuboolere mani huba huchia ohusihola.’

²¹Bulaanu mbao mbaboolere, nae nimuhaya ohuwulira ekono ly'Omwaami Nasaae weeng'we mu buli siindu si yaanduma ohubaboolera,

²²manyire elalira muti muchia ohufwiira mu biita, oba ohufwa enjala, oba ohufwa oluumbe mu syaalo si muli ohwekoomba ohuchia ohumenyamo.”