Read saamia Yeremia 43 Bible Online

Yeremia 43 - saamia bible

Yeremia 43

¹Mani ese Yeremia ndeemao ndaaboolera abaandu boosi emboosi choosi chi Omwaami Nasaae waabwe, yali ni yaandumire ohubaboolera.

²Asaria omwaana wa Osaaya neende Yohanani omwaana wa Kareya neende abasaacha boosi beehuduumbasa baaboolera Yeremia bati: “Leha ohutubacha. Omwaami Nasaae weefwe haba saahutumira ohuboola oti, ‘Haba simuchia Misiri ohumenya eyo’;

³nae humanyire huti Bbaruku omwaana wa Neria niye ohuchuubire, ati otudiise mu mahono k'Abakalidaaya, batwiite, oba batuyire Bbabbilooni mu buwaambe.”

⁴Yohanani omwaana wa Kareya neende abeemeresi b'amaye boosi neende abaandu boosi beemao baahaya ohuwulira ekono ly'Omwaami, ohudoong'a mu syaalo sya Buyudaaya.

⁵Nae Yohanani omwaana wa Kareya neende abeemeresi b'amaye boosi bayira mu Misiri abaandu boosi abali nibadoong'ere mu Buyudaaya neende abo abali nibakoboole mu Buyudaaya ohutula mu byaalo bi bali nisalaanirmo

⁶abasaacha, neende abahasi, neende abaana bayere neende abahaana b'omutuki, neende buli muundu yeesi yi Nebbusaradaani omuhoongo w'amaye yali naaleheere Gedalia omwaana wa Ahikamu, omwiichuhulu wa Safani. Omwo nimwo omwali Yeremia omunabbi neende Bbaruku omwaana wa Neria.

⁷Bajeemera esyo si Omwaami yali naabalagiire; mani baachia mu Misiri, ohwoolera elalira mu siko sya Tapaneesi.

⁸Omwaami yaboolera Yeremia naali Tapaneesi ati:

⁹Bukula amakina mahoongo, mani okayabire aasi w'abuundu yi beengirira mu dooho ly'omutuki wa Misiri Tapaneesi, abasaacha Bayudaaya nibabona,

¹⁰obaboolere oti, Omwaami w'Obunyala, Nasaae wa Yisiraeli aboola ati: Bone, njia ohutuma omuhalaabani waange Nebukadineesa omutuki wa Bbabbilooni, yeeche ate esisaala syae sy'obutuki hu makina ka njabiire aasi kano, mani abaambeho eyeema lyae ly'obutuki.

¹¹Nebukadineesa oyo yaheeche awaambe esyaalo sya Misiri. Mani abo ab'ohufwa oluumbe bafwe, abo ab'ohuyirwa mu buwaambe bayirwe mu buwaambe, haandi abo ab'ohufwiira mu biita bafwiire mu biita.

¹²“Ndahaaduse omuliro hu masabo ka banasaae bomu Misiri, mani omutuki wa Bbabbilooni yahasaambe banasaae bomu Misiri haandi yaabakiinga n'abayira mu buwaambe. Yahalabye esyaalo sya Misiri, koti lu mwaayi yahalabya engubo yae yidiirire amasaanda. Mani yeeweereo mu muleembe.

¹³Yahafunakefunake esiiro cha Heliopoli echiri mu syaalo sya Misiri; haandi yahasaambe enyuumba chia banasaae bomu Misiri.”